U 16 ລາວ ເສຍໃຫ້ ຢີ່ປຸ່ນ ນັດອຸ່ນເຄື່ອງ
ໃນວັນທີ 27 ສິງຫາຜ່ານມາ ທີ່ປະເທດຢີ່ປຸ່ນ ທີມຊາດຍິງ U 16 ລາວ ລົງສະໜາມເສຍໃຫ້ ອາຄາເດມີ ເຈຟາ 1-5 ໃນການແຂ່ງຂັນນັດອຸ່ນເຄື່ອງຂອງນັກກິລາທີມຊາດລາວ ກ່ອນເຂົ້າຮ່ວມແຂ່ງຂັນຮອບຄັດເລືອກ ເອເອັຟຊີ ທີ່ຈະຈັດຂຶ້ນກາງເດືອນກັນຍານີ້ ທີ່ປະເທດມົງໂກເລຍ ໂດຍທີມຊາດລາວຖືກຈັດຢູ່ ກຸ່ມບີ ຮ່ວມກັບເຈົ້າພາບ.
ທີມຊາດຍິງ U 16 ລາວ ໄດ້ເດີນທາງຝຶກຊ້ອມ ແລະ ລົງສະໜາມອຸ່ນເຄື່ອງກັບບັນດາອາຄາເດມີຕ່າງໆຂອງປະເທດຢີ່ປຸ່ນ ເຊິ່ງໄດ້ລົງສະໜາມອຸ່ນເຄື່ອງຜ່ານມາແລ້ວ 2 ນັດ ໂດຍນັດທໍາອິດສາມາດເອົາສະເໝີທີມ Osaka Kaisei Gakuen High School 1-1 ແລະ ນັດທີ 2 ເສຍໃຫ້ແກ່ທີມອາຄາເດມີ ເຈຟາ 1-5. ນອກຈາກນັ້ນ ຍັງຈະລົງສະໜາມອຸ່ນເຄື່ອງອີກ 1 ນັດ ກ່ອນການເຂົ້າຮ່ວມແຂ່ງຂັນຮອບຄັດເລືອກ ເອເອັຟຊີ ທີ່ປະເທດມົງໂກເລຍ ທີ່ຈະຈັດຂຶ້ນລະຫວ່າງວັນທີ 15-23 ກັນຍານີ້.
ສໍາລັບການແຂ່ງຂັນຮອບຄັດເລືອກ ເອເອັຟຊີ ທີມຊາດລາວຖືກຈັດຢູ່ກຸ່ມບີຮ່ວມກັບເຈົ້າພາບ ເຊິ່ງປະກອບມີ: ມົງໂກເລຍ (ເຈົ້າພາບ), ຮົງກົງ, ອິນເດຍ, ປາກິດສະຖານ.
