ຕົວແທນ ມ4 ນະຄອນຫລວງວຽງຈັນຄວ້າຊະນະເລີດທຸກວິຊາແຂ່ງຂັນນັກຮຽນເກັ່ງທົ່ວປະເທດ

   ການສອບເສັງນັກຮຽນເກັ່ງຊັ້ນປະຖົມສຶກສາ ປ5, ຊັ້ນມັດທະຍົມສາມັນສຶກສາ ມ4 ແລະ ມ7 ທົ່ວປະເທດປະຈຳປີ 2017 ໄດ້ສໍາເລັດລົງຢ່າງຈົບງາມໃນທ້າຍອາທິດຜ່ານມານີ້, ໂດຍຊັ້ນປະຖົມສຶກສາ ປ5 ຜູ້ຊະນະເລີດວິຊາພາສາລາວແມ່ນນາງ ສີຣິຕາ ທາວົງສ໌ ຈາກໂຮງຮຽນນິຣະດານະຄອນຫລວງວຽງຈັນ, ວິຊາຄະນິດສາດແມ່ນນາງ ສຸພອນສິລິ ຄຳມະນີ ຈາກໂຮງຮຽນສິນໄຊນະຄອນຫລວງວຽງຈັນ ແລະ ວິຊາໂລກອ້ອມຕົວ ແມ່ນນາງ ສຸກຈະເລີນ ໄຊຍະວົງ ຈາກໂຮງຮຽນເຈນນິດາແຂວງຊຽງຂວາງ.

ສໍາລັບຊັ້ນ ມ4 ຜູ້ທີ່ຊະນະເລີດວິຊາພາສາລາວ-ວັນນະຄະດີແມ່ນນາງ ທັດສະພອນ ເຂັມຄຳ, ວິຊາຄະນິດສາດແມ່ນທ້າວ ອານັດຊະຢາ ພົງສະຫວັດ ຈາກໂຮງຮຽນ ມຕ ສິນໄຊນະຄອນຫລວງວຽງຈັນ, ສ່ວນວິຊາຟີຊິກແມ່ນນາງ ສຸພາພອນ ທຳມະວົງ ຈາກໂຮງຮຽນ ມສ ວຽງຈັນນະຄອນຫລວງວຽງຈັນ ແລະ ວິຊາເຄມີສາດແມ່ນນາງ ດາວສະຫວັນ ເຫງົ້າພາສີ ຈາກໂຮງຮຽນ ມຕ ປາດຖະໜານະຄອນຫລວງວຽງຈັນ.

ສຳລັບຊັ້ນ ມ7 ຜູ້ທີ່ຊະນະເລີດໃນວິຊາພາສາລາວ-ວັນນະຄະດີແມ່ນນາງ ໄໝໂພ ໄຊຍະວົງ ຈາກໂຮງຮຽນ ມສ ທົ່ງແສນແຂວງບໍລິຄຳໄຊ, ວິຊາຄະນິດສາດແມ່ນທ້າວ ພອນແກ້ວ ເຊັງມີຢາລີຊົ່ງ ຈາກໂຮງຮຽນ ມສ ສັນຕິພາບແຂວງຫລວງພະບາງ, ວິຊາຟີຊິກສາດແມ່ນທ້າວ ມົວຊົ່ງ ຈາກໂຮງຮຽນ ມສ ເມືອງໄຊຍະບູລີ ແລະ ວິຊາເຄມີສາດ ແມ່ນທ້າວ ປໍທໍ່ ຈ້າລີ ຈາກໂຮງຮຽນ ມສ ສັນຕິພາບແຂວງຫລວງພະບາງ, ໂດຍຜູ້ໄດ້ຮັບຊະນະເລີດອັນດັບ 1, 2, 3 ແລະ ລາງວັນຊົມເຊີຍໃນແຕ່ລະວິຊາ ແລະ ແຕ່ລະຊັ້ນຮຽນນັ້ນ ໄດ້ຮັບທຶນການສຶກສາຈຳນວນໜຶ່ງ, ພ້ອມໃບຍ້ອງຍໍ ແລະ ຂັນຈາກກະຊວງສຶກສາທິການ ແລະ ກິລາອີກດ້ວຍ.

ກະຊວງສຶກສາທິການ ແລະ ກິລາ ໃຫ້ຮູ້ວ່າ: ການສອບເສັງເທື່ອນີ້ຈັດຂຶ້ນເປັນຄັ້ງທີ 8 ເພື່ອສ້າງໂອກາດໃຫ້ນັກຮຽນໄດ້ສະແດງອອກດ້ານຄວາມຮູ້, ຄວາມສາມາດ, ພອນສະຫວັນ ແລະ ຫົວຄິດປະດິດສ້າງຂອງຕົນເອງ, ພ້ອມທັງສົ່ງເສີມ ແລະ ຊຸກຍູ້ຂະບວນການສອນດີ-ຮຽນເກັ່ງຢູ່ໂຮງຮຽນມັດທະຍົມສຶກສາໃນຂອບເຂດທົ່ວປະເທດໃຫ້ມີບັນຍາກາດຟົດຟື້ນ, ມີລັກສະນະແຂ່ງຂັນ ແລະ ມີຄຸນນະພາບ, ທັງເປັນການຍ້ອງຍໍນັກຮຽນເກັ່ງ ແລະ ໃຫ້ໂອກາດແກ່ຜູ້ທີ່ສອບເສັງໄດ້ຊະນະເລີດອັນດັບທີ 1, 2 ແລະ 3 ແຕ່ລະວິຊາໄດ້ຮັບທຶນການສຶກສາ ເພື່ອຮຽນຕໍ່ໃນວິຊາທີ່ຕົນເອງມັກ. ນອກນີ້ຍັງເປັນການຄັດເລືອກ ແລະ ສົ່ງເສີມນັກຮຽນເກັ່ງທີ່ມີພອນສະຫວັນແຕ່ລະວິຊາໃນການເປັນຕົວແທນຂອງຊາດເຂົ້າຮ່ວມການແຂ່ງຂັນໃນລະດັບພາກພື້ນ ແລະ ສາກົນນຳອີກ.