ກະຕໍ້ຊາຍທີມຊາດລາວ ລົງສະໜາມພົບ ມຽນມາ ມື້ອື່ນ
ນັກກິລາກະຕໍ້ຊາຍທີມຊາດລາວ ລົງສະໜາມຄັ້ງທໍາອິດພົບກັບ ທີມຊາດມຽນມາ ໃນວັນທີ 23 ສິງຫາ 2018 ເວລາ 15:00 ໂມງ ຂອງການແຂ່ງຂັນງານມະຫາກໍາເອຊຽນເກມ ຄັ້ງທີ 18 ທີ່ປະເທດອິນໂດເນເຊຍເປັນເຈົ້າພາບ ຈັດຂຶ້ນລະຫວ່າງວັນທີ 10 ສິງຫາ – 1 ກັນຍາ.
ຕາມການໃຫ້ສໍາພາດຂອງທ່ານ ສົມໃຈ ແກ້ວປະເສີດ ຄະນະຄູຝຶກນັກກິລາກະຕໍ້ຊາຍທີມຊາດລາວ ວ່າ: ການເຂົ້າຮ່ວມງານມະຫາກໍາເອຊຽນເກມຄັ້ງທີ 18 ທີ່ປະເທດອິນໂດເນເຊຍເປັນເຈົ້າພາບນີ້ ຄະນະສະຫະພັນກິລາແຫ່ງຊາດລາວ ໄດ້ສົ່ງນັກກິລາທີມຊາດເຂົ້າຮ່ວມທັງໝົດ 31 ຄົນ, ຍິງ 11 ຄົນ, ໃນນັ້ນ ເຂົ້າຮ່ວມ 4 ລາຍການ, ຍິງ 2 ລາຍການຄື: ທີມ 4 ຄົນ, ທີມຊຸດ. ສໍາລັບກະຕໍ້ຊາຍທີມຊາດລາວ ຖືກຈັດຢູ່ໃນກຸ່ມບີໃນລາຍທີມຊຸດ ເຊິ່ງປະກອບມີ ໄທ, ມຽນມາ ເຊິ່ງຈະລົງສະໜາມມື້ນີ້ ພົບກັບ ມຽນມາ. ສ່ວນລາຍການທີມ 4 ຄົນ ຖືກຈັດຢູ່ກຸ່ມບີ ເຊັ່ນດຽວກັນ ຮ່ວມກັບເຈົ້າພາບອິນໂດເນເຊຍ, ຢີ່ປຸ່ນ, ມຽນມາ, ຈີນ ເຊິ່ງລາຍການນີ້ຈະເລີ່ມແຂ່ງຂັນວັນທີ 26 ສິງຫານີ້.
ການແຂ່ງຂັນຄັ້ງນີ້ມີ 46 ປະເທດເຂົ້າຮ່ວມ ເຊິ່ງມີການຊີງໄຊທັງໝົດ 39 ປະເພດກິລາ, ສ່ວນ ສປປ ລາວ ໄດ້ສົ່ງເຂົ້າຮ່ວມ 19 ປະເພດກິລາຄື: ກະຕໍ້, ວູຊູ, ເທຄວັນໂດ, ຢູໂດ, ປັນຈັກສີລັດ, ຍິງທະນູ, ມວຍສາກົນ, ແລ່ນ-ລານ, ລົດຖີບ, ລອຍນໍ້າ, ກາຣາເຕໂດ ແລະ ຍົກນໍ້າໜັກ ຊອບເທັນນິສ, ປິ່ງປ່ອງ, ບານເຕະຊາຍ, ພາລາກາຍດິ້ງ, ເບສບອນ, ອີ່ສະປອດ ແລະ ຍິງປືນ.
