ເຈົ້າພາບຫວັງຫລຽນທຸກປະເພດ ກິລາຊຽງຂວາງເກມຄັ້ງທີ 11
ແຂວງຊຽງຂວາງເຈົ້າພາບກິລາແຫ່ງຊາດລາວຄັ້ງທີ 11 ຈະສົ່ງນັກກິລາເຂົ້າຮ່ວມ 500 ກວ່າຄົນໃນທຸກປະເພດ ແລະ ທຸກລາຍການ ພ້ອມຫວັງຍາດໃຫ້ໄດ້ຫລຽນຄໍາທຸກປະເພດກິລາ ໃນງານມະຫາກໍາກິລາແຫ່ງຊາດຄັ້ງທີ 11 ຫລື ຊຽງຂວາງເກມ ທີ່ຈະຈັດຂຶ້ນທ້າຍປີນີ້.
ທ່ານ ທອງຜິວ ສີປັນຍາ ຮອງຫົວໜ້າພະແນກສຶກສາທິການ ແລະ ກິລາແຂວງຊຽງຂວາງ ໃຫ້ສໍາພາດວ່າ: ພາຍຫລັງທີ່ໄດ້ຮັບການແຕ່ງຕັ້ງຈາກຂັ້ນເທິງແລ້ວ ພວກເຮົາກໍເລີ່ມຄັດເລືອກນັກກິລາແຕ່ຕົ້ນເດືອນມິຖຸນາ 2017 ເປັນຕົ້ນມາ ຈົນຮອດປັດຈຸບັນພວກເຮົາສາມາດຄັດເລືອກນັກກິລາເຂົ້າສູນຝຶກຊ້ອມທັງໝົດ 548 ຄົນ, ຍິງ 274 ຄົນ ການຝຶກຊ້ອມພວກເຮົາໄດ້ແບ່ງອອກເປັນຈຸ ແລະ ແບ່ງຄວາມຮັບຜິດຊອບໃຫ້ແຕ່ລະຄູຝຶກ ເຊິ່ງນັກກິລາບາງຈໍານວນກໍຝຶກຊ້ອມຢູ່ແຂວງ ແລະ ຝຶກຊ້ອມຢູ່ສູນສີເກີດ ນະຄອນຫລວງວຽງຈັນ, ສ່ວນກິລາມວຍສາກົນ ແລະ ມວຍລາວ ແມ່ນໄດ້ສົ່ງໄປຝຶກຊ້ອມທີ່ປະເທດໄທ, ທັງນີ້ ເພື່ອຮັບປະກັນໃນການຍາດເອົາຫລຽນຄໍາທຸກປະເພດກິລາ. ສໍາລັບກິລາທີ່ຕັ້ງຄວາມຫວັງຫລາຍກວ່າໝູ່ແມ່ນກະຕໍ້, ປິ່ງປ໋ອງ, ແລ່ນ-ລານ, ເປຕັງ, ໝາກຂ່າງ, ໜ້າເກັກ, ເທຄວັນໂດ, ໝາກແລ້, ຍິງທະນູ, ມວຍສາກົນ, ມວຍປໍ້າ, ມວຍລາວ, ວູຊູ, ຢູໂດ, ປັນຈັກສີລັດ ແລະ ກິລາລອຍນໍ້າ.
ການແຂ່ງຂັນໃນງານມະຫາກໍາກິລາ ຊຽງຂວາງເກມ 2018 ມີ 28 ປະເພດການແຂ່ງຂັນຄື: ບານເຕະ, ແລ່ນ-ລານ, ບານບ້ວງ, ເທັນນິດ, ດອກປີກໄກ່, ກະຕໍ້, ປິ່ງປ໋ອງ, ເທຄວັນໂດ, ບານສົ່ງ, ຄາຣາເຕໂດ, ຢູໂດ, ປັນຈັກສີລັດ, ວູຊູ, ໝາກແລ້, ໝາກເສີກ, ເຮືອຊ່ວງ, ໝາກຂາງ, ໜ້າເກັກ, ຍິງທະນູ, ລົດຖີບ, ລອຍນໍ້າ, ເປຕັງ, ໂບລິ້ງ, ກ໋ອບ, ຍິງປືນ, ມວຍລາວ, ມວຍສາກົນ ແລະ ກິລາສະນຸກເກີ.
