ອາກຊັງຕິນຫວັງໃຫ້ IMF ຈະຕົກລົງ ພາຍໃນເດືອນນີ້ເລື່ອງຊ່ວຍເຫລືອ ທາງການເງິນ
ອາກຊັງຕິນ ປະເທດໃຫຍ່ອັນດັບສີ່ຂອງທະວີບອາເມລິກາຫວັງວ່າ: ກອງທຶນການເງິນສາກົນ (IMF) ຈະຕົກລົງພາຍໃນເດືອນນີ້ ເລື່ອງໃຫ້ການຊ່ວຍເຫລືອທາງການເງິນ ເພື່ອໃຫ້ສາມາດຫລຸດພົ້ນຈາກວິກິດເສດຖະກິດຮ້າຍແຮງ.
ທ່ານ ນີໂກລາສ ດູມອຟເນ ລັດຖະມົນຕີເສດຖະກິດອາກຊັງຕິນ ກ່າວຫລັງພົບກັບທ່ານ ນາງ ຄຣິສຕິນ ລາກາດ ກຳມະການຜູ້ຈັດການ IMF ທີ່ນະຄອນຫລວງວໍຊິງຕັນວ່າ: ກຳລັງຫາທາງໃຫ້ຄະນະກຳມະການບໍລິຫານ IMF ລົງມະຕິພາຍໃນເຄິ່ງຫລັງຂອງເດືອນນີ້ຕໍ່ຂໍ້ສະເໜີປັບປຸງຂໍ້ຕົກລົງຊ່ວຍເຫລືອທາງການເງິນສຳຮອງ ມູນຄ່າ 50.000 ລ້ານໂດລາສະຫະລັດ ທີ່ອາກຊັງຕິນຕົກລົງກັບ IMF ໃນເດືອນມິຖຸນາ. ຂະນະທີ່ ທ່ານ ນາງ ລາກາດ ກ່າວວ່າ: ຈະມີການຫາລືໃນລະດັບເຈົ້າໜ້າທີ່ຕໍ່ໄປ, ຂໍເນັ້ນວ່າທັງສອງຝ່າຍເຫັນກົງກັນວ່າຈະບັນລຸຂໍ້ສະຫລຸບໃຫ້ໄວທີ່ສຸດ ເພື່ອຍື່ນຂໍ້ສະເໜີຕໍ່ຄະນະກຳມະການບໍລິຫານ IMF ຕໍ່ໄປ. ໂຄສົກ IMF ເປີດເຜີຍວ່າ: ຍັງບໍ່ແນ່ໃຈວ່າ ຄະນະກຳມະການບໍລິຫານຈະລົງມະຕິໄດ້ທັນພາຍໃນເດືອນນີ້ ຂຶ້ນກັບຜົນການເຈລະຈາລະຫວ່າງ IMF ກັບ ອາກຊັງຕິນ.
ອາກຊັງຕິນ ກຳລັງຫາທາງຫລຸດພົ້ນຈາກວິກິດເສດຖະກິດທີ່ເກີດຂຶ້ນທຸກ 10 ປີ ຕະຫລອດ 60 ປີຜ່ານມາ. ປະທານາທິບໍດີ ເມົາຣີຊິໂອ ມາກຣີ ປະກາດໃນວັນທີ 3 ກັນຍາວ່າ: ຈະເກັບພາສີໃໝ່ຕໍ່ສິນຄ້າສົ່ງອອກ ແລະ ຫລຸດການໃຊ້ຈ່າຍ ເພື່ອຫລຸດຍອດຂາດດູນການເງິນໃນປີໜ້າ ເປັນການສ້າງຄວາມໝັ້ນໃຈໃຫ້ແກ່ນັກລົງທຶນວ່າ: ອາກຊັງຕິນຈະສາມາດຊຳລະຄືນໜີ້ໄດ້, ແຕ່ໄດ້ຂໍໃຫ້ IMF ຈັດສັນເງິນຊ່ວຍເຫລືອສຳຮອງທີ່ຕົກລົງໄວ້ ໃນເດືອນມິຖຸນາໄວກວ່າກຳນົດໄວ້.
