ອັນຕະລາຍບໍ່ຫາກບັງເອີນກິນເຊື້ອລາເຂົ້າໄປ ?

Omar Oyarzabal ຜູ້ຊ່ຽວຊານດ້ານອາຫານຂອງມະຫາວິທະຍາໄລເວີມອນ ແນະນຳວ່າ : ເຮົາຕ້ອງຫລີກເວັ້ນການກິນເຂົ້າໜົມປັງ ແລະ ອາຫານທີ່ມີລັກສະນະຄືມີເຊື້ອລາຕິດຢູ່ ເຖິງວ່າເຮົາຈະຢູ່ໃນຍຸກຂອງອາຫານທີ່ລ້ວນແຕ່ຜ່ານຂະບວນການຂ້າເຊື້ອມາສາລະພັດ, ແຕ່ກໍຍັງມີໂອກາດທີ່ເຮົາຈະພົບເຊື້ອລາໃນອາຫານໄດ້ ຫາກສັງເກດເຫັນວ່າເຂົ້າໜົມປັງມີຈຸດນ້ອຍໆທີ່ອາດຈະເປັນເຊື້ອລາໃຫ້ເອົາຖິ້ມທັນທີ ເພາະເຊື້ອລານັ້ນຈະມີລັກສະນະເປັນເສັ້ນໆຄືກັບເສັ້ນຜົມນ້ອຍໆ ແລະ ບາງຫລາຍ ມັນມີຮາກ ແລະ ແຜ່ຂະຫຍາຍອອກໄປແມ່ນແຕ່ໃນພື້ນທີ່ໆເຮົາເບິ່ງບໍ່ເຫັນ ດັ່ງນັ້ນ ຫາກພົບເຊື້ອລາພຽງຈຸດນ້ອຍໆ 1 ຈຸດເທິງເຂົ້າໜົມປັງກໍໃຫ້ໂຍນມັນຖິ້ມໝົດກ້ອນ ແລະ ການຈະຫລີກເວັ້ນການກິນເຊື້ອລາກໍເຮັດໄດ້ວິທີດຽວຄື ສັງເກດຢ່າງຮອບຄອບ.

     ແຕ່ຫາກທ່ານເຜີກິນອາຫານທີ່ມີເຊື້ອລາເຂົ້າໄປຮຽບຮ້ອຍແລ້ວຈະເຮັດແນວໃດ ?

ເຊື້ອລາໃນເຂົ້າໜົມປັງໜ້ອຍໆບໍ່ເປັນອັນຕະລາຍຫລາຍ ບາງຄົນກັງວົນຫລາຍວ່າເຊື້ອລາເປັນສານພິດ ແລະ ຍັງກໍ່ໃຫ້ເກີດອາການແພ້ ແຕ່ເຊື່ອຫລືບໍ່ວ່າເຊື້ອລາທຳມະດາຊະນິດໜຶ່ງທີ່ເອີ້ນວ່າ ເພນິຊິລລຽມ ທີ່ເປັນເຊື້ອລາຂຽວໆເທິງເຂົ້າໜົມປັງ ເຮົາມາໃຊ້ເຮັດຢາປິ່ວປົວພະຍາດທີ່ມີຊື່ວ່າ ເພນິຊິລີນ ແຕ່ສຳລັບຜູ້ທ່ີມີອາການແພ້ເຊື້ອລາ ແລ້ວບັງເອີນກິນເຂົ້າໄປ ອາດເປັນອັນຕະລາຍໄດ້ ອາການແພ້ອາດຮຸນແຮງເຖິງຂັ້ນຄວາມດັນຕົກ, ຫາຍໃຈລຳບາກ ໄປຈົນເຖິງຫົວໃຈລົ້ມເຫລວໄດ້.

ແຕ່ຫາກບໍ່ແພ້ ແລະ ເຜີກິນເຊື້ອລາເຂົ້າໄປ ກໍບໍ່ຕ້ອງຕົກໃຈ ເພາະເຊື້ອລາຈະເປັນອັນຕະລາຍຕໍ່ຮ່າງກາຍເຮົາໄດ້ໃນກໍລະນີທ່ີກິນ ຢ່າງຕໍ່ເນື່ອງເປັນໄລຍະເວລາດົນເທົ່ານັ້ນ.

     ການຫລີກເວັ້ນຈາກເຊື້ອລາ :

1. ການໝັ່ນສັງເກດອາຫານທີ່ຈະຊື້ ແລະ ກ່ອນທີ່ຈະກິນເຂົ້າໄປ, ການດົມບໍ່ໄດ້ຊ່ວຍຫຍັງ ເພາະເຊື້ອລາບໍ່ມີກິ່ນ ແລະ ລອງສັງເກດໂຕເອງວ່າມີອາການແພ້ຕ່າງໆ ເຊັ່ນ : ຕັນດັງ, ຄັນ, ນຳ້ຕາໄຫລ, ນຳ້ມູກໄຫລ, ຄັນປາກ, ຄັນດັງ ຈາກການກິນອາຫານແດ່ຫລືບໍ່.
2. ຄວນຮັກສາຄວາມສະອາດພາຍໃນເຮືອນໃຫ້ດີ ເພາະມັນເປັນສິ່ງທຳອິດທີ່ຕ້ອງເຮັດເພື່ອປ້ອງກັນເຊື້ອລາ. ນອກຈາກນີ້ ເຊື້ອລາສາມາດເຕີບໃຫຍ່ ແລະ ແຜ່ສະປໍອອກໄປຕາມພື້ນຜິວຕ່າງໆທີ່ຢູ່ບໍລິເວນໃກ້ຄຽງ ດັ່ງນັ້ນ ຕາມຕູ້ເຢັນ, ຜ້າເຊັດມື, ພາຊະນະໃສ່ອາຫານ ຫລື ແມ່ນແຕ່ເຄົ້າເຕີໃນເຮືອນຄົວກໍອາດຈະມີສະປໍຂອງເຊື້ອລາຈັບຢູ່ໄດ້ ຈຶ່ງຄວນເຮັດຄວາມສະອາດເປັນປະຈຳ.
3. ເຊື້ອລາເຕີບໃຫຍ່ໄດ້ດີໃນບ່ອນທີ່ມີຄວາມຊຸ່ມ ຫາກເປັນໄປໄດ້ຄວນຄວບຄຸມລະດັບຄວາມຊຸ່ມພາຍໃນເຮືອນບໍ່ໃຫ້ເກີນ 40%.
4. ຄວນເຮັດຄວາມສະອາດຕູ້ເຢັນເປັນປະຈຳ ຢ່າງໜ້ອຍເດືອນລະເທື່ອ 2 ເທື່ອ ໂດຍການເອົາເບກກິ້ງໂຊດາມາລະລາຍນຳ້ແລ້ວເຊັດເຮັດຄວາມສະອາດ ແລະ ຈຸດໃດທີ່ສົງໄສວ່າຈະມີເຊື້ອລາກໍໃຫ້ເອົານຳ້ສົ້ມສາຍຊູປະສົມກັບນຳ້ມາເຊັດອອກ. ສ່ວນຜ້າເຊັດມື ຫລື ຜ້າຊັດຖ້ວຍຫາກເລີ່ມມີກິ່ນກໍໃຫ້ເອົາໄປຖິ້ມດີກ່ວາຈະມາໃຊ້ອີກ ເພາະມັນອາດຈະເປັນການເປີດໂອກາດໃຫ້ເຊື້ອລາແຜ່ກະຈາຍໃນເຮືອນຕໍ່ໄປໄດ້.