IS ລະເບີດຂ້າໂຕຕາຍຢູ່ຄ້າຍຜູ້ອົບພະຍົບໃນຊີຣີ ມີຜູ້ເສຍຊີວິດ 30 ກວ່າຄົນ
ກຸ່ມສັງເກດການເພື່ອສິດທິມະນຸດຊີຣີ ແຈ້ງວ່າ: ສະມາຊິກກຸ່ມລັດອິສລາມ (IS) ຢ່າງໜ້ອຍ 5 ຄົນ ລະເບີດຂ້າໂຕຕາຍທັງໃນ ແລະ ນອກຄ້າຍຜູ້ອົບພະຍົບຢູ່ຊີຣີ ເບື້ອງຕິດກັບອີຣັກ ໃນວັນທີ 2 ພຶດສະພານີ້ ເຮັດໃຫ້ມີຜູ້ເສຍຊີວິດຢ່າງໜ້ອຍ 32 ຄົນ.
ຄ້າຍຜູ້ອົບພະຍົບດັ່ງກ່າວຢູ່ແຂວງຮາຊາກາ ມີທັງຜູ້ອົບພະຍົບຊາວອີຣັກ ແລະ ຊາວຊີຣີ, ສະມາຊິກ IS 5 ຄົນ ຈູດສະນວນລະເບີດຂ້າໂຕຕາຍ ທີ່ເຫລືອຕໍ່ສູ້ກັບກອງກຳລັງປະຊາທິປະໄຕຊີຣີ ເຊິ່ງເປັນການລວມຕົວກັນຂອງນັກຮົບຊາວເຄຣີດ ແລະ ຊາວອາຣັບ ມີຜູ້ເສຍຊີວິດຢ່າງໜ້ອຍ 32 ຄົນ ໃນຈຳນວນນີ້ເປັນຜູ້ອົບພະຍົບ 21 ຄົນ ແລະ ມີຜູ້ບາດເຈັບປະມານ 30 ຄົນ ຫລາຍຄົນອາການສາຫັດ.
ກອງກຳລັງປະຊາທິປະໄຕຊີຣີໄດ້ຮັບການສະໜັບສະໜູນຈາກອາເມລິກາ ຍຶດພື້ນທີ່ທາງເໜືອຂອງຊີຣີຄືນຈາກກຸ່ມ IS ແລະ ພວມຍາດຊີງເມືອງຕັບກາ ເມືອງຍຸດທະສາດແຄມແມ່ນ້ຳຍູເຟຣຕິສ ເພາະຖ້າຍຶດໄດ້ຈະເປັນຖານບຸກລົງໄປຖານທີ່ໝັ້ນຂອງກຸ່ມ IS ຢູ່ແຂວງຣັກກາຕໍ່ໄປ.
