ຕິ່ງຈຸນຮຸຍ ເດີນໜ້າເຂົ້າສູ່ຮອບ 16 ຄົນສຸດທ້າຍ ສະນຸກເກີ 6 ແດງຊິງແຊ້ມໂລກ 2018 ທີ່ປະເທດໄທ
ຕິ່ງຈຸນຮຸຍ (Ding Junhui) ນັກກິລາສະນຸກເກີ ມື 6 ຂອງໂລກ ໄວ 31 ປີ ຈາກ ສປ ຈີນ ຊະນະຄູ່ແຂ່ງ 3 ຄົນໃນຮອບແບ່ງກຸ່ມ: ຊະນະ Mohamed Khairy ຈາກເອຢິບ 5-3 ເຟຣມ, ຊະນະ Sunny Akani ຈາກໄທເຈົ້າພາບ ອັນດັບ 65 ຂອງໂລກ 5-4 ເຟຣມ ແລະ ຊະນະ Jimmy Robertson ອັນດັບ 35 ຂອງໂລກ ຈາກອັງກິດ 5-3 ເຟຣມ ເດີນໜ້າເຂົ້າສູ່ຮອບ 16 ຄົນສຸດທ້າຍ ໃນຖານະອັນດັບທີ 1 ຂອງກຸ່ມ E.
ສ່ວນແຊ້ມເກົ່າ ມາກ ວິນລ້ຽມສ໌ (Mark Williams) ມື 2 ຂອງໂລກຈາກເວວ ແຊ້ມໂລກຄົນຫລ້າສຸດ ຊະນະ 2 ນັດ ໂອກາດເຂົ້າຮອບ 16 ຄົນສົດໃສ, ຂະນະທີ່ ມາກ ເຊວບີ້ (Mark Selby) ມື 1 ຂອງໂລກ ຈາກອັງກິດ ອະດີດແຊ້ມປີ 2010 ຊະນະ 3 ນັດລວດ ເຂົ້າຮອບ 16 ຄົນແນ່ນອນແລ້ວ.
ສຳລັບການແຂ່ງຂັນສະນຸກເກີ 6 ແດງຊີງແຊ້ມໂລກ ທີ່ປະເທດໄທ ຈັດຂຶ້ນເປັນຄັ້ງທີ 10 ປີນີ້ ແຂ່ງຂັນໃນວັນທີ 3-8 ກັນຍານີ້ ທີ່ Bangkok Convention Center ມີນັກສະນຸກເກີເຂົ້າຮ່ວມ 32 ຄົນທີ່ຜ່ານການຄັດເລືອກເຂົ້າມາ ແບ່ງເປັນ 8 ກຸ່ມ, ກຸ່ມລະ 4 ຄົນ, ແຂ່ງພົບກັນຫມົດໃນກຸ່ມ ແລ້ວຄັດເອົາທີ 1 ແລະ ທີ 2 ຂອງແຕ່ລະກຸ່ມເຂົ້າຮອບ 16 ທີມຕໍ່ໄປ. ປີນີ້ຊີງເງິນລາງວັນລວມ 10 ລ້ານບາດ. ແຊ້ມຈະໄດ້ຮັບເງິນລາງວັນ 3,5 ລ້ານບາດ.
