ຮອງນາຍົກລັດຖະມົນຕີລົງຕິດຕາມສະພາບໄພພິບັດຢູ່ແຂວງຫລວງນໍ້າທາ
ໃນວັນທີ 11-12 ກັນຍານີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການສະເພາະກິດແກ້ໄຂໄພພິບັດລະດັບຊາດ ໄດ້ລົງເຄື່ອນໄຫວຕິດຕາມແກ້ໄຂສະພາບໄພພິບັດນ້ຳຖ້ວມຢູ່ແຂວງຫລວງນໍ້າທາ, ພາຍຫລັງເກີດມີຝົນຕົກໜັກເຮັດໃຫ້ເກີດມີນໍ້າປ່າໄຫລຊຸບ້ານເຮືອນ, ເນື້ອທີ່ການຜະລິດຂອງປະຊາຊົນ, ພື້ນຖານໂຄງລ່າງຖະໜົນຫົນທາງ ໄດ້ຮັບຄວາມເສຍຫາຍຢ່າງຫລວງຫລາຍ ເປັນຕົ້ນແມ່ນ: ເສັ້ນທາງ, ຂົວ ແລະ ຊົນລະປະທານ.
ໂອກາດນີ້, ທ່ານ ເພັດຖາວອນ ພິລາວັນ ເຈົ້າແຂວງຫລວງນໍ້າທາ ກໍໄດ້ລາຍງານເຖິງຜົນເສຍຫາຍທີ່ເກີດຈາກໄພທໍາມະຊາດ ນັບແຕ່ທ້າຍເດືອນກໍລະກົດຈົນເຖິງກາງເດືອນສິງຫາ 2018 ທົ່ວແຂວງມີເນື້ອທີ່ນາປີຖືກນ້ຳຖ້ວມທັງໝົດ 893 ເຮັກຕາ, ຄາດວ່າຈະມີຄວາມເສຍຫາຍ 713 ເຮັກຕາ, ຊົນລະປະທານ 60 ແຫ່ງເປ່ເພເສຍຫາຍມີມູນຄ່າສູງເຖິງ 12,3 ຕື້ກວ່າກີບ, ເສັ້ນທາງຫລວງແຫ່ງຊາດ 13N, 17A, 17B ແລະ R3 ຖືກດິນພູເຊາະເຈື່ອນທັບຖົມ, ເສັ້ນທາງຫລວງຂອງແຂວງ, ເມືອງ ແລະ ຊົນນະບົດ ຖືກນໍ້າເຊາະເຈື່ອນ ແລະ ດິນພູເຈື່ອນລົງມາຖົມຫລາຍຈຸດ, ຊຶ່ງຕ້ອງການງົບປະມານແປງຄືນປະມານ 24 ຕື້ກີບ ແລະ ຂົວຂ້າມນໍ້າລອງເສັ້ນທາງຫລວງແຫ່ງຊາດ 17B (ເມືອງສິງ-ເມືອງລອງ) ຖືກນໍ້າໄຫລຊຸເຮັດໃຫ້ການໄປມາຫາສູ່ກັນພົບຄວາມຫຍຸ້ງຍາກ. ສະເພາະເມືອງວຽງພູຄາແມ່ນໄດ້ຮັບຄວາມເສຍຫາຍກວ່າໝູ່ ມີປະຊາຊົນໄດ້ຖືກຜົນກະທົບຈຳນວນ 34 ບ້ານ, ເນື້ອທີ່ນາ, ສວນປູກສາລີ, ອ້ອຍ, ກ້ວຍ ແລະ ພືດຊະນິດອື່ນໆ ເສຍຫາຍຈໍານວນຫລາຍ, ຮອງລົງມາແມ່ນເມືອງລອງ, ເຊິ່ງມີເນື້ອທີ່ນາເສຍຫາຍກວ່າ 300 ເຮັກຕາ.
ໃນໂອກາດດຽວກັນ, ທ່ານ ສອນໄຊ ສີພັນດອນ ໄດ້ເນັ້ນໃຫ້ຄະນະແກ້ໄຂໄພພິບັດຂັ້ນແຂວງ, ເມືອງ ແລະ ບ້ານ ສືບຕໍ່ເອົາໃຈໃສ່ໃນການໂຄສະນາເຜີຍແຜ່ເພື່ອເຮັດໃຫ້ປະຊາຊົນໄດ້ຮັບຮູ້, ເຂົ້າໃຈ ແລະ ມີສະຕິລະວັງຕົວ ເພື່ອກຽມພ້ອມຮັບມືກັບໄພພິບັດທີ່ອາດຈະເກີດຂຶ້ນ, ສ້າງແຜນເພື່ອຮັບມືກັບໄພພິບັດໃນໄລຍະສັ້ນ, ໄລຍະກາງ ແລະ ໄລຍະຍາວໃຫ້ເປັນລະບົບຄົບຊຸດ, ໂດຍໃຫ້ສ້າງເປັນແຜນຕິດພັນກັບແຜນພັດທະນາເສດຖະກິດ-ສັງຄົມຂອງແຂວງໃນແຕ່ລະປີ ແລະ ເອົາ ໃຈໃສ່ເບິ່ງແຍງລູກຫລານຂອງຕົນໃຫ້ດີ, ໂດຍສະເພາະພາຍຫລັງນໍ້າແຫ້ງລົງແລ້ວໃຫ້ເອົາໃຈໃສ່ໃນການຕິດຕາມພະຍາດລະບາດ, ການສະໜອງແນວພັນເຂົ້າ-ພືດໃຫ້ປະຊົນເພື່ອຜະລິດທົດແທນໃຫ້ທັນຕາມລະດູການ, ກວດກາຄືນຄວາມເສຍຫາຍທີ່ເກີດຂຶ້ນທັງໝົດ, ຈັດສັນບ່ອນຢູ່ອາໄສ ແລະ ບ່ອນທໍາມາຫາກິນຂອງປະຊົນຄືນໃໝ່ໃຫ້ພຽງພໍ.
ພ້ອມດຽວກັນນີ້, ທ່ານ ສອນໄຊ ສີພັນດອນ ກໍໄດ້ມອບເງິນຈໍານວນ 50 ລ້ານກີບໃຫ້ແຂວງ ແລະ 10 ລ້ານກີບໃຫ້ອໍານາດການປົກຄອງເມືອງລອງ ເພື່ອນໍ້າໃຊ້ເຂົ້າໃນການຊ່ວຍເຫລືອ ແລະ ຟື້ນຟູຊີວິດການເປັນຢູ່ຂອງປະຊາຊົນທີ່ຖືກຜົນກະທົບໃນເບື້ອຕົ້ນໄດ້ມີເງື່ອນໄຂສ້າງຊີວິດໃໝ່ດີຂຶ້ນ.
