ລາວເຜີຍແຜ່ດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກຳມະການຕ້ານການຄ້າມະນຸດ
ກອງປະຊຸມເຜີຍແຜ່ດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກຳມະການຕ້ານການຄ້າມະນຸດ ແລະ ເອກະສານກ່ຽວຂ້ອງກັບວຽກງານຕ້ານການຄ້າມະນຸດໄດ້ຈັດຂຶ້ນໃນວັນທີ 29 ສິງຫານີ້, ທີ່ສູນຝຶກອົບຮົມ ແລະ ຮ່ວມມືສາກົນ (ICTC), ໂດຍການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທັງເປັນປະທານຄະນະກຳມະການຕ້ານການຄ້າມະນຸດລະດັບຊາດ, ມີຄະນະກຳມະການຕ້ານການຄ້າມະນຸດລະດັບຊາດ, ສະມາຊິກກອງເລຂາຄະນະກຳມະການຕ້ານການຄ້າມະນຸດຈາກບັນດາກະຊວງ ແລະ ທ້ອງຖິ່ນເຂົ້າຮ່ວມ.
ທ່ານພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບ ທັງເປັນຮອງປະທານຄະນະກຳມະການຕ້ານການຄ້າມະນຸດລະດັບຊາດໄດ້ຜ່ານດຳລັດສະບັບເລກທີ 245/ນຍ, ລົງວັນທີ 3 ກໍລະກົດ 2018 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກຳມະການຕ້ານການຄ້າມະນຸດ, ທີ່ໄດ້ກຳນົດທີ່ຕັ້ງ, ພາລະບົດບາດ, ໜ້າທີ່, ຂອບເຂດສິດ, ຫລັກການ, ແບບແຜນວິທີເຮັດວຽກຂອງຄະນະກຳມະການຕ້ານການຄ້າມະນຸດ ເພື່ອເປັນບ່ອນອີງໃຫ້ແກ່ການຈັດຕັ້ງ ແລະ ການເຄື່ອນໄຫວຂອງຄະນະກຳມະການຕ້ານການຄ້າມະນຸດໃຫ້ເປັນລະບົບ, ຖືກຕ້ອງ, ມີປະສິດທິຜົນ ແລະ ປະສິດທິພາບສູງ ແນໃສ່ປົກປ້ອງສິດ ແລະ ຜົນປະໂຫຍດ, ຊີວິດ, ສຸຂະພາບ, ກຽດສັກສີ, ເສລີພາບຂອງພົນລະເມືອງ ແລະ ຮີດຄອງປະເພນີອັນດີງາມຂອງຊາດເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ພ້ອມທັງເຜີຍແຜ່ຄຳສັ່ງແນະນຳການຈັດຕັ້ງຜັນຂະຫຍາຍວຽກງານຕ້ານການຄ້າມະນຸດໃຫ້ມີປະສິດທິຜົນ ແລະ ປະສິດທິພາບ ສະບັບເລກທີ 044/ຄຕມຊ, ລົງວັນທີ 25 ກໍລະກົດ 2018 ເພື່ອຮັບປະກັນໃຫ້ແກ່ການຈັດຕັ້ງຜັນຂະຫຍາຍກົດໝາຍວ່າດ້ວຍການຕ້ານການຄ້າມະນຸດ, ແຜນງານແຫ່ງຊາດວ່າດ້ວຍການສະກັດກັ້ນ ແລະ ຕ້ານການຄ້າມະນຸດ, ດຳລັດວ່າດ້ວຍການຈັດຕັ້ງ ແລະ ເຄື່ອນໄຫວຂອງຄະນະກຳມະການຕ້ານການຄ້າມະນຸດລະດັບຊາດຂອງນາຍົກລັດຖະມົນຕີ ເຂົ້າໃນແຕ່ລະຂະແໜງການນັບທັງສູນກາງ ແລະ ທ້ອງຖິ່ນໃຫ້ກວ້າງຂວາງ, ເລິກເຊິ່ງ, ມີປະສິດທິຜົນ.
ໃນໂອກາດນີ້, ທ່ານ ສອນໄຊ ສີພັນດອນ ໄດ້ມີຄໍາເຫັນວ່າ: ໃນຕໍ່ໜ້າ, ພາກສ່ວນກ່ຽວຂ້ອງນັບທັງສູນກາງ ແລະ ທ້ອງຖິ່ນ ຈົ່ງຮີບຮ້ອນຈັດຕັ້ງຄະນະກຳມະການຕ້ານການຄ້າມະນຸດຂັ້ນແຂວງ, ນະຄອນຫລວງວຽງຈັນ, ຂັ້ນເມືອງເທສະບານ, ນະຄອນ, ພ້ອມທັງກອງເລຂາຂັ້ນຂອງຕົນ ແລະ ບັນດາກະຊວງ, ຂະແໜງການທີ່ກ່ຽວຂ້ອງແຕ່ສູນກາງຮອດທ້ອງຖິ່ນແຕ່ງຕັ້ງພະນັກງານຮັບຜິດຊອບວຽກງານຕ້ານການຄ້າມະນຸດໃຫ້ຮັບປະກັນດ້ານຈຳນວນ ແລະ ຄຸນນະພາບ ເພື່ອໂຄສະນາກສຶກສາອົບຮົມໃຫ້ທົ່ວສັງຄົມເຊື່ອມຊຶມກຳແໜ້ນ, ເຫັນໄດ້ຄວາມໝາຍສຳຄັນ ແລະ ຄວາມອັນຕະລາຍຂອງການຄ້າມະນຸດ, ໂຄສະນາແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຍົກສູງຈິດໃຈຮັກຊາດ, ສະຕິເປັນເຈົ້າຕົນເອງ, ສ້າງ ແລະ ປູກຈິດສຳນຶກໃຫ້ວຽກງານສະກັດກັ້ນ ແລະ ຕ້ານການຄ້າມະນຸດໃຫ້ກາຍເປັນຄວາມຮັບຜິດຊອບຂອງທົ່ວສັງຄົມ, ທຸກຊັ້ນຄົນ, ທຸກເພດ, ທຸກໄວ ແລະ ທຸກອົງການຈັດຕັ້ງຕ້ອງເຂົ້າຮ່ວມຢ່າງຕັ້ງໜ້າ.
