ສວນພຶກສາຈັດສະແດງສິລະປະໃນງານບຸນເຂົ້າປະດັບດິນ
ໃນວັນທີ 9 ກັນຍານີ້, ສວນພຶກສາໄດ້ຈັດກິດຈະກຳສະແດງສິລະປະຈາກນ້ອງນັກຮຽນສະໂມສອນດ່ານຊ້າງ ແລະ ຊົນເຜົ່າມົ້ງ, ເພື່ອເປັນການສົ່ງເສີມຮີດຄອງປະເພນີການເຮັດບຸນເຂົ້າປະດັບດິນ, ໂດຍໄດ້ຮັບຄວາມສົນໃຈຈາກມວນຊົນເປັນຈຳນວນຫລວງຫລາຍ ແລະ ໃນໂອກາດນີ້, ສວນພຶກສາຍັງໄດ້ເປີດໃຫ້ຜູ້ມາຮ່ວມງານໄດ້ທ່ຽວຊົມທຳມະຊາດ, ສວນຜັກປອດສານພິດ, ສວນສະໜຸກ ແລະ ອື່ນໆຢ່າງປະທັບໃຈ.
ສວນພຶກສາເປັນສະຖານທີ່ທ່ອງທ່ຽວໜຶ່ງຢູ່ບ້ານດ່ານຊີ, ເມືອງນາຊາຍທອງ ເຂດຊານເມືອງນະຄອນຫລວງວຽງຈັນ, ສ້າງຂຶ້ນໂດຍຮ້ານຄໍາພູວົງ ເພື່ອແນໃສ່ສົ່ງເສີມການທ່ອງທ່ຽວທໍາມະຊາດ ແລະ ວັດທະນະທໍາຂອງເຜົ່າຕ່າງໆ, ຊຶ່ງໄດ້ເລີ່ມເປີດໃຫ້ບໍລິການແຕ່ປີ 2017 ຜ່ານມາ, ໃນໂອກາດປີທ່ອງທ່ຽວລາວນີ້, ສ່ວນດັ່ງກ່າວກໍໄດ້ປະກອບສ່ວນສໍາຄັນໃນການດຶງດູດຜູ້ມາທ່ຽວ, ເປັນບ່ອນສະໜອງຄວາມຮູ້ແກ່ນັກຮຽນ-ນັກສຶກສາໄດ້ມາທັດສະນະສຶກສາຫາຄວາມຮູ້ກ່ຽວກັບການປູກພືດປອດສານພິດ, ສົ່ງເສີມຮີດຄອງປະເພນີ ແລະ ແບບແຜນການດໍາລົງຊີວິດອັນດີງາມຂອງປະຊາຊົນລາວບັນດາເຜົ່າ ທີ່ມີມາຕັ້ງແຕ່ບູຮານນະການ.
ທ່ານ ພູວົງ ພະມີສິດ ເຈົ້າຂອງສວນພືກສາ ໃຫ້ຮູ້ວ່າ: ສວນພືກສາແຫ່ງນີ້ມີເນື້ອທີ່ຫລາຍກວ່າ 40 ເຮັກຕາ, ໂດຍໄດ້ແບ່ງເຂດການກໍ່ສ້າງຢ່າງເປັນລະບົບ, ເຊິ່ງສ່ວນໃຫຍ່ແລ້ວຈະຖືກຕົບແຕ່ງໄປດ້ວຍສວນດອກໄມ້ນາໆຊະນິດ ທີ່ນັກທ່ອງທ່ຽວເຫັນແລ້ວປະທັບໃຈ ແລະ ຢາກຖ່າຍຮູບໄວ້ເປັນທີ່ລະນຶກ, ພ້ອມນີ້ ຍັງມີໜອງສະ 8 ໜອງ ໄວ້ໃຫ້ນັກທ່ອງທ່ຽວໄດ້ເຮັດກິດຈະກໍາຕຶກເບັດ, ມີຮ້ານອາຫານທີ່ສາມາດຮອງຮັບການຈັດງານລ້ຽງ, ມີຕູບນ້ອຍ-ໃຫຍ່ ໄວ້ຄອຍບໍລິການເພື່ອນັ່ງພັກຜ່ອນຊົມທໍາມະຊາດ, ມີການບໍລິການຂີ່ລົດໄຟຟ້າອ້ອມສວນ ເພື່ອຊົມບ້ານຊົນເຜົ່າຕ່າງໆຄື: ເຜົ່າລາວ, ເຜົ່າມົ້ງ ແລະ ກຶມມຸ ແລະ ໃນແຕ່ລະວັນຈະມີການສະແດງສິລະປະວັນນະຄະດີ ແລະ ຫລາຍກິດຈະກໍາໃຫ້ມວນຊົນໄດ້ຊົມອີກດ້ວຍ.
