ການຖະແຫລງຂ່າວຄວາມຄືບໜ້າພາກສະໜາມຟື້ນຟູແລະ ແກ້ໄຂໄພພິບັດຢູ່ເມືອງສະໜາມໄຊຈະປ່ຽນເປັນ 3 ມື້ຕໍ່ຄັ້ງ
ອະນຸກຳມະການສຶກສາອົບຮົມ, ນະໂຍບາຍ ແລະ ຂໍ້ມູນຂ່າວສານຂອງຄະນະພາກສະໜາມຟື້ນຟູ ແລະ ແກ້ໄຂໄພພິບັດຢູ່ເມືອງສະໜາມໄຊ ແຂວງອັດຕະປື ໃຫ້ຮູ້ວ່າ: ຄະນະດັ່ງກ່າວເຫັນດີເປັນເອກະພາບດັດປັບການຖະແຫລງຄວາມຄືບໜ້າຂອງການຟື້ນຟູ ແລະ ແກ້ໄຂໄພພິບັດດັ່ງກ່າວຈາກມື້ລະຄັ້ງມາເປັນ 3 ມື້ຕໍ່ຄັ້ງ ແລະ ຈະເລີ່ມປະຕິບັດແຕ່ວັນທີ 21 ສິງຫານີ້ເປັນຕົ້ນໄປ.
ຄະນະດັ່ງກ່າວ ໃຫ້ຮູ້ວ່າ: ສໍາລັບພາລະກິດການຄົ້ນຫາຜູ້ຫາຍສາບສູນ ແລະ ຜູ້ເສຍຊີວິດຈາກໄພນ້ຳຖ້ວມຄັ້ງນີ້ແມ່ນໄດ້ສືບຕໍ່ປະຕິບັດແລ້ວ, ພາຍຫລັງຢຸດຊົ່ວຄາວຫລາຍວັນ, ຍ້ອນມີສະພາບນ້ຳຖ້ວມເປັນຄັ້ງທີ 2 ແລະ ພາຍຫລັງນ້ຳບົກແຫ້ງລົງເປັນປົກກະຕິ ກໍາລັງທະຫານກໍສືບຕໍ່ການຄົ້ນຫາຄືນໃໝ່. ປັດຈຸບັນຕົວເລກຜູ້ເສຍຊີວິດແມ່ນມີ 39 ສົບ (ຍິງ 19 ສົບ) ແລະ ຍັງມີຜູ້ສູນຫາຍອີກ 97 ຄົນ. ສຳລັບແຜນວຽກໃນຕໍ່ໜ້ານີ້ແມ່ນສືບຕໍ່ເລັ່ງຈັດສັນ ແລະ ປຸກສ້າງທີ່ຢູ່ອາໄສຊົ່ວຄາວຕາມຈຸດກຳນົດໄວ້, ວາງແຜນສ້ອມແປງ ແລະ ກໍ່ສ້າງຂົວ-ທາງ, ເບີກຈ່າຍເຂົ້າສານອາຫານແຫ້ງ ແລະ ເຄື່ອງໃຊ້ທີ່ຈຳເປັນຕ່າງໆໃຫ້ຜູ້ປະສົບໄພ, ພ້ອມທັງອອກບັດ, ແຈກຢາຍເງິນແຮເບື້ອງຕົ້ນໃຫ້ຜູ້ປະສົບໄພໃຫ້ຄົບຖ້ວນ ແລະ ທົ່ວເຖິງ ແລະ ສືບຕໍ່ຊອກຄົ້ນຜູ້ສູນຫາຍໃຫ້ພົບເຫັນໂດຍໄວ.
