ຕວກກີພ້ອມເຮັດການຄ້າກັບຈີນ-ຣັດເຊຍ
ປະທານາທິບໍດີຂອງຕວກກີປະກາດ ພ້ອມຫັນໄປເຮັດການຄ້າກັບຈີນ, ຣັດເຊຍ ແລະ ອູແກຣນ ໂດຍໃຊ້ເງິນລີຣາຂອງຕວກກີເອງ ຫລັງອາເມລິກາປະກາດຕັ້ງກຳແພງພາສີສິນຄ້ານຳເຂົ້າຈາກຕວກກີ.
ປະທານາທິບໍດີ ເຣເຈບ ທາຍຍິບ ເອີໂດກັນ ຂອງຕວກກີ ປະກາດທີ່ເມືອງໄຣ ລະຫວ່າງກອງປະຊຸມພັກເອເຄ ໃນວັນທີ 12 ສິງຫາວ່າ: ຕວກກີພ້ອມຫັນໄປເຮັດການຄ້າກັບຈີນ, ຣັດເຊຍ ແລະ ອູແກຣນ ໂດຍໃຊ້ເງິນລີຣາຂອງຕວກກີເອງ ລວມທັງທຸກປະເທດໃນເອີຣົບທີ່ຕ້ອງການປົດແອກຈາກເງິນສະກຸນໂດລາສະຫະລັດຄືຕວກກີ. ເງິນສະກຸນລີຣາຂອງຕວກກີຫລຸດຄ່າລົງກວ່າ 40% ຫລັງປະທານາທິບໍດີ ໂດນັລ ທຣຳ ຂອງອາເມລິກາ ປະກາດຕັ້ງກຳແພງພາສີສິນຄ້ານຳເຂົ້າຈາກຕວກກີ ໃນວັນທີ 10 ສິງຫາ ແລະ ເກັບພາສີອາລູມີນຽມ 20%, ເຫລັກກ້າ 50%. ອາເມລິກາບໍ່ພໍໃຈທີ່ຕວກກີຈຳຄຸກບາດຫລວງ ແອນດຣູ ບຣັນສັນ ໃນຂໍ້ຫາກໍ່ການຮ້າຍ ແລະ ຂູ່ຈະຕອບໂຕ້ຕວກກີດ້ວຍສົງຄາມການຄ້າ.
