ສຕລ ຍົກລະດັບກຳມະການຕັດສິນ ລະດັບ ກ
ໃນວັນທີ 14 ສິງຫາ 2018 ທີ່ຫ້ອງປະຊຸມສະຫະພັນບານເຕະແຫ່ງຊາດລາວ (ສຕລ) ໄດ້ມີພີທີເປີດການຝຶກອົບຮົມຍົກລະດັບກຳມະການຕັດສິນ ລະດັບ ກ ກຽມຮັບໃຊ້ການແຂ່ງຂັນບານເຕະ ສາຍ ກ ປະຈຳປີ 2018 ໂດຍມີ ທ່ານ ຄຳໄພ ປຣະເສີດ ຮອງປະທານ ສຕລ ແລະ ນັກສຳມະກອນ ຈຳນວນ 33 ຄົນເຂົ້າຮ່ວມ.
ການຝຶກອົບຮົມຄັ້ງນີ້ ເພື່ອຮຽນຮູ້ເອົາສິ່ງໃໝ່ໆທີ່ທາງ ຟີຟາ ປັບປຸງແກ້ໄຂບາງຈຸດອ່ອນ ແລະ ຂໍ້ຄົງຄ້າງທາງພາກທິດສະດີ ແລະ ພາກປະຕິບັດຕົວຈິງ, ພ້ອມທັງແລກປ່ຽນບົດຮຽນລະຫວ່າງກຳມະການດ້ວຍກັນ ແລະ ຄູຝຶກ, ປັບປຸງການຕັດສິນໃຫ້ມີຄຸນນະພາບສູງຂຶ້ນເປັນກ້າວໆ, ຕິດຕາມໃຫ້ທັນວິວັດທະນາການຂອງເກມການຫລິ້ນຂອງນັກກິລາ.
ການຝຶກອົບຮົມແມ່ນຈະໄດ້ດຳເນີນການຝຶກນັບຕັ້ງແຕ່ວັນທີ 14 ຫາ 17 ສິງຫາ 2018 ເຊິ່ງໃຊ້ເວລາໃນການຝຶກອົບຮົມ ຈຳນວນ 4 ມື້ ໂດຍນັກສຳມະກອນຈະໄດ້ຮຽນຮູ້ທາງດ້ານທິດສະດີ ແລະ ການປະຕິບັດຕົວຈິງ. ການແຂ່ງຂັນບານເຕະ ສາຍ ກ Division 1 ປະຈຳປີ 2018 ຈະໃຊ້ກຳມະການຕັດສິນທັງຫມົດ 30 ຄົນ ເຂົ້າຮ່ວມການຕັດສິນ ໂດຍມີທີມເຂົ້າຮ່ວມແຂ່ງຂັນທັງຫມົດ 11 ທີມ ເຊິ່ງປະກອບມີ ກອງທັບ ເອັຟຊີ (ແຊ້ມເກົ່າ), ວຽງຈັນ ຢູໄນເຕັດ, ເຄພີເອັສ ເອັຟຊີ, ປກສ ເອັຟຊີ, ດີເຄ ເອັຟຊີ, ແບລາວ ເອັຟຊີ, ອີໂວ ຢູໄນເຕັດ, ທຣີນີຕີ ເອັຟຊີ, ເອັສທີທີ ເອັຟຊີ, ໂຮງຮຽນ ບຸນເກີດສຶກສາ ເອັຟຊີ, ວິທະຍາໄລ ລາວ – ທ໋ອບ ເອັຟຊີ.
