ອີໂບລາຂ້າຊີວິດຊາວກົງໂກ ໃນພາກຕາເວັນອອກເກີນ 60 ຄົນ
ຈຳນວນຜູ້ເສຍຊີວິດໃນພາກຕາເວັນອອກຂອງສາທາລະນະລັດ ປະຊາທິປະໄຕ ກົງໂກ ຈາກການແຜ່ລະບາດຂອງເຊື້ອໄວຣັສອີໂບລາ ນັບແຕ່ຕົ້ນເດືອນສິງຫານີ້ ເພີ່ມເປັນຫລາຍກວ່າ 60 ຄົນແລ້ວ.
ສຳນັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກຂອງກົງໂກລາຍງານຈຳນວນຜູ້ເສຍຊີວິດຈາກເຊື້ອໄວຣັສອີໂບລາ ເຊິ່ງກັບມາແຜ່ລະບາດໃນແຂວງກິວູເໜືອ ຢູ່ທາງຕາເວັນອອກຂອງປະເທດ ເພີ່ມເປັນຢ່າງໜ້ອຍ 61 ຄົນ ຈາກຈຳນວນຜູ້ປ່ວຍສະສົມ 103 ຄົນ ລະຫວ່າງວັນທີ 1-22 ສິງຫານີ້ ໂດຍ 34 ຄົນໄດ້ຮັບການກວດສອບ ແລະ ຢືນຢັນຈາກຫ້ອງປະຕິບັດການແລ້ວວ່າ: ເປັນການເສຍຊີວິດຈາກເຊື້ອໄວຣັສອີໂບລາ, ສ່ວນອີກ 27 ຄົນທີ່ເຫລືອ “ມີຄວາມເປັນໄປໄດ້ສູງ”.
https://www.facebook.com/WTHR13/videos/2157935427794865/
ສະຖານະການດັ່ງກ່າວຖືເປັນການແຜ່ລະບາດຂອງເຊື້ອໄວຣັສອີໂບລາໃນກົງໂກເປັນຄັ້ງທີ 10 ນັບແຕ່ປີ 1976 ເຊິ່ງເປັນປີທີ່ມີນັກວິທະຍາສາດຄົ້ນພົບເຊື້ອຊະນິດນີ້ເປັນຄັ້ງທຳອິດ ແລະ ຂະໜານນາມຕາມຊື່ຂອງແມ່ນ້ຳອີໂບລາ ທີ່ໄຫລຜ່ານພາກເໜືອຂອງກົງໂກ. ເຖິງຢ່າງໃດກໍຕາມ, ສະຖານະການການແຜ່ລະບາດຂອງເຊື້ອໄວຣັສອີໂບລາໃນແຂວງກິວູເໜືອ ເກີດຂຶ້ນພຽງອາທິດດຽວ ຫລັງອົງການອະນາໄມໂລກ (WHO) ປະກາດການຄວບຄຸມການແຜ່ລະບາດຂອງເຊື້ອພະຍາດຊະນິດດຽວກັນ ໃນແຂວງເອກາເຕີ ຢູ່ທາງຕາເວັນຕົກສຽງເໜືອຂອງປະເທດ ເຊິ່ງແຜ່ລະບາດຢ່າງໜັກໃນເດືອນພຶດສະພາຜ່ານມາ ຂ້າຊີວິດປະຊາຊົນຢ່າງໜ້ອຍ 33 ຄົນ.
ທັງນີ້, ລາຍງານຂອງ WHO ລະບຸອີກວ່າ: ເຊື້ອໄວຣັສອີໂບລາ ເຊິ່ງແຜ່ລະບາດທີ່ກົງໂກໃນຄັ້ງນີ້ ຍັງເປັນສາຍພັນດຽວກັບທີ່ເຄີຍແຜ່ລະບາດໃນຫລາຍປະເທດທາງຕາເວັນຕົກຂອງທະວີບອາຟຣິກາ ລະຫວ່າງປີ 2013-2015 ເຊິ່ງເປັນເຫດໃຫ້ມີຜູ້ເສຍຊີວິດຢ່າງໜ້ອຍ 11.300 ຄົນ ແລະ ບໍ່ສະບາຍອີກປະມານ 28.600 ຄົນ.
