ລັດຖະບານລາວຕີລາຄາສູງຕໍ່ການຊ່ວຍເຫຼືອຂອງສະພາກາແດງຝຣັ່ງ

ເມື່ອບໍ່ດົນມານີ້, ທ່ານ ຄຳຮຸ່ງ ເຮືອງວົງສີ  ປະທານອົງການກາແດງລາວ ໄດ້ຕາງໜ້າໃຫ້ລັດຖະບານລາວ ມອບໃບຍ້ອງໃຫ້ແກ່ສະພາກາແດງຝຣັ່ງ ທີ່ໄດ້ປະກອບສ່ວນທາງດ້ານເຫື່ອແຮງ ແລະ ສະຕິປັນຍາ ໃນການສ້າງຄວາມເຂັ້ມແຂງໃຫ້ແກ່ອົງການກາແດງລາວ ໃນການປະຕິບັດໂຄງການຕ່າງໆ ໂດຍເລີ່ມແຕ່ປີ 2002-2018 ເປັນເວລາ 16 ປີ ລາວມີມູນຄ່າຫຼາຍກວ່າ 10 ລ້ານຢູໂຣ ເພື່ອຊ່ວຍເຫຼືອປະຊາຊົນຜູ້ທຸກຍາກໃນເຂດຫ່າງໄກສອກຫຼີກແລະ ມີຫຼາຍໂຄງການໄດ້ຮັບຜົນສຳເລັດເປັນຢ່າງດີຄື: ໂຄງການສ້າງຄວາມເຂັ້ມແຂງໃຫ້ອົງການກາແດງລາວ ໃນການພັດທະນາໂຄງລ່າງ, ໂຄງການສະໜອງນ້ຳສະອາດ, ການຫ້າງຫາກະກຽມຕອບໂຕໄພພິບັດ, ການຊ່ວຍເຫຼືອສຸກເສີນໃຫ້ແກ່ຜູ້ປະສົບໄພນ້ຳຖ້ວມ, ການສ້າງຄວາມປອດໄພທາງຖະໜົນ, ການເພີ້ມບົດບາດແລະ ຄວາມສາມາດຂອງພະນັກງານ, ການເຂົ້າເຖິງການບໍລິການປິ່ນປົວສຸຂະພາບສຳລັບຜູ້ຕິດເຊື້ອເຮສໄອວີ, ການສຶກສາກ່ຽວກັບກົດໝາຍການຕອບໂຕໄພພິບັດສາກົນ, ຊຶ່ງມີທັງໝົດ 26 ໂຄງການ ໄດ້ປະຕິບັດຢູ່ 500 ບ້ານ, 44 ເມື່ອງໃນ 11 ແຂວງຂອງລາວ ມີຄົນເຂົ້າຮ່ວມ ແລະ ໄດ້ຮັບຜົນປະໂຫຍດຫຼາຍເຖິງ 246.133 ຄົນ, ຊຶ່ງເປັນການຮ່ວມມືລະຫວ່າງອົງການກາແດງລາວ ແລະ ສະພາກາແດງຝຣັ່ງ ໃນການພັດທະນາຊິວິດການເປັນຂອງປະຊາຊົນຜູ້ທຸກຍາກໃຫ້ດີຂຶ້ນ.

ຈາກຜົນງານດັ່ງກ່າວ, ລັດຖະບານລາວໄດ້ຕົກລົງມອບໃບຍ້ອງຍໍໃຫ້ແກ່ ທ່ານ ເດວິດ ບົວຊົງ ຜູ້ຕາງໜ້າກາແດງຝຣັ່ງ ປະຈຳລາວ, ທ່ານ ແດງ ແສງອາລຸນ ຜູ້ບໍລິຫານໂຄງການສ້າງຄວາມເຂັ້ມແຂງໃຫ້ອົງການກາແດງລາວ, ທ່ານ ນາງ ດາລາວອນ ສຸກສະຫວັດ ແລະ ທ່ານນາງ ບຸນໂຮມ ສໍພາບ ມີໄຊ ພະນັກງານໂຄງການດັ່ງກ່າວ ຊຶ່ງເປັນບຸກຄົນທີ່ມີຄຸນງາມຄວາມດີປະກອບສ່ວນເຫື່ອແຮງ ແລະ ສະຕິປັນຍາ ໃນການສ້າງຄວາມເຂັ້ມແຂງໃຫ້ແກ່ອົງການກາແດງລາວ.