ປະກາດແຕ່ງຕັ້ງທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວຄົນໃໝ່

ພິທີປະກາດແຕ່ງຕັ້ງທ່ານ ບົວຄົງ ນາມມະວົງ ກໍາມະການສໍາຮອງສູນກາງພັກ, ຮອງເລຂາຄະນະບໍລິຫານພັກແຂວງ, ຮອງເຈົ້າແຂວງຫລວງພະບາງ ໄປຮັບໜ້າທີ່ໃໝ່ເປັນເຈົ້າແຂວງບໍ່ແກ້ວຄົນໃໝ່, ໄດ້ຈັດຂຶ້ນໃນວັນທີ 14 ສິງຫານີ້ຢູ່ຫ້ອງວ່າການແຂວງຫລວງພະບາງ, ໂດຍການເຂົ້າຮ່ວມຂອງທ່ານ ຈັນສີ ໂພສີຄໍາ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ແລະ ມີການນໍາຂັ້ນສູນກາງ ແລະ ແຂວງເຂົ້າຮ່ວມຢ່າງພ້ອມພຽງ ເພື່ອປະຕິບັດຕາມມະຕິຕົກລົງຂອງກໍາມະການກົມການເມືອງສູນກາງພັກ. ໃນໂອກາດນີ້, ທ່ານ ຈັນສີ ໂພສີຄໍາ ໄດ້ໂອ້ລົມຕໍ່ພິທີວ່າ: ການປະກາດແຕ່ງຕັ້ງຄັ້ງນີ້, ແມ່ນປະຕິບັດຕາມຊັບຊ້ອນພະນັກງານນຳພາຄຸ້ມຄອງຂັ້ນສູນກາງ ແລະ ເປັນການປັບປຸງການຈັດຕັ້ງໃຫ້ຖືກຕ້ອງຕາມໜ້າທີ່ການເມືອງໄລຍະໃໝ່, ພ້ອມເນັ້ນໃຫ້ຜູ້ທີ່ໄດ້ຮັບແຕ່ງຕັ້ງໃໝ່ຈົ່ງຕັ້ງໜ້າປະຕິບັດໜ້າທີ່ວຽກງານໄດ້ຮັບມອບໝາຍໃຫ້ປະສົບຜົນສຳເລັດກວ່າເກົ່າ.