10 ວັນການຄົ້ນຫາຜູ້ເສຍຊີວິດຈາກໄພນ້ຳຖ້ວມຢູ່ແຂວງອັດຕະປື ພົບແລ້ວ 30 ສົບ
ໃນວັນທີ 3 ສິງຫາ ນີ້, ຄະນະກູ້ໄພພິບັດນ້ຳຖ້ວມ ຢູ່ແຂວງ ອັດຕະປື ໄດ້ຖະແຫລງຂ່າວຕໍ່ສື່ມວນຊົນ ກ່ຽວກັບການຄົ້ນຫາຜູ້ຫາຍສາບສູນ ແລະ ຜູ້ເສຍຊີວິດຈາກໄພນ້ຳຖ້ວມ ໃນລະຫວ່າງວັນທີ 23 ກໍລະກົດ ຫາ 3 ສິງຫາ ນີ້ ໃຫ້ຮູ້ວ່າ: ມາຮອດປັດຈຸບັນ ຈຳນວນຜູ້ໄດ້ຮັບຜົນກະທົບທັງໝົດມີ 13 ບ້ານ, ມີ 2 ພັນກ່ວາຄອບຄົວ, ໃນນີ້ໄດ້ຮັບຜົນກະທົບ 100% ມີ 6 ບ້ານ ຈຳນວນ 1.600 ກ່ວາຄອບຄົວ ຊຶ່ງເປັນບ້ານທີ່ຕັ້ງຕາມສາຍນ້ຳເຊປຽນ ແລະ ພົບຜູ້ເສຍຊີວິດແລ້ວ 30 ສົບ, ຍິງ 13 ສົບ, ຊຶ່ງປັດຈຸບັນ ເຈົ້າໜ້າທີ່ຍັງເລັ່ງສືບຕໍ່ຄົ້ນຫາຜູ້ຫາຍສາບສູນທີ່ມີຕົວເລກຢູ່ ເກືອບ 100 ຄົນ, ໂດຍເຈົ້າໜ້າທີ່ໄດ້ເພີ່ມກຳລັງໃນການຄົ້ນຫາທັງເຈົ້າໜ້າທີ່ທະຫານ ແລະ ໜ່ວຍກູ້ໄພຕ່າງໆ ເພື່ອເຮັດໃຫ້ພາລະກິດສຳເລັດໂດຍໄວ.
ທ່ານ ພົນຕີ ຄໍາລຽງ ອຸທະໄກສອນ ຮອງຫົວໜ້າກົມໃຫຍ່ເສນາທິການກອງທັບ, ຫົວໜ້າກອງບັນຊາການພາກສະໜາມໄດ້ໃຫ້ຮູ້ວ່າ: ວ່າ: ນັບແຕ່ວັນທີ 23 ກໍລະກົດ ມາເຖິງເວລາ 17:00 ຂອງວັນທີ 3 ສິງຫາ 2018 ທີມກູ້ໄພສາມາດຄົ້ນໄດ້ທັງໝົດ 30 ສົບ ແລະ ເປົ້າໝາຍຍັງເຫລືອທີ່ຈະຕ້ອງສືບຕໍ່ຄົ້ນຫາອີກແມ່ນ 101 ຄົນ, ສຳລັບຜູ້ທີ່ຍັງບໍ່ມີໜ້າມາລາຍງານຕົວກໍຈະສືບຕໍ່ເອົາຂໍ້ມູນແລະທ່ວງທາວຫາ. ການຊອກຄົ້ນສະເພາະວັນທີ 31 ກໍລະກົດ ແລະ 3 ສິງຫາ 2018 ແມ່ນປະຕິບັດການຊອກຄົ້ນທາງບົກ (ຍ່າງ) ທັງໝົດ, ໄດ້ຄົ້ນຕາມລຳນ້ຳເຊປຽນແຕ່ບ້ານຫີນລາດ (ບ້ານເໜືອສຸດ) ລົງຮອດປາກເຊປຽນຫລາຍຫລົບຫລາຍຕ່າວແລະລະອຽດພໍສົມຄວນສຳລັບມາດຕະການແລະແຜນວຽກສືບແມ່ນຈະເບິ່ງຜົນການຊອກຄົ້ນພື້ນທີ່ໃນບໍລິເວນບ້ານ ແລະ ຫົວໄຮ່ປາຍນາພົບບ້ານເປົ້າໝາຍ ໃຫ້ສຳເລັດ100%, ຖ້າຍັງກໍ່ຈະສືບຕໍ່ໄປອີກ, ແຕ່ຖ້າສຳເລັດ100% ແມ່ນຈະອວ່າຍກຳລັງເຂົ້າທິດໃຕ້ແລວນ້ຳ (6 ບ້ານເປົ້າໝາຍທິດໃຕ້) ນັບແຕ່ທິດໃຕ້ທົ່ງນາບ້ານ ໃໝ່, ທ່າແສງຈັນລົງໄປຫາຫ້ວຍນ້ຳທຸກຫ້ວຍ. ນີ້ແມ່ນບາດກ້າວທີ 4 ການຊອກຄົ້ນຜູ້ສາບສູນເຊິ່ງຈະໃຊ້ເວລາຢ່າງໜ້ອຍ 2-3 ວັນ .
ຂ່າວຍັງໃຫ້ຮູ້ວ່າ: ສຳລັບການຊ່ວຍເຫລືອຜູ້ປະສົບໄພນ້ຳຖ້ວມ ຢູ່ແຂວງ ອັດຕະປື ປັດຈຸບັນ ມີຫລາຍກ່ວາ 1.800 ພາກສ່ວນ, ລວມເປັນເງີນຫລາຍກ່ວາ 69 ຕື້ກີບ, ໃນນັ້ນເປັນເຄື່ອງອຸປະໂພກ-ບໍລິໂພກ, ເຄື່ອງນຸ່ງຫົ່ມ ແລະ ສິ່ງຂອງຈຳເປັນ ອື່ນໆ. ປັດຈຸບັນທາງຄະນະນຳຂັ້ນສູນກາງຕະຫລອດຮອດທ້ອງຖິ່ນ ກໍໄດ້ລົງຕິດຕາມຢ້ຽມຢາມຕາມຈຸດພັກເຊົາຊົ່ວຄາວຜູ້ໄດ້ຮັບຜົນກະທົບຈາກໄພນ້ຳຖ້ວມ ເພື່ອຊ່ວຍອົບອຸ່ນຈິດໃຈ ແລະ ໄດ້ໃຫ້ກຳລັງໃຈເຈົ້າໜ້າທີ່ຢູ່ພາກສະໜາມ, ພ້ອມກັນນັ້ນ ທາງໜ່ວຍງານ ໂຍທາທິການ ແລະ ຂົນສົ່ງ ຍັງສືບຕໍ່ ສ້ອມແປງເສັ້ນທາງ 18A ແຕ່ເທດສະບານແຂວງ ຫາບ້ານໃໝ່ ແລະ ລົງຕິດຕາມການກໍ່ສ້າງເຮືອນພັກຊົ່ວຄາວຂອງປະຊາຊົນຢູ່ໂຮງຮຽນບ້ານຫາດຍາວ ແລະ ຊ່ວຍໃນການປິ່ນປົວຢຽວຢາຜູ້ໄດ້ຮັບຜົນກະທົບໄພພິບັດໃນຄັ້ງນີ້.
