ສານປະທານອົງການກາແດງລະນຶກວັນກາແດງສາກົນຄົບຮອບ 154 ປີ
ເນື່ອງໃນໂອກາດວັນກາແດງສາກົນຄົບຮອບ 154 ປີ (8 ພຶດສະພາ 1863 – 8 ພຶດສະພາ 2017)ທ່ານປະທານ ອົງການກາແດງລາວ ຄໍາຮຸ່ງ ເຮືອງວົງສີ ໄດ້ອ່ານສານລະນຶກວັນສໍາຄັນ ດັ່ງກ່າວວ່າ: ຍ້ອນຄືນໄປໃນວັນທີ 24 ມິຖຸນາ 1859 ທ່ານ ອັງ ຣີດູນັງ (HENRY Dunant) ຊຶ່ງເປັນນັກທຸລະກິດຊາວສະວິດ ໄດ້ເດີນທາງໄປຜ່ານທົ່ງໂຊນ ເຟຣີໂນ (ພາກເໜືອຂອງປະເທດ ອີຕາລີ) ເພື່ອເຂົ້າຢ້ຽມຂໍ່ານັບ ກະ ສັດນາໂປລີອົງ III .ໃນຂະນະນັ້ນ ໄດ້ເກີດ ສົງຄາມລະຫວ່າງໂອ ຕຣິດ ແລະ ຝຣັ່ງຢູ່ເຂດນັ້ນ ແລະ ເຮັດໃຫ້ມີຜູ້ບາດເຈັບລົ້ມຕາຍ ຫລາຍກວ່າ 40 ພັນຄົນ, ຜູ້ບາດເຈັບກໍບໍ່ໄດ້ຮັບການປິ່ນປົວເບິ່ງ ແຍງແຕ່ຢ່າງໃດ. ຈາກເຫດການ ທີ່ສະເທືອນຂວັນດັ່ງກ່າວໄດ້ເຮັດໃຫ້ທ່ານ ອັງຣີ ດູຍນັງ ຕັດສີນໃຈເຂົ້າໄປໃຫ້ການຊ່ວຍເຫລືອ ຮີບດ່ວນ, ໂດຍນໍາໃຊ້ໂບດທີ່ຢູ່ໃກ້ ເຂດຕໍ່ສູ້ເປັນບ່ອນປະຖົມ ພະຍາບານ ແລະ ຈັດມ້ຽນຊາກສົບຜູ້ ເສຍຊີວິດ, ໂດຍມີແມ່ຍິງ ແລະ ຜູ້ເຖົ້າຢູ່ບ້ານໃກ້ຄຽງມາຊ່ວຍ ເຫລືອທ່ານ ໃນການເບິ່ງແຍງຄົນເຈັບ, ຈາກນັ້ນທ່ານໄດ້ກັບຄືນ ປະ ເທດຂອງຕົນ ແລະ ຂຽນປຶ້ມຫົວ ໜຶ່ງຊື່ວ່າ: ຄວາມຊົງ ຈຳແຫ່ງ ເມືອງ ໂຊນເຟຣີໂນ. ທ່ານໄດ້ເລົ່າເຫດການທີ່ພົບເຫັນ ແລະ ສະເໜີ ສອງແນວຄິດຄື: ທຸກປະເທດຕ້ອງ ມີອາສາສະໝັກເພື່ອໄປຊ່ວຍເວ ລາມີຂໍ້ຂັດແຍ່ງ ແລະ ທຸກປະເທດຕ້ອງຮັບຜິດຊອບຕໍ່ທະຫານຂອງຕົນ. ແນວຄວາມຄິດດັ່ງກ່າວ ໄດ້ ຮັບຄວາມນິຍົມຫລາຍຈາກມວນຊົນໃນທົ່ວໂລກຈົນກ້າວໄປເຖິງ ການກໍ່ຕັ້ງຄະນະ ກຳມະການກາແດງສາກົນຂຶ້ນໃນອີກ 3 ປີຕໍ່ມາຄື: ວັນທີ 23 ຕຸລາ 1863 ແລະ ເພື່ອເປັນກຽດແກ່ທ່ານ ອັງຣີດູນັງ ເພິ່ນຈຶ່ງກຳນົດເອົາວັນທີ 8 ພຶດສະພາຂອງທຸກໆ ປີເປັນວັນກາແດງໂລກ (World Red Coss Day) ແລະ ປີນີ້ມີຫລາຍປະເທດທົ່ວໂລກ, ພ້ອມດ້ວຍອາສາສະໝັກຫລາຍສິບລ້ານຄົນພາກັນສະເຫລີມສະຫລອງ ວັນກາແດງວັນດັ່ງກ່າວ ພາຍໃຕ້ຄຳຂວັນ: “ກາແດງເພື່ອ ໝົດທຸກຄົນ Every where for Every One” ຢ່າງມີຄວາມໝາຍສໍາຄັນ.
