ແລ່ນ-ລານລາວ ເດີນທາງເຂົ້າຮ່ວມ ເອຊຽນເກມ ຄັ້ງທີ 18
ໃນວັນທີ 23 ສິງຫາ ທີ່ສະໜາມບິນວັດໄຕ ນະຄອນຫລວງວຽງຈັນ ນັກກິລາທີມຊາດແລ່ນ-ລານລາວ ໄດ້ເດີນທາງເຂົ້າຮ່ວມການແຂ່ງຂັນງານມະຫາກໍາກິລາເອຊຽນເກມ ຄັ້ງທີ 18 ທີ່ປະເທດອິນໂດເນເຊຍ ທີ່ຈັດຂຶ້ນລະຫວ່າງວັນທີ 10 ສິງຫາ – 1 ກັນຍານີ້.
ທ່ານ ສິດທິໄຊ ສັກປະເສີດ ເຂລາສະຫະພັນແລ່ນ-ລານແຫ່ງຊາດລາວ ທັງເປັນຄະນະນໍາຄູຝຶກນໍາພານັກກິລາເຂົ້າຮ່ວມການແຂ່ງຂັນງານມະຫາກໍາເອຊຽນເກມ ຄັ້ງທີ 18 ນີ້ ໃຫ້ສໍາພາດວ່າ: ການແຂ່ງຂັນຄັ້ງນີ້ ພວກເຮົາໄດ້ສົ່ງນັກກິລາເຂົ້າຮ່ວມທັງໝົດ 4 ຄົນຄື: ນາງ ສີລີນາ ພະອາໄພ ແລະ ທ້າວ ອັກສອນສາດ ລາດຊະວົງ ເຂົ້າຮ່ວມ 2 ລາຍການແລ່ນ 100 ແມັດ ແລະ 200 ແມັດ, ສ່ວນທ້າວ ອານຸສອນ ໄຊສາ ເຂົ້າຮ່ວມລາຍການດຽວ ແລ່ນ 110 ແມັດຂ້າມຮ້າວ, ຂະນະທີ່ ນາງ ລົດແກ້ວ ອິນທະກຸມມານ ເຂົ້າຮ່ວມ 2 ລາຍການ ແລ່ນ 800 ແລະ 1.500 ແມັດ.
ທ້າວ ສິດທິໄຊ ສັກປະເສີດ ຍັງກ່າວວ່າ: ການເຂົ້າຮ່ວມຄັ້ງນີ້ ພວກເຮົາໄດ້ຕັ້ງຄວາມຫວັງທຸກລາຍການ ເພາະວ່າມີຄວາມໝັ້ນໃຈຂອງຕົນເອງຫລາຍພໍສົມຄວນ ໂດຍສະເພາະນາງ ລົດແກ້ວ ອິນທະກຸມມານ ນັກກິລາທີ່ເຄີຍຍາດໄດ້ລາງວັນຫລາຍລາຍການທັງພາຍໃນ ແລະ ພາກພື້ນ.
