ຣັດເຊຍຊ້ອມຮົບໃຫຍ່ທີ່ສຸດເທົ່າທີ່ເຄີຍມີມາ
ຣັດເຊຍເປີດການຊ້ອມຮົບໃຫຍ່ທີ່ສຸດເທົ່າທີ່ເຄີຍມີມາ ຈັດຂຶ້ນທາງຕາເວັນອອກໄກຂອງປະເທດ ແລະ ໃນມະຫາສະໝຸດປາຊີຟິກ ໂດຍມີທະຫານຣັດເຊຍຈຳນວນຫລາຍຮ່ວມຊ້ອມຮົບກັບທະຫານຈີນ ແລະ ມົງໂກລີ.
ກະຊວງປ້ອງກັນປະເທດຣັດເຊຍ ເຜີຍແຜ່ວີດີໂອຍານຍົນທະຫານ, ເຮືອບິນ, ເຮລິກອບແຕ ແລະ ເຮືອເຂົ້າປະຈຳຕຳແໜ່ງໃນໄລຍະເລີ່ມຕົ້ນການຊ້ອມ. ພ້ອມກັບຖະແຫລງວ່າ: ການຊ້ອມຮົບພາຍໃຕ້ລະຫັດ Vostok-2018 ເວລາໜຶ່ງອາທິດເລີ່ມແລ້ວໃນວັນທີ 11 ກັນຍານີ້ ມີທະຫານເຂົ້າຮ່ວມ 300.000 ຄົນ, ຍານຍົນທາງທະຫານ 36.000 ຄັນ, ເຮືອບິນ 1.000 ລຳ ແລະ ເຮືອຮົບ 80 ລຳ ຍິ່ງໃຫຍ່ກວ່າການຊ້ອມຮົບພາຍໃຕ້ລະຫັດ Zapad-81 ທີ່ມີທະຫານອົງການສົນທິສັນຍາວໍຊໍ 100.000-150.000 ຄົນເຂົ້າຮ່ວມໃນປີ 1981 ເຊິ່ງເປັນການຊ້ອມຮົບຄັ້ງໃຫຍ່ທີ່ສຸດໃນຍຸກສະຫະພາບໂຊວຽດ.
ອົງການສົນທິສັນຍາອັດລັງຕິກເໜືອ (ນາໂຕ) ປະນາມການຊ້ອມຮົບຮ່ວມດັ່ງກ່າວ ລະຫວ່າງຣັດເຊຍ, ຈີນ ແລະ ມົງໂກລີ ທີ່ຈັດຂຶ້ນມາຫລາຍຄັ້ງວ່າ: ເປັນການຊ້ອມເພື່ອກຽມການຕໍ່ສູ້ຄັ້ງໃຫຍ່, ຄາດວ່າປະທານາທິບໍດີ ວະລາດິເມຍ ປູຕິນ ຂອງຣັດເຊຍ ຈະໄປຊົມການຊ້ອມຫລັງເປີດປະຊຸມເສດຖະກິດຕາເວັນອອກ 2018 ທີ່ເມືອງວະລາດິວໍສຕ໊ອກ ທາງຕາເວັນອອກໄກຂອງປະເທດ ໃນວັນທີ 11 ກັນຍາ. ກອງທັບຣັດເຊຍກຽມສະແດງແສນຍານຸພາບຮຸ່ນຫລ້າສຸດຂອງລູກສອນໄຟອິສກັນດາ ທີ່ສາມາດຕິດຫົວຮົບນິວເຄຼຍ, ລົດຕັງ T-80 ແລະ T-90, ເຮືອບິນຂັບໄລ່ Su-34 ແລະ Su-35 ແລະ ເຮືອຟຣີເກດຕິດລູກສອນໄຟຄາລິບ ທີ່ໃຊ້ຢູ່ຊີຣີໃນປັດຈຸບັນ.
