ທິບພະຍະປະກັນໄພ ສູ້ຊົນຈະກ້າວຂຶ້ນຢູ່ອັນດັບ 2 ຂອງປະເທດ

ເມື່ອບໍ່ດົນມານີ້, ທ່ານ ຫໍລະດີ ວໍລະຣາດ ຜູ້ອໍານວຍການໃຫຍ່ ບໍລິສັດ ທິບພະຍະປະກັນໄພ, ທັງເປັນປະທານສະມາຄົມປະກັນໄພແຫ່ງ ສປປ ລາວ ໃຫ້ຮູ້ວ່າ: ປັດຈຸບັນຢູ່ລາວມີ ບໍລິສັດປະກັນໄພທັງໝົດ 25 ບໍລິສັດ, ໃນນັ້ນ, ທິບພະຍະປະກັນໄພ ຢູ່ໃນອັນອັບ 3-4 ຂອງບໍລິສັດປະກັນໄພດັ່ງກ່າວ, ແຕ່ໃນອະນາຄົດອັນໃກ້ໆນີ້ ບໍລິສັດຈະພະຍາຍາມບຸກບືນກ້າວຂຶ້ນເປັນອັນດັນ 2 ໃຫ້ໄດ້ ໂດຍຈະເນັ້ນໃສ່ດ້ານການບໍລິການລູກຄ້າຫຼັງການຂາຍໃຫ້ດີ, ມີຄວາມວ່ອງໄວ, ຈ່າຍສິ່ງທົດແທນທ່ວງທັນເວລາ ແລະ ໃຫ້ຄວາມເປັນທໍາຕໍ່ລູກຄ້າ.

ປັດຈຸບັນເຖິງວ່າທິບພະຍະປະກັນໄພ ເປັນບໍລິສັດນ້ອງໃໝ່ທີ່ມາເຮັດທຸລະກິດຢູ່ລາວໄດ້ພຽງ 4 ປີ, ພາຍຫຼັງທີ່ທ່ານ ຫໍລະດີ ວໍລະຣາດ ເປັນຄົນລາວຜູ້ທໍາອິດ ໄດ້ເຂົ້າມາເຮັດໜ້າທີ່ຜູ້ອໍານວຍການໃຫຍ່ບໍສັດດັ່ງກ່າວ ຄື: ເມື່ອເດືອນ 11 ປີ 2017 ຜ່ານມາ, ທ່ານໄດ້ມີຄວາມພະຍາຍາມປັບປຸງບໍລິສັດໃຫ້ເຂົ້າສູ່ລະບຽບຫຼັກການ ແລະ ຖືກຕ້ອງຕາມລະບຽບກົດໝາຍຂອງລາວ ປັບປຸງໂຄງຮ່າງການຈັດຕັ້ງ ແລະ ຈັດວາງກໍາລັງພະນັກງານຄືນໃໝ່, ໂດຍສະເພາະແມ່ນລະບົບການຂາຍ, ລະບົບການບັນຊີ, ລະບົບການແກ້ອຸປະຕິເຫດ ແລະ ບໍລິການຫຼັງການຂາຍໃຫ້ດີຂຶ້ນກວ່າເກົ່າ ແລະ ໄດ້ສະເໜີປ່ຽນຊື່ຜະລິດຕະພັນຕ່າງໆຂອງຕົນໃຫ້ແທດເໝາະກັບວັດທະນະທໍາ ແລະ ຊື່ເອີ້ນຂອງລາວເຮົາ ໂດຍສະເພາະການຄ້າ, ການສະຫຼຸບບັນຊີກໍໃຫ້ໄປຕາມກົດໝາຍການບັນຊີຂອງລາວ, ໃຫ້ຄິດໄລ່ເປັນເງິນກີບ ເພາະແຕ່ກ່ອນໄລ່ເປັນເງິນບາດ (ສະກຸນເງິນໄທ) ແລະ ໄດ້ປະຕິບັດຕາມການປັບປຸງໃໝ່ມາໄດ້ 2 ເດືອນແລ້ວ.

ປັດຈຸບັນທິບພະຍະປະກັນໄພມີຢູ່ 2 ຜະລິດຕະພັນໃຫຍ່ຄື: ປະກັນໄພຊີວິດ (ປະກັນສຸຂະພາບ, ປະກັນຊີວິດແບບສະສົມທຶນ ແລະ ສະສົມທຶນໄລຍະສັ້ນ), ປະກັນໄພທົ່ວໄປ (ປະກັນໄພລົດ, ອັກຄີໄພ, ເຮືອນ, ຂົນສົ່ງ, ເດີນທາງ, ອຸປະຕິເຫດແຮງງານ ແລະ ປະກັນໄພການກໍ່ສ້າງ, ໃນນັ້ນ, ກວມອັດຕາສ່ວນຍອດຂາຍກວມເຖິງ 74-75% ແລະ ຈະສືບຕໍ່ຂະຫຍາຍປະກັນໄພການກໍ່ສ້າງ ແລະ ປະກັນໄພຊີວິດ ໃຫ້ກວ້າງຂວາງອອກໄປອີກ, ປັດຈະບັນໃນທົ່ວປະເທດ, ມີຕົວແທນທິບພະຍະປະກັນໄພ ທັງໝົດ 200-300 ຕົວແທນ.