ປັນຈັກສີລັດລາວ ຍາດໄດ້ 1 ຫລຽນເງິນ ໃນເອຊຽນເກມ 2018
ນັກກິລາປັນຈັກສີລັດທີມຊາດລາວ ຍາດໄດ້ອີກ 1 ຫລຽນເງິນ ໃຫ້ແກ່ ສປປ ລາວ ໃນງານມະຫາກໍາເອຊຽນເກມ 2018 ທີ່ປະເທດອິນໂດເນເຊຍເປັນເຈົ້າພາບ.
ປັດຈຸບັນ ສປປ ລາວ ມີຢູ່ 2 ຫລຽນເງິນ 2 ຫລຽນທອງ ຈັດຢູ່ອັນດັບທີ 29 ຂອງຕາຕະລາງຫລຽນ, ສໍາລັບຫລຽນເງິນທີ 2 ໄດ້ ຈາກນາງ ອ້ອຍໃຈ ວົງພັກດີ ນັກກິລາປັນຈັກສີລັດ ທີ່ລົງສະໜາມແຂ່ງຂັນໃນປະເພດຕໍ່ສູ້ ລຸ້ນນໍ້າໜັກ 55-60 ກິໂລ ໃນຮອບຊີງຫລຽນຄໍາ ເສຍໃຫ້ເຈົ້າພາບ ໃນວັນທີ 27 ສິງຫາຜ່ານມາ ເຊິ່ງເປັນຫລຽນທີ 3 ຂອງນັກກິລາປັນຈັກສີລັດທີ່ສາມາດຍາດໄດ້ 1 ຫລຽນເງິນ 2 ຫລຽນທອງ ໃນການແຂ່ງຂັນຄັ້ງນີ້.
ການແຂ່ງຂັນຄັ້ງນີ້ມີ 46 ປະເທດເຂົ້າຮ່ວມ ເຊິ່ງມີການຊີງໄຊທັງໝົດ 39 ປະເພດກິລາ, ສ່ວນ ສປປ ລາວ ໄດ້ສົ່ງເຂົ້າຮ່ວມ 19 ປະເພດກິລາຄື: ກະຕໍ້, ວູຊູ, ເທຄວັນໂດ, ຢູໂດ, ປັນຈັກສີລັດ, ຍິງທະນູ, ມວຍສາກົນ, ແລ່ນ-ລານ, ລົດຖີບ, ລອຍນໍ້າ, ກາຣາເຕໂດ ແລະ ຍົກນໍ້າໜັກ ຊອບເທັນນິສ, ປິ່ງປ່ອງ, ບານເຕະຊາຍ, ພາລາກາຍດິ້ງ, ເບສບອນ, ອີ່ສະປອດ ແລະ ຍິງປືນ.
