ເດີ່ນເປີດ-ປິດກິລາແຫ່ງຊາດຊຽງຂວາງສໍາເລັດ 85%
ປັດຈຸບັນເດີ່ນເປີດ-ປິດງານມະຫາກໍາກິລາແຫ່ງຊາດຄັ້ງທີ 11 ທີ່ແຂວງຊຽງຂວາງເປັນເຈົ້າພາບ ໄດ້ສໍາເລັດ 85% ແລ້ວ, ຂະນະທີ່ການແຂ່ງຂັນຈະເລີ່ມຂຶ້ນທ້າຍປີນີ້ ໂດຍມີການຊີງໄຊ 28 ປະເພດກິລາ.
ທ່ານ ທອງສີ ພັນທະວົງ ຮອງຫົວໜ້າພະແນກສຶກສາທິການ ແລະ ກິລາແຂວງຊຽງຂວາງ ທັງເປັນເລຂາປະຈໍາງານມະຫາກໍາກິລາແຫ່ງຊາດຄັ້ງທີ 11 ທີ່ແຂວງຊຽງຂວາງເປັນເຈົ້າພາບ ໃຫ້ສໍາພາດວ່າ: ພາຍຫລັງໄດ້ຮັບການແຕ່ງຕັ້ງຈາກຂັ້ນເທິງແລ້ວ ພວກເຮົາກໍຂຸ້ນຂ້ຽວປະຕິບັດ ແລະ ເລີ່ມຈັດຕັ້ງຄະນະຮັບຜິດຊອບສະເພາະ ໂດຍເລີ່ມແຕ່ທ້າຍປີ 2017 ເປັນຕົ້ນມາ ເຊິ່ງມາຮອດປັດຈຸບັນພວກເຮົາມີຄວາມພ້ອມຫລາຍພໍສົມຄວນ, ໃນນັ້ນ ການກໍ່ສ້າງສະໜາມກິລາທີ່ໃຊ້ປິດ-ເປີດການແຂ່ງຂັນດັ່ງກ່າວແມ່ນໄດ້ສໍາເລັດໄປແລ້ວ 85% ແຕ່ຍ້ອນສະພາບດິນ-ຟ້າອາກາດບໍ່ເອື້ອອໍານວຍ. ດັ່ງນັ້ນ ຈຶ່ງເຮັດໃຫ້ການກໍ່ສ້າງຕ້ອງໄດ້ຢຸດເຊົາຊົ່ວຄາວ ຄາດວ່າກາງເດືອນກັນຍານີ້ພວກເຮົາຈະໃຫ້ສໍາເລັດໄປອີກຂັ້ນ.
ການແຂ່ງຂັນໃນງານມະຫາກໍາກິລາຊຽງຂວາງເກມ 2018 ມີ 28 ປະເພດການແຂ່ງຂັນຄື: ບານເຕະ, ແລ່ນ-ລານ, ບານບ້ວງ, ເທັນນິດ, ດອກປີກໄກ່, ກະຕໍ້, ປິ່ງປ໋ອງ, ເທຄວັນໂດ, ບານສົ່ງ, ຄາຣາເຕໂດ, ຢູໂດ, ປັນຈັກສີລັດ, ວູຊູ, ໝາກແລ້, ໝາກເສີກ, ເຮືອຊ່ວງ, ໝາກຂາງ, ໜ້າເກັກ, ຍິງທະນູ, ລົດຖີບ, ລອຍນໍ້າ, ເປຕັງ, ໂບລິ້ງ, ກ໋ອບ, ຍິງປືນ, ມວຍລາວ, ມວຍສາກົນ ແລະ ກິລາສະນຸກເກີ.