ປັດຈຸບັນ, ເຖິງວ່າສົງຄາມ ຈະສິ້ນສຸດລົງແລ້ວ, ແຕ່ມັນ ກໍຍັງ ເກີດມີໄພພິບັດທາງທຳມະຊາດທີ່ນັບມື້ຖີ່ ແລະ ຮ້າຍແຮງຂຶ້ນ ໂດຍບໍ່ມີໃຜສາມາດຄວບຄຸມມັນໄດ້, ເມື່ອເກີດຂຶ້ນແລ້ວມັນ ໄດ້ ສ້າງຄວາມສູນເສຍອັນໃຫຍ່ ຫລວງໃຫ້ກັບຊີວິດ, ຊັບສິນຂອງ ມວນມະນຸດ ແລະ ສັງຄົມຕ້ອງ ມີສ່ວນຮ່ວມໃນການຊ່ວຍເຫລືອຜູ້ທີ່ເຄາະຮ້າຍ. ອົງການກາແດງເປັນອົງການນຳໜ້າດ້ານມະນຸດສະທຳໄດ້ເປັນເຈົ້າການໃນການປຸກລະດົມສັງຄົມບໍ່ວ່າຈະເປັນ ອາສາສະໝັກ,ວັດຖຸປັດໄຈສິ່ງ ຂອງຕ່າງໆເຂົ້າໄປຊ່ວຍເຫລືອ ຜູ້ໄດ້ຮັບຜົນກະທົບດັງກ່າວໃນທົ່ວໂລກ.
ອົງການກາແດງລາວໃນນາມສະມາຊິກຂອງຂະບວນ ການກາແດງສາກົນໄດ້ປະກອບສ່ວນເຂົ້າໃນວຽກງານມະນຸດ ສະ ທຳຕາມ 7 ຫລັກການຢ່າງຕັ້ງໜ້າ, ເຊິ່ງໃນປີຜ່ານມາພະນັກ ງານ, ອາສາສະໝັກຂອງອົງການກາແດງລາວ ໄດ້ຕັ້ງໜ້າ ເຄື່ອນໄຫວຮັບໃຊ້ວຽກງານມະນຸດສະທຳຢ່າງກວ້າງຂວາງ ແລະ ມີຜົນງານພົ້ນເດັ່ນຄື: ສາມາດຮັບ ບໍລິຈາກເລືອດໄດ້ທັງ ໝົດ 40.454 ຖົງ (ລື່ນຄາດ ໝາຍ 38.000 ຖົງ), ສາມາດ ຊ່ວຍ ຊີວິດຄົນໄດ້ຫລາຍກວ່າ 30 ພັນຄົນ,ຊ່ວຍເຫລືອບັນເທົາ ທຸກຜູ້ໄດ້ຮັບຜົນກະທົບຈາກໄພພິບັດທໍາມະຊາດມີຈໍານວນ 7 ແຂວງ 11 ເມືອງ, 24 ບ້ານ, 935 ຄອບຄົວ, ພິເສດແມ່ນໄດ້ ຊ່ວຍ 23 ບ້ານໃນ 2 ເມືອງຂອງ ແຂວງ ອຸດົມໄຊມີຈໍານວນ 888 ຄອບຄົວ, ລວມມີມູນຄ່າຫລາຍກວ່າ 1 ຕື້ກີບ ແລະ ຕ້ານໄພໜາວທາງພາກເໜືອຈຳນວນໜຶ່ງ, ສາມາດ ອອກຊວ່ຍປະຖົມພະຍາບານຄົນເຈັບເກີດອຸປະຕິເຫດຕ່າງໆຄື: