ລາວເຜີຍແຜ່ນິຕິກຳສໍາຄັນຫລາຍສະບັບ
ໃນວັນທີ 16-17 ສິງຫານີ້, ທີ່ສູນຝຶກອົບຮົມ ແລະ ການຮ່ວມມືສາກົນຫລັກ 5 (ICTC) ກະຊວງການຕ່າງປະເທດ, ໄດ້ຈັດເຜີຍແຜ່ນິຕິກຳສໍາຄັນຫລາຍສະບັບຂອງ ສປປ ລາວ ໂດຍການເປັນປະທານຂອງທ່ານນາງ ຄໍາເພົາ ເອີນທະວັນ ຮອງລັດຖະມົນຕີກະຊວງການຕ່າງປະເທດ, ມີຜູ້ຕາງໜ້າຈາກກະຊວງ, ອົງການທຽບເທົ່າ ແລະ ອົງການຈັດຕັ້ງຂັ້ນສູນກາງທີ່ກ່ຽວຂ້ອງເຂົ້າຮ່ວມ ແລະ ນິຕິກໍາທີ່ເຜີຍແຜ່ຄັ້ງນີ້ປະກອບມີ: ກົດໝາຍວ່າດ້ວຍສົນທິສັນຍາ ແລະ ສັນຍາສາກົນ, ກົດໝາຍວ່າດ້ວຍ ການເຂົ້າ-ອອກ ແລະ ຄຸ້ມຄອງຄົນຕ່າງປະເທດຢູ່ ສປປ ລາວ ແລະ ດຳລັດວ່າດ້ວຍ ການປະສານງານລະຫວ່າງບັນດາກະຊວງ, ອົງການທຽບເທົ່າກະຊວງ, ແຂວງ, ນະຄອນຫລວງກັບສຳນັກງານນາຍົກລັດຖະມົນຕີ, ເພື່ອເຮັດໃຫ້ຜູ້ເຂົ້າຮ່ວມເຂົ້າໃຈ ແລະ ສາມາດນຳໄປໝູນໃຊ້ໃຫ້ຖືກຕ້ອງແທດເໝາະກັບຕົວຈິງ, ໂດຍສະເພາະແມ່ນກົດໝາຍວ່າດ້ວຍສົນທິສັນຍາ ແລະ ສັນຍາສາກົນ ທີ່ມີຄວາມສຳຄັນໃນການຂົງວຽກງານການຕ່າງປະເທດ ລວມທັງວຽກງານສົນທິສັນຍາ ແລະ ສັນຍາສາກົນ ແນໃສ່ເພີ່ມທະວີການຄຸ້ມຄອງລັດດ້ວຍກົດໝາຍເຂັ້ມແຂງຂຶ້ນເທື່ອລະກ້າວ.
