1 ຫລຽນເງິນ 1 ຫລຽນທອງ ສ້າງຄວາມພູມໃຈຂອງຄະນະນໍາກະຕໍ້
ສະຫະພັນກະຕໍ້ແຫ່ງຊາດລາວ ໄດ້ສົ່ງນັກກິລາລາເຂົ້າຮ່ວມງານມະຫາກໍາເອຊຽນເກມຄັ້ງທີ 18 ທີ່ປະເທດອິນໂດເນເຊຍ ທີ່ຈັດຂຶ້ນລະຫວ່າງທ້າຍເດືອນສິງຜ່ານມາ ເຊິ່ງນັກກິລາສາມາດຍາດໄດ້ 1 ຫລຽນເງິນ ແລະ 1 ຫລຽນທອງ ສ້າງຄວາມປະທັບໃຈ ແລະ ພູມໃຈຕໍ່ກັບຄະນະນໍາຄູຝຶກກະຕໍ້ທີ່ເຂົ້າຮ່ວມການແຂ່ງຂັນດັ່ງກ່າວ.
ທ່ານ ອານຸສອນ ເຄນຕິສັກ ຮອງປະທານສະຫະພັນກິລາກະຕໍ້ທີມຊາດລາວ ທັງເປັນຄະນະນໍາ-ນຳພານັກກິລາກະຕໍ້ທີມຊາດລາວເຂົ້າຮ່ວມງານມະຫາກໍາເອຊຽນເກມຄັ້ງທີ 18 ທີ່ປະເທດອິນໂດເນເຊຍ ໃຫ້ສໍາພາດວ່າ: ພາຍຫລັງໄດ້ຮັບການແຕ່ງຕັ້ງຈາກຄະນະກະຊວງສຶກສາທິການ ແລະ ກິລາແລ້ວ ພວກເຮົາກໍໄດ້ເລີ່ມຄັດເລືອກເອົານັກກິລາທີ່ເປັນເປົ້າໝາຍຂອງພວກເຮົາເຂົ້າສູນ ເຊິ່ງໃນນັ້ນມີນັກກິລາທີ່ຄັດຈາກການເຂົ້າຮ່ວມແຂ່ງຂັນລະດັບມະຫາວິທະຍາໄລ ແລະ ງານມະຫາກໍາກິລານັກຮຽນທົ່ວປະເທດ. ດັ່ງນັ້ນ ຈຶ່ງສາມາດຄັດເລືອກໄດ້ຈໍານວນ 31 ຄົນ, ຍິງ 11 ຄົນເຂົ້າສູນຝຶກຊ້ອມແຕ່ເດືອນເມສາເປັນຕົ້ນມາ, ຈົນຮອດວັນທີ 16 ສິງຫາ ພວກເຮົາກໍໄດ້ເດີນທາງເຂົ້າຮ່ວມການແຂ່ງຂັນດັ່ງກ່າວ. ສໍາລັບກະຕໍ້ທີມຊາດລາວເຂົ້າຮ່ວມ 4 ລາຍການ ຍິງ 2 ລາຍການຄື: ທີມ 4 ຄົນ, ທີມຊຸດ. ສໍາລັບກະຕໍ້ຊາຍທີມຊາດລາວ ຖືກຈັດຢູ່ໃນກຸ່ມບີໃນລາຍທີມຊຸດ ເຊິ່ງປະກອບມີ ໄທ, ມຽນມາ. ສ່ວນລາຍການທີມ 4 ຄົນ ຖືກຈັດຢູ່ກຸ່ມບີເຊັ່ນດຽວກັນ ຮ່ວມກັບເຈົ້າພາບອິນໂດເນເຊຍ, ຍີ່ປຸ່ນ, ມຽນມາ, ຈີນ. ຜ່ານການແຂ່ງຂັນ ນັກກິລາຂອງພວກເຮົາສາມາດຍາດໄດ້ 1 ຫລຽນເງິນຈາກທີມຊຸດຊາຍ, ສ່ວນຫລຽນທອງໄດ້ຈາກທີມ 4 ຄົນຍິງ ສິ່ງດັ່ງກ່າວແມ່ນໄດ້ສ້າງຊື່ສຽງໃຫ້ແກ່ວົງການກິລາກະຕໍ້ລາວໃນເວທີພາກພື້ນ ແລະ ສາກົນ ພ້ອມທັງສ້າງຄວາມພາກພູມໃຈຕໍ່ຄະນະນໍາຄູຝຶກທີ່ໄດ້ນໍາພານັກກິລາເຂົ້າຮ່ວມລາຍການດັ່ງກ່າວ.
ການແຂ່ງຂັນດັ່ງກ່າວ ນັກກິລາທີມຊາດລາວ ສາມາດຍາດໄດ້ 2 ຫລຽນເງິນໄດ້ຈາກ ກະຕໍ້ທີມຊຸດຊາຍ ແລະ ຈາກປັນຈັກສີລັດຍິງ ປະເພດຕໍ່ສູ້, ສ່ວນ 3 ຫລຽນທອງ ໄດ້ຈາກປັນຈັກສີລັດ 2 ຫລຽນ ແລະ ຈາກກະຕໍ້ທີມ 4 ຄົນຍິງ.