ວຽກງານອົບຮົມປະຖົມພະຍາບານອອກຊ່ວຍ ເຫລືອ 1.128 ຄັ້ງ ແລະ ສາມາດລະດົມແຫລ່ງທຶນຈາກການຈັດຕັ້ງຕ່າງໆທັງພາຍໃນ ແລະ ຕ່າງປະເທດໄດ້ຫລາຍ ກວ່າ 4 ຕື້ກີບ ແລະ ນັບເປັນຄັ້ງປະຫວັດສາດຂອງ ອົງການກາແດງລາວທີ່ໄດ້ຕ້ອນຮັບປະ ທານສະຫະພັນກາແດງ ແລະ ຊີກວົງເດືອນແດງສາກົນ (IFRC), ເຂົ້າຮ່ວມສະຫລອງ ວັນກາແດງຫວຽດນາມຄົບຮອບ 70 ປີ, ມອບຫລຽນ ໄຊພັດທະນາຊັ້ນສອງໃຫ້ແກ່ປະທານກາແດງເດັນມາກ ແລະ ອື່ນໆ.
ໃນຕໍ່ໜ້າອົງການກາແດງລາວຈະສືບຕໍ່ປັບປຸງລະບົບສາງ,ພາລາທິການເພື່ອຮອງຮັບການ ບໍລິການຊ່ວຍເຫລືອ ບັນເທົາທຸກປະຊາຊົນບັນດາເຜົ່າເວລາເຂົາ ເຈົ້າໄດ້ຮັບຜົນກະທົບຈາກໄພພິບັດຕ່າງໆໃຫ້ທັນສະພາບການ, ສືບ ຕໍ່ວຽກງານບໍລິການເລືອດໃຫ້ປອດໄພ, ພຽງພໍ ແລະ ທັນເວລາ, ພ້ອມຕັ້ງໜ້າອົບຮົມ ການຫ້າງຫາກະກຽມ ຕອບໂຕ້ ໄພພິບັດໃຫ້ຊຸມຊົນທີ່ມີຄວາມສ່ຽງສູງ, ສືບຕໍ່ກໍ່ສ້າງສູນກູ້ໄພອົງການກາແດງລາວ, ສົ່ງເສີມສຸຂະພາບ ຂອງປະຊາຊົນບັນດາເຜົ່າໂດຍສະເພາະຜູ້ຢູ່ເຂດຫ່າງໄກສອກຫລີກໃຫ້ມີໂອກາດເຂົ້າເຖິງນ້ຳສະອາດ ແລະ ສຸຂະພິ ບານ, ສ້າງອາສາສະໝັກໃຫ້ຫລາຍຂຶ້ນເພື່ອບໍລິການວຽກງານນະນຸດສະທຳ, ສືບຕໍ່ສ້າງສູນຝຶກອົບຮົມເພື່ອສ້າງ ຂີດ ຄວາມສາມາດໃຫ້ແກ່ພະນັກງານກາແດງໃຫ້ສອດຄ່ອງກັບສະພາບການ, ສືບທາວຫາຍາດ ພີ່ນ້ອງທີ່ພັດພາກ ຈາກກັນ ແລະ ລະດົມແຫລ່ງທຶນໃຫ້ການຊ່ວຍເຫລືອຜູ້ທຸກຍາກໃຫ້ສົມກັບວ່າ ອົງການກາແດງລາວເປັນອົງ ການຈັດຕັ້ງທີ່ນຳໜ້າດ້ານມະນຸດສະທຳຂອງ ສປປ ລາວ.
