ອາຊຽນພ້ອມຊ່ວຍຜູ້ປະສົບໄພ ນ້ຳຖ້ວມໃນມຽນມາ
ເລຂາທິການອາຊຽນ ສະເໜີການຊ່ວຍເຫລືອດ້ານມະນຸດສະທຳແກ່ມຽນມາ ເຊິ່ງກຳລັງປະສົບກັບອຸທົກກະໄພຄັ້ງໃຫຍ່ ມີຜູ້ເສຍຊີວິດແລ້ວ 12 ຄົນ ແລະ ອີກ 150.000 ຄົນຕ້ອງອົບພະຍົບອອກຈາກເຮືອນ.
ສຳນັກຂ່າວຕ່າງປະເທດລາຍງານວ່າ: ທ່ານ ລິ້ມ ຈ໊ອກ ຮອຍ ເລຂາທິການປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ສົ່ງໜັງສືເຖິງທ່ານນາງ ອອງຊານ ຊູຈີ ມົນຕີແຫ່ງລັດ ແລະ ລັດຖະມົນຕີກະຊວງການຕ່າງປະເທດມຽນມາ ໃນວັນທີ 2 ສິງຫາວ່າ: ສູນປະສານງານດ້ານການຊ່ວຍເຫລືອດ້ານມະນຸດສະທຳຂອງອາຊຽນ (AHA) ແລະ ສຳນັກງານໃຫຍ່ຂອງອາຊຽນໃນນະຄອນຫລວງຈາກາຕາ ພ້ອມມອບການຊ່ວຍເຫລືອຢ່າງເຕັມສ່ວນໃຫ້ແກ່ມຽນມາ ເພື່ອບັນເທົາສະຖານະການອຸທົກກະໄພໃນປະເທດທີ່ຍັງຢູ່ໃນລະດັບວິກິດ.
ຂະນະທີ່ລາຍງານຂອງກະຊວງສະຫວັດດີການສັງຄົມແຫ່ງມຽນມາ ລະບຸວ່າ: ພື້ນທີ່ໄດ້ຮັບຜົນກະທົບຈາກອຸທົກກະໄພຄັ້ງນີ້ ລວມທັງລັດກະຫລຽງ, ລັດມອນ, ລັດຍະໄຂ່, ລັດສານ, ເຂດຊະໄກ, ເຂດພະໂຄ, ເມືອງຢາງກຸ້ງ ແລະ ນະຄອນຫລວງເນປີດໍ ໂດຍມີຜູ້ເສຍຊີວິດແລ້ວ 12 ຄົນ, ປະຊາຊົນເກືອບ 150.000 ຄົນຕ້ອງອົບພະຍົບອອກຈາກບ່ອນຢູ່ອາໄສໄປສູນພັກເຊົາຊົ່ວຄາວປະມານ 327 ແຫ່ງ ແຕ່ຍັງມີຜູ້ປະສົບໄພອີກເກືອບ 28.000 ຄົນຕົກຄ້າງຢູ່ຕາມເຮືອນຂອງຕົນເອງ.
ທັງນີ້, ບັນດາປະເທດໃນພາກພື້ນລຸ່ມແມ່ນ້ຳຂອງຕ່າງໄດ້ຮັບຄວາມເດືອດຮ້ອນຈາກອຸທົກກະໄພຄັ້ງນີ້ ບໍ່ວ່າຈະເປັນຫວຽດນາມ, ກຳປູເຈຍ ແລະ ລາວ ເຊິ່ງເກີດເຫດສັນເຂື່ອນເຊປຽນ-ເຊນ້ຳນ້ອຍ ໃນແຂວງອັດຕະປື ທາງຕາເວັນອອກສຽງໃຕ້ຂອງປະເທດ ທະລຸໃນ້ທາຍເດືອນກໍລະກົດຜ່ານມາ.
