ໜັງສືພິມປະຊາຊົນ ເລັ່ງພັດທະນາສູ່ຄວາມທັນສະໄໝ ແລະ ກຸ້ມຕົນເອງ
ໃນຍຸກແຫ່ງການເຊື່ອມໂຍງຂໍ້ມູນຂ່າວສານເຕັກໂນໂລຊີທີ່ທັນສະໄໝ, ເຮັດໃຫ້ການ ບໍລິໂພກຂ່າວສານຂອງສັງຄົມນັບມື້ເປີດກ້ວາງ ແລະ ໄຮພົມແດນ, ສະນັ້ນ ການພັດທະນາ ວຽກງານສື່ສິ່ງພິມ ຈຶ່ງເປັນບາດກ້າວໜຶ່ງທີ່ຈະຕ້ອງປັບປຸງ ໃຫ້ທັນກັບສະພາບການຂອງຍຸກດັ່ງກ່າວ, ກໍຄືດັ່ງໜັງສືພິມປະຊາຊົນ ທີ່ເປັນກະບອກສຽງຂອງສູນກາງພັກ, ປັດຈຸບັນ ເລັ່ງກໍໄດ້ພັດທະນາຕົນເອງສູ່ຄວາມທັນສະໄໝ ແລະ ໃຫ້ການກຸ້ມຕົນເອງ ໄດ້ໂດຍພຶ້ນຖານທາງດ້ານງົບປະມານ, ນີ້ແມ່ນຄຳໃຫ້ສຳພາດຂອງທ່ານ ດວງຈິດ ສະຫວັດບຸນມີ ຫົວໜ້າບັນນາທິການໜັງສືພິມດັ່ງກ່າວ, ໃນວັນທີ 9 ສິງຫາ ນີ້, ເນື່ອງໃນໂອກາດວັນສື່ມວນຊົນ ( 13 ສິງຫາ 1950 ຫາ 13 ສິງຫາ 2018) ຄົບຮອບ 68 ປີ, ທ່ານ ດວງຈິດ ກ່າວ່າ: ປັດຈຸບັນ ການບໍລິໂພກສື່ອອນລາຍ ໄດ້ມີບົດບາດສູງໃນສັງຄົມ, ສົ່ງຜົນກະທົບຕໍ່ສື່ສິ່ງພິມຫລາຍສຳນັກ ເຮັດໃຫ້ຍອດຜູ້ຈອງ ແລະ ລາຍຮັບຫລຸດລົງ,ກໍເຫມືອນດັ່ງໜັງສືພິມປະຊາຊົນ, ທີ່ໄດ້ເລີ່ມກໍ່ຮ່າງສ້າງຕົວຂຶ້ນໃນທ້າຍຊຸມປີ 40 ຊຶ່ງເປັນໄລຍະແຫ່ງການຕໍ່ສູ້ກູ້ຊາດ, ຈາກໃບຂ່າວ, ໃບປິວ, ມາເຖິງປັດຈຸບັນໄດ້ເຕີບໃຫຍ່ຂະຫຍາຍຕົວ ເຊິ່ງມີການພິມ ແລະ ຈຳໜ່າຍໄປທົ່ວປະເທດເປັນຈຳນວນຫລາຍ, ເພື່ອຕອບສະໜອງຄວາມຕ້ອງການຂອງເພື່ອນຜູ້ອ່ານ ແລະ ເຮັດພາລະບົດບາດເປັນ ສຽງຂອງ ສູນກາງພັກປະຊາຊົນປະຕິວັດລາວໄດ້ຢ່າງຕັ້ງໜ້າ, ຮັບໃຊ້ພາລະກິດປ່ຽນແປງໃໝ່ຮອບດ້ານຂອງພັກ, ສ້າງຄວາມເຊື່ອໝັ້ນ ແລະ ການພົວພັນອັນສະໜິດແໜ້ນ ລະຫວ່າງພັກກັບປະຊາຊົນ ແລະ ນອກຈາກນີ້, ພວກເຮົາກໍໄດ້ຫັນໄປສູ່ຄວາມທັນສະໄໝເທື່ອລະກ້າວ, ໂດຍສະເພາະໄດ້ເອົາໃຈໃສ່ພັດທະນາເວບໄຊຂອງຕົນເອງ, ຊຶ່ງປັດຈຸບັນ ມີຜູ້ຕິດຕາມເປັນຈຳນວນຫລາຍ, ພ້ອມນັ້ນຍັງມີເຟດບຸກ, ຢູທູບ ທີ່ເປັນສື່ອອນໄລ ເພື່ອໃຫ້ຜູ້ອ່ານສາມາດຕິດຕາມຂ່າວສານ ໄດ້ສະດວກ ແລະ ໃນຕໍ່ໜ້າຍັງຈະເພີ່ມທະວີໃນການສ້າງເປັນສື່ເອເລັກໂຕນິກ ເພື່ອຕອບສະໜອງຄວາມຮຽກຮ້ອງຕ້ອງຫານຂອງໜ້າທີ່ການເມືອງໃນໄລຍະໃໝ່ ໃຫ້ດີຂຶ້ນ.
