ຄາດວ່າຈະໃຊ້ເວລາ 1 ອາທິດໃນການເຮັດໃຫ້ ຮອກໄກໂດກັບມາມີໄຟຟ້າໃຊ້ໄດ້ຄືເກົ່າ
ທ່ານ ຮິໂຣຊິເກະ ເຊໂກະ ລັດຖະມົນຕີກະຊວງການຄ້າ ແລະ ອຸດສາຫະກຳຍີ່ປຸ່ນ ກ່າວໃນວັນທີ 6 ກັນຍາວ່າ: ຄາດວ່າຈະໃຊ້ເວລາຢ່າງໜ້ອຍ 1 ອາທິດໃນການຟື້ນຟູໃຫ້ເກາະຮອກໄກໂດກັບມາມີກະແສໄຟຟ້າໃຊ້ຄືເກົ່າ, ຫລັງຈາກເກີດແຜ່ນດິນໄຫວຄັ້ງໃຫຍ່ໃນຕອນເຊົ້າວັນທີ 6 ກັນຍານີ້ ມີຜູ້ເສຍຊີວິດແລ້ວ 8 ຄົນ, ສູນຫາຍ 40 ຄົນ. ນອກຈາກນີ້ ຍັງມີຜູ້ບາດເຈັບ 140 ຄົນ.
ທາງການຍີ່ປຸ່ນກຳລັງດຳເນີນຄວາມພະຍາຍາມເຮັດໃຫ້ບາງພື້ນທີ່ກັບມາມີກະແສໄຟຟ້າໃຊ້ໂດຍໄວທີ່ສຸດເທົ່າທີ່ຈະເປັນໄປໄດ້. ຂະນະທີ່ ບໍລິສັດຮອກໄກໂດ ເອເລັກຕຣິກ ພາວເວີ ເລີ່ມເດີນເຄື່ອງຜະລິດກະແສໄຟຟ້າທີ່ໂຮງໄຟຟ້າຖ່ານຫີນຊຸນະກາວະ. ເຖິງຢ່າງໃດກໍຕາມ, ທ່ານ ເຊໂກະ ຄາດວ່າ: ຈະສາມາດກູ້ຄືນການຈ່າຍກະແສໄຟຟ້າໄດ້ 2,9 ກິກະວັດພາຍໃນວັນທີ 7 ກັນຍານີ້ ແລະ ຄາດວ່າ: ຈະສາມາດກັບມາຈ່າຍກະແສໄຟຟ້າໄດ້ຄືເກົ່າທົ່ວເກາະໃນອີກຢ່າງໜ້ອຍ 1 ອາທິດ. ຮອກໄກໂດ ເອເລັກຕຣິກ ກ່າວວ່າ: ຖືເປັນເທື່ອທຳອິດນັບແຕ່ສ້າງຕັ້ງໃນປີ 1951 ທີ່ບໍ່ມີກະແສໄຟຟ້າໃຊ້ທົ່ວເກາະ.
