ສະພາປະຊາຊົນແຂວງອຸດົມໄຊຮັບຮອງທ່ານ ຄຳພັນ ເຜີຍຍະວົງ ເປັນເຈົ້າແຂວງຜູ້ໃໝ່
ທ່ານ ຄຳພັນ ເຜີຍຍະວົງ ໄດ້ຖືກຮັບຮອງຈາກສະພາປະຊາຊົນແຂວງອຸດົມໄຊຄົນໃໝ່, ການຮັບຮອງດັ່ງກ່າວມີຂຶ້ນໃນກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງອຸດົມໄຊ ຊຸດທີ 1 ໃນວັນທີ 30 ສິງຫານີ້ ເພື່ອຮັບປະກັນໃຫ້ແກ່ການບໍລິຫານຄຸ້ມຄອງແຂວງມີຄວາມຕໍ່ເນື່ອງ ເປັນລະບົບຄົບຊຸດ ທັງສອດຄ່ອງລັດຖະທຳມະນູນ, ກົດໝາຍ ແລະ ອີງໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງຂອງອົງການປົກຄອງແຂວງໃນໄລຍະໃໝ່ ແລະ ສະພາບຄວາມເປັນຈິງຂອງການພັດທະນາ ແລະ ຮັບປະກັນໃຫ້ແກ່ພາລະກິດປົກປັກຮັກສາ ແລະ ສ້າງສາພັດທະນາແຂວງອຸດົມໄຊໃຫ້ມີຜົນສຳເລັດຂຶ້ນເທື່ອລະກ້າວ.
ກ່ອນຈະມາຮັບໜ້າທີ່ເຈົ້າແຂວງອຸດົມໄຊຄົນໃໝ່ນີ້, ທ່ານ ຄຳພັນ ເຜີຍຍະວົງ ເຄີຍດຳລົງຕຳແໜ່ງເປັນເຈົ້າແຂວງບໍ່ແກ້ວ. ຈາກນັ້ນກົມການເມືອງສູນກາງພັກໄດ້ມີມະຕິຕົກລົງເຫັນດີໃຫ້ທ່ານມາຮັບໜ້າທີ່ໃໝ່ເປັນເຈົ້າແຂວງອຸດົມໄຊດັ່ງກ່າວ.
