ການຜະລິດຂອງບໍລິສັດ ພູເບ້ຍ ມາຍນິງ ສືບຕໍ່ມີຄວາມເຂັ້ມແຂງ
ແພນອອສ໌ ບໍລິສັດແມ່ຂອງບໍລິສັດ ພູເບ້ຍ ມາຍນິງ ຈຳກັດ (PBM) ໄດ້ລາຍງານວ່າ: ຜົນການຜະລິດຂອງຕົນສືບຕໍ່ເຂັ້ມແຂງຢ່າງຕໍ່ເນື່ອງ ໂດຍສະເພາະໂຮງງານຜະລິດທອງ-ຄຳ ພູຄຳ ແລະ ໂຮງງານຜະລິດຄຳ-ເງິນ ບ້ານຫ້ວຍຊາຍ ຄືໃນໄຕມາດ 2 ຂອງປີ 2018 ນີ້, ສະເພາະໂຮງງານຜະລິດທອງ-ຄຳ ພູຄຳ ຜະລິດທອງເຂັ້ມຂຸ້ນໄດ້ 21.201 ໂຕນ, ເງິນ 587.641 ອອນ ແລະ ຜະລິດຄຳໄດ້ 18.598 ອອນ. ສ່ວນໂຮງງານຜະລິດຄຳ-ເງິນ ບ້ານຫ້ວຍຊາຍ ຜະລິດຄຳໄດ້ 30.866 ອອນ ແລະ ເງິນ 177.976 ອອນ. ສຳລັບຄຸນນະພາບແຮ່ທອງ, ຄຳ ແລະ ເງິນຢູ່ໂຮງງານ ພູຄຳ ສະເລ່ຍ 0,54%, 0,25 ກຣາມຕໍ່ໂຕນ ແລະ 2,32 ຕໍ່ໂຕນຕາມລຳດັບ. ອັດຕາການສະກັດແຮ່ທອງແມ່ນຫລາຍກວ່າ 81% ໃນໄຕມາດ ແລະ ຄຸນນະພາບຜະລິດຢູ່ໂຮງງານບ້ານຫ້ວຍຊາຍ, ຄຸນນະພາບແຮ່ຄຳ ແລະ ເງິນ ສະເລ່ຍ 0,88 ກຣາມຕໍ່ໂຕນ ແລະ 7,98 ກຣາມຕໍ່ໂຕນຕາມລຳດັບ. ອັດຕາແມ່ນລື່ນ 84%.
ທ່ານ ຈັນເພັງ ບຸນນະຜົນ ປະທານບໍລິສັດ ພູເບ້ຍ ມາຍນິງ ກ່າວເຖິງການຜະລິດທີ່ພົ້ນເດັ່ນໄດ້ສະໜັບສະໜູນຄວາມສຳເລັດຂອງບໍລິສັດ ພູເບ້ຍ ມາຍນິງ ຄືແນວໃດ. “ການມຸ່ງໝັ້ນຂອງບໍລິສັດ ພູເບ້ຍ ມາຍນິງ ເພື່ອສ້າງຄວາມເປັນເລີດດ້ານການດຳເນີນງານຢູ່ໂຮງງານຂອງຕົນ, ຜ່ານເປົ້າໝາຍວິທີການດຳເນີນທຸລະກິດ ແລະ ການປະຕິບັດຢ່າງມີປະສິດທິຜົນດ້ານຄ່າໃຊ້ຈ່າຍ, ໄດ້ເຮັດໃຫ້ບໍລິສັດມີການປະກອບສ່ວນສຳຄັນ ແລະ ຍາວນານຕໍ່ການພັດທະນາເສດຖະກິດ-ສັງຄົມຂອງລາວ.