ຫົວໜ້າບັນນາທິການ ໜັງສືພິມປະຊາຊົນ ໃຫ້ຮູ້ວ່າ: ໃນຍຸກແຫ່ງການແຂ່ງຂັນ, ສື່ມວນຊົນເຮົາ,ເວົ້າລວມ, ເວົ້າສະເພາະກໍແມ່ນສື່ສິ່ງພິມນີ້, ຍັງພັດທະນາບໍ່ທັນກັບສື່ປະເທດອື່ນທີ່ຈະເລີນແລ້ວ, ນັບທັງເຄື່ອງມື, ພຶ້ນຖານໂຄງລ່າງ ແລະ ບຸກຄະລາກອນທີ່ຊໍານານງານຍັງຂາດເຂີນຄື: ບາງປະເທດທີ່ພັດທະນາແລ້ວມີໜັງສືພິມລາຍວັນ ອອກທັງຕອນເຊົ້າ ແລະ ຕອນບ່າຍ, ວາລະສານຫລາຍສະບັບອອກແບບງາມເນື້ອໃນດີ, ແຕ່ບາງວາລະສານຂອງປະເທດເຮົານອກຈາກບາງເນື້ອໃນບໍ່ດຶງດູດຜູ້ອ່ານແລ້ວ ຍັງອອກຊ້າຕື່ມອີກ, ເປັນລາຍສອງເດືອນ, 3 ເດືອນ ກໍມີ, ອັນນີ້ຕ້ອງໄດ້ແກ້ໄຂ, ນອກນັ້ນ ລາຄາໜັງສືພິມປະເທດໃກ້ຄຽງແມ່ນມີລາຄາດຽວໃນຂອບເຂດທົ່ວປະເທດ, ສະນັ້ນ ຢູ່ປະເທດເຮົາຈະຄວນປັບປຸງແກ້ໄຂແນວໃດ? ເພື່ອໃຫ້ສື່ສິ່ງພິມເຮົາສາມາດພັດທະນາຕົນເອງດີຂຶນ ແລະ ເຊື່ອມໂຍງເຂົ້າກັບສາກົນໄດ້.
ຫົວໜ້າບັນນາທິການ ໃຫ້ຮູ້ວ່າ: ເພື່ອແກ້ໄຂບັນຫານີ້, ຕ້ອງມີງົບປະມານພຽງພໍໃນການພັດທະນາ ແລະ ມີບຸກຄະລາກອນດ້ານສື່ທີ່ມີຄຸນນະພາບ, ເພື່ອໄປສູ່ຄວາມທັນສະໄໝ ແລະ ໃຫ້ມີຫລາກຫລາຍຜະລິດຕະພັນ, ພ້ອມນັ້ນກໍຕ້ອງໄດ້ອຳນວຍຄວາມຄວາມສະດວກສະບາຍໃນການໂຄສະນາຮັບໃຊ້ໜ້າທີ່ການເມືອງຂອງພັກ, ລະບຽບກົດໝາຍຂອງລັດໃຫ້ທັນການ.
