ມາເລເຊຍຢຶດໜໍໍ່ແຮດມູນຄ່າ 11,7 ລ້ານໂດລາ ຫລາຍເປັນປະຫວັດສາດ
ມາເລເຊຍເປີດເຜີຍວ່າ: ຢຶດໜໍ່ແຮດມູນຄ່າເກືອບ 12 ລ້ານໂດລາສະຫະລັດ ທີ່ຈະສົ່ງໄປຫວຽດນາມ, ເປັນການຢຶດໜໍ່ແຮດໄດ້ຫລາຍທີ່ສຸດເທົ່າທີ່ເຄີຍມີມາ.
ອະທິບໍດີກົມຄຸ້ມຄອງສັດປ່າ ແລະ ອຸທະຍານແຫ່ງຊາດ ຖະແຫລງວ່າ: ເຈົ້າໜ້າທີ່ໄດ້ຮັບເບາະແສນຳໄປສູ່ການຢຶດໜໍ່ແຮດ 50 ໜໍ່ ນ້ຳໜັກ 116 ກິໂລ ທີ່ສາງສິນຄ້າສະໜາມບິນກົວລາລຳເປີ ໃນວັນທີ 13 ສິງຫາ. ນອກຈາກນີ້ ຍັງພົບຊາກສັດ 9 ຊາກທີ່ຄາດວ່າເປັນເສືອ ແລະ ໝີ ນ້ຳໜັກ 200 ກິໂລ ເຊິ່ງຈະກວດສອບດີເອັນເອຂອງກາງທີ່ຢຶດໄດ້ທຸກຊິ້ນສ່ວນ.
ອະທິບໍດີເປີດເຜີຍອີກວ່າ: ຂອງກາງທັງໝົດມີມູນຄ່າປະມານ 48 ລ້ານຣິງກິດ ກຽມຖືກສົ່ງອອກນອກປະເທດ ໂດຍບໍ່ມີໃບອະນຸຍາດທີ່ຖືກຕ້ອງ. ສັນນິຖານວ່າຕົ້ນທາງມາຈາກອາຟຣິກາ, ສ່ວນຈຸດໝາຍຢູ່ນະຄອນຫລວງຮ່າໂນ້ຍຂອງຫວຽດນາມ. ເອກະສານທີ່ພົບລ້ວນເປັນເອກະສານປອມ, ເຈົ້າໜ້າທີ່ຈະສືບຫາເຈົ້າຂອງທີ່ແທ້ຈິງຕໍ່ໄປ. ຜູ້ຊ່ຽວຊານລະບຸວ່າ: ມາເລເຊຍໄດ້ກາຍເປັນຈຸດທີ່ແກ້ງລັກລອບຄ້າຂາຍສັດປ່າໃກ້ສູນພັນປ່ຽນຖ່າຍຕໍ່ໄປປະເທດຕ່າງໆໃນອາຊີ.
