ວີເອອາຣ໌ ຖືກໃຊ້ຮອບ 8 ທີມ ຖ້ວຍຢູຟາ ແຊມປ້ຽນລີກ
ມີການເປີດເຜີຍອອກມາວ່າ: ເຕັກໂນໂລຊີວີດີໂອຊ່ວຍຕັດສິນ (ວີເອອາຣ໌) ອາດຖືກນຳມາໃຊ້ແຕ່ຮອບກ່ອນຮອງຊະນະເລີດ ຂອງ ຢູຟາ ແຊມປ້ຽນລີກ ລະດູການນີ້, ຫລັງຈາກປະສົບຜົນສຳເລັດຢ່າງດີໃນບານໂລກ 2018 ຜ່ານມາ.
ຢູຟາ ກັງວົນເລື່ອງກຳລັງຄົນບໍ່ພຽງພໍກັບການໃຊ້ ວີເອອາຣ໌ ນັບແຕ່ຮອບທຳອິດ, ແຕ່ຖ້ານຳມາໃຊ້ແຕ່ຮອບ 8 ທີມສຸດທ້າຍ ສາມາດແນ່ໃຈວ່າຈະຄວບຄຸມການຕັດສິນເປັນໄປຢ່າງມີປະສິດທິພາບຫລາຍທີ່ສຸດ ໂດຍຄາດວ່າຈະມີການຕັດສິນຂັ້ນສຸດທ້າຍໃນກອງປະຊຸມຄະນະກຳມະການຢູຟາ ພາຍໃນເດືອນນີ້.
ສ່ວນການແຂ່ງຂັນຢູຟາ ແຊມປ້ຽນລີກ ຮອບເພລອັອຟ ນັດທຳອິດ ເບນຟິກາ ເປີດບ້ານເຮັດໄດ້ພຽງສະເໝີ ພີເອໂຄ 1-1 ເປັນຂ່າວດີຂອງ ລີເວີພູລ ເນື່ອງຈາກຖ້າ ເບນຟິກາ ເຂົ້າຮອບ ລີເວີພູລ ຈະຢູ່ໃນໂຖ 3 ຂອງການຈັບສະຫລາກ, ແຕ່ຖ້າ ເບນຟິກາ ຕົກຮອບແລ້ວ ລີເວີພູລ ຈະເຂົ້າໄປຢູ່ໃນໂຖ 2 ຮ່ວມກັບ ແມນເຊັສເຕີ ຢູໄນເຕັດ ແລະ ສະເປີ ບໍ່ຕ້ອງພົບກັບ ນາໂປລີ, ດອດມຸນ, ໂຣມາ ແລະ ຊັດຕາ ໂດເນດ ໃນຮອບແບ່ງກຸ່ມ.
