ນຳສະເໜີການພັດທະນາຄວາມກ້າວໜ້າຫຼ້າສຸດດ້ານ Fintech
ໃນວັນທີ 14 ສິງຫາ ນີ້, ບໍລິສັດ EY ຮ່ວມກັບ ສະມາຄົມທະນາຄານລາວ ໄດ້ຈັດສໍາມະນາ ແລະ ນໍາສະເໜີການັດທະນາຄວາມກ້າວໜ້າຫຼ້າສຸດ ນະວັດຕະກໍາດ້ານການເງິນ Fintech ຂອງປະເທດສິງກະໂປ, ໂດຍການເປັນປະທານຂອງທ່ານ ພູຂົງ ຈັນທະຈັກ ປະທານສະມາຄົມທະນາຄານລາວ, ມີທ່ານ ໂດມີນິກ (Dominic) ເອກອັກຄະລັດຖະທູດ ສິງກະໂປ ປະຈໍາລາວ, ທ່ານ Roy Teo ຜູ້ອໍານວຍການ ຂະແໜງພັດທະນາການເງິນ ແລະນະວັດຕະກຳ ທະນາຄານກາງ ສິງກະໂປ, ມີທີ່ປືກສາບໍລິຫານດ້ານການເງິນ ບໍລິສັດ EY ແລະ ບັນດາຫົວໜ້າກົມ, ຕາງໜ້າຈາກອົງການຈັດຕັ້ງລັດເຂົ້າຮ່ວມ.
ການຈັດງານໃນຄັ້ງນີ້ ສືບເນື່ອງມາຈາກຜົນສໍາເລັດຂອງກອງປະຊຸມສຳມະນານະວັດຕະກຳດ້ານການເງິນ ແລະການເຊື່ອມໂຍງປະຊາຄົມເສດຖະກິດອາຊຽນ ຊຶ່ງເປັນໂອກາດດີ ທີ່ທະນາຄານກາງຂອງປະເທດສິງກະໂປ ໄດ້ນຳສະເໜີກ່ຽວກັບງານ ບຸນມະໂຫລານນະວັດຕະກຳດ້ານການເງິນປະເທດຕົນເອງ ເຊິ່ງໃນປີນີ້ ແມ່ນຈະຈັດຂຶ້ນໃນວັນທີ 12-16 ພະຈິກ ທີ່ສິງກະໂປ.
ສະມາຄົມທະນາຄານລາວ ເຫັນວ່າການພັດທະນານະວັດຕະກຳດ້ານການເງິນລາວ ກໍ່ເລີ່ມມີການພັດທະນາຂຶ້ນເທື່ອລະກ້າວ ໂດຍສະເພາະແມ່ນພາຍຫຼັງທີ່ ສປປ ລາວ ມີການປັບປຸງນິຕິກຳ, ກົດໝາຍ ເຊັ່ນ: ກົດໝາຍວ່າດ້ວຍການຊຳລະສະສາງ ເຊິ່ງໄດ້ກາຍເປັນເງື່ອນໄຂໃຫ້ບັນດາທະນາຄານທຸລະກິດ, ບໍລິສັດທີ່ໃຫ້ບໍລິການພັດທະນາລະບົບການຊຳລະສະສາງ ມີການພັດທະນາລະບົບທີ່ອຳນວຍຄວາມສະດວກໃນການຊຳລະສະສາງ ທີ່ມີຄວາມໂປ່ງໃສ່ ແລະປະຕິບັດຖືກຕ້ອງຕາມລະບຽບການຂອງລາວ. ແຕ່ເຖິງຢ່າງໃດກໍ່ຕາມ, ບັນດາບໍລິສັດດຳເນີນທຸລະກິດໃໝ່ ຫຼື Start Up ກໍ່ເປັນພາກສ່ວນສຳຄັນໃນການພັດທະນາລະບົບດ້ານການເງິນ ແຕ່ຄວາມເຂົ້າໃຈໃນການພັດທະນາ ແລະ ນຳໃຊ້ເຂົ້າໃນການຊຳລະສະສາງ ຍັງຕ້ອງອີງໃສ່ຄວາມອາດສາມາດຂອງຫົວໜ່ວຍທຸລະກິດໃນການນຳໃຊ້. ດັ່ງນັ້ນ, ການສໍາມະນານີ້ ທະນາຄານກາງແຫ່ງ ປະເທດສິງກະໂປ ແລະ ຊ່ຽວຊານດ້ານນະວັດຕະກຳການເງິນໄດ້ນຳສະເໜີກ່ຽວກັບຄວາມເປັນມາຂອງການພັດທະນານະວັດຕະກຳດ້ານການເງິນຂອງສິງກະໂປ, ການເຊື່ອມໂຍງຖານການບໍລິການດ້ານການເງິນໃນພາກພື້ນ ແລະ ສາກົນ.
