ປກສ ເອັຟຊີ ຍັງໂຊຟອມເໜືອກວ່າ ເອົາຊະນະ ເອັສທີທີ ເອັຟຊີ 3-2
ການແຂ່ງຂັນບານເຕະສາຍ ກ ຫລື ດີວີຊັນ 1 ໄດ້ດໍາເນີນມາເປັນອາທິດທີ 3 ແລ້ວ ເຊິ່ງແຕ່ລະທີມໄດ້ລົງສະໜາມ 3 ຄັ້ງ. ຫລ້າສຸດ ທີມ ປກສ ເອັຟຊີ ລົງສະໜາມຄັ້ງທີ 3 ສາມາດໂຊຟອມດີກວ່າ ທີມເອັສທີທີ ເອັຟຊີ 3-2 ໃນວັນທີ 8 ກັນຍາຜ່ານມານີ້ ທີ່ສະໜາມສະຫະພັນບານເຕະແຫ່ງຊາດລາວ.
ທີມ ປກສ ເອັຟຊີ ຍັງຮັກສາຟອມການຫລິ້ນດີສົມຄວນ ພາຍຫລັງລົງສະໜາມ 3 ຄັ້ງ ສາມາດເອົາຊະນະ 3 ຄັ້ງ ລວມມີ 9 ຄະແນນ ເປັນອັນດັບທີ 1 ຂອງກຸ່ມເອ, ສ່ວນອັນດັບທີ 2 ທີມດີເຄ ເອັຟຊີ ຈາກການລົງສະໜາມ 2 ຄັ້ງ ຊະນະ 2 ຄັ້ງ ລວມມີ 6 ຄະແນນ. ຂະນະທີ່ ອັນດັບທີ 1 ຂອງກຸ່ມບີ ຍັງຕົກເປັນຂອງທີມ ກອງທັບ ເອັຟຊີ ຈາກການລົງສະໜາມ 3 ຄັ້ງ ຊະນະ 3 ຄັ້ງ ລວມມີ 9 ຄະແນນ, ສ່ວນອັນດັບທີ 2 ທີມວຽງຈັນ ຢູໄນເຕັດ ຈາກການລົງສະໜາມ 2 ຄັ້ງ ຊະນະ 2 ຄັ້ງ ລວມມີ 6 ຄະແນນ.
ສໍາລັບຕາຕະລາງການແຂ່ງຂັນ ວັນທີ 16 ກັນຍາ ປກສ ເອັຟຊີ ພົບ ດີເຄ ເອັຟຊີ ເວລາ 14:00 ໂມງ ຢູ່ເດີ່ນ 1 ຂອງ ສຕລ. ຂະນະດຽວກັນ ອີໂວ້ ຢູໄນເຕັດ ພົບ ເອັສທີທີ ເອັຟຊີ ຢູ່ເດີ່ນ 2 ຂອງ ສຕລ, ສ່ວນເວລາ 9:00 ໂມງ ເຄພີເອັສ ເອັຟຊີ ພົບ ທຣີນີຕີ ເອັຟຊີ.
