ດອກປີກໄກ່ລາວສ້າງຜົນງານດີເດັ່ນທີ່ປະເທດໄທ
ສະຫະພັນດອກປີກໄກ່ແຫ່ງຊາດລາວ ໄດ້ສົ່ງນັກກິລາ10 ຄົນເຂົ້າຮ່ວມແຂ່ງຂັນກິລາດອກປີກໄກ່ສາກົນລຸ້ນເຍົາວະຊົນ ອາຍຸບໍ່ເກີນ 12 ປີ, 14 ປີ ແລະ 16 ປີ ໃນລາຍການ Jorakay International Junior championship 2018 ທີ່ຈັງຫວັດອຸດອນທານີ ປະເທດໄທ ລະຫວ່າງວັນທີ 31 ສິງຫາ ຫາ 2 ກັນຍານີ້ ເຊິ່ງນັກກິລາສາມາດສ້າງຜົນງານໂດດເດັ່ນ.
ທ່ານ ບຸນຍະແສງ ນະຂຽງຄໍາ ຜູ້ຈັດການທີມນັກກິລາເຍົາວະຊົນລາວເຂົ້າຮ່ວມການແຂ່ງຂັນດອກປີກໄກ່ສາກົນທີ່ປະເທດໄທ ໃຫ້ສໍາພາດວ່າ: ການແຂ່ງຂັນຄັ້ງນີ້ ສະຫະພັນກິລາດອກປີກໄກ່ແຫ່ງຊາດລາວ ໄດ້ຄັດເລືອກເອົານັກກິລາເຂົ້າຮ່ວມລາຍການດັ່ງກ່າວ ເພື່ອກຽມຄວາມພ້ອມເຂົ້າຮ່ວມການແຂ່ງຂັນລາຍການຕ່າງໆໃນພາກພື້ນ ແລະ ສາກົນ ເຊິ່ງການເຂົ້າຮ່ວມລາຍການດອກປີກໄກ່ສາກົນເຍົາວະຊົນ ພວກເຮົາໄດ້ສົ່ງນັກກິລາເຂົ້າຮ່ວມທັງໝົດ 10 ຄົນ ຜ່ານການແຂ່ງຂັນຜົນປາກົດວ່າ: ນາງ ພຸດສະຫວັນ ດາວປະສິດ ໄດ້ຮອງຊະນະເລີດດ່ຽວເຍົາວະຊົນຍິງ 12 ປີ, ນາງ ພຸດສະຫວັນ ດາວປະສິດ ແລະ ນາງ ອັດຈິມາ ພິຈິດ ໄດ້ຮອງຊະນະເລີດ ຄູ່ເຍົາວະຊົນຍິງ 12 ປີ, ນາງ ພຸດສະຫວັນ ດາວປະສິດ ໄດ້ຊະນະເລີດດ່ຽວເຍົາວະຊົນຍິງ 14 ປີ, ນາງ ວິລະກອນ ກົມມະນີວັນ ແລະ ນາງ ສຸດທິດາ ສອນນະລາດ ໄດ້ອັນດັບ 3 ຄູ່ເຍົາວະຊົນຍິງ 16 ປີ, ທ້າວ ມານັດ ເພຍສຸລິນ ໄດ້ຊະນະເລີດດ່ຽວເຍົາວະຊົນຊາຍ 14 ປີ, ທ້າວ ໄຊຍະລາດ ສຸກສະຫວັດ ໄດ້ອັນດັບ 3 ດ່ຽວເຍົາວະຊົນຊາຍ 14 ປີ, ທ້າວ ມານັດ ເພຍສຸລິນ ແລະ ທ້າວ ໄຊຍະສອນ ແກ້ວໄຊ ໄດ້ຊະນະເລີດຄູ່ເຍົາວະຊົນຊາຍ 14 ປີ, ທ້າວ ໂພທິພອນ ບຸນມີໄຊ ແລະ ທ້າວ ໄຊຍະລາດ ສຸກສະຫວັດ ໄດ້ຮອງຊະນະເລີດຄູ່ເຍົາວະຊົນຊາຍ 14 ປີ, ທ້າວ ມານັດ ເພຍສຸລິນ ໄດ້ອັນດັບ 3 ດ່ຽວເຍົາວະຊົນຊາຍ 16 ປີ, ທ້າວ ສີປະເສີດ ອາລຸນສະຫວາດ ແລະ ທ້າວ ສຸກສາຄອນ ສິງວິໄລ ໄດ້ຮອງຊະນະເລີດຄູ່ເຍົາວະຊົນຊາຍ 16 ປີ.
