ດອກປີກໄກ່ທົ່ວປະເທດຊີງຂັນ ປະທານສະພາແຫ່ງຊາດ ຄັ້ງທີ 18 ເປີດສາກມື້ນີ້
ການແຂ່ງຂັນກິລາດອກປີກໄກ່ທົ່ວປະເທດ ຮຸ່ນເຍົາວະຊົນ-ຊາວໜຸ່ມທົ່ວໄປ ຊີງຂັນປະທານສະພາແຫ່ງຊາດ ປະຈຳປີ 2018 ຫລື ລາຍການ ເບຍລາວ ໂອເພັນ 2018 ເລີ່ມເປີດແຂ່ງຂັນຊີງຫລຽນຄຳປະເພດທີມ ໃນຕອນເຊົ້າມື້ນີ້ (1 ສິງຫາ) ທີ່ສະໂມສອນກິລາດອກປີກໄກ່ບຶງຂະຫຍອງ (ເກົ່າ) ເມືອງສີສັດຕະນາກ ນະຄອນຫລວງວຽງຈັນ.
ການແຂ່ງຂັນຄັ້ງນີ້ ມີນັກກິລາດອກປີກໄກ່ທົ່ວປະເທດເຂົ້າຮ່ວມທັງໝົດ 320 ກວ່າຄົນ ມາຈາກ 27 ພາກສ່ວນ, ໃນນັ້ນ ມີ 8 ແຂວງ ປະກອບມີແຂວງຈຳປາສັກ, ອັດຕະປື, ສະຫວັນນະເຂດ, ຄຳມ່ວນ, ຫົວພັນ, ຫລວງພະບາງ, ໄຊຍະບູລີ ແລະ ແຂວງບໍ່ແກ້ວ. ນອກຈາກນັ້ນ ຍັງມີບັນດາສະໂມສອນອ້ອມຂ້າງນະຄອນຫລວງວຽງຈັນ. ສ່ວນລາຍການແຂ່ງຂັນມີ 12 ລາຍການ, ປະເພດທີມຊາຍປະກອບມີ ຮຸ່ນເຍົາວະຊົນ ແລະ ຊາວໜຸ່ມໂດຍບໍ່ຈໍາກັດ. ສ່ວນອີກ 11 ລາຍການ ກໍແບ່ງອອກເປັນ 2 ຮຸ່ນຄື: ຮຸ່ນທົ່ວໄປ ມີ 5 ລາຍການ ປະກອບມີ ດ່ຽວຊາຍ, ດ່ຽວຍິງ, ຄູ່ຊາຍ, ຄູ່ຍິງ ແລະ ຄູ່ປະສົມ. ສຳລັບປະເພດເຍົາວະຊົນ ຮຸ່ນອາຍຸບໍ່ເກີນ 14 ປີ ມີ 2 ລາຍການຄື: ດ່ຽວຊາຍ ແລະ ດ່ຽວຍິງ. ສ່ວນອາຍຸບໍ່ເກີນ 17 ປີ ມີ 4 ລາຍການຄື: ດ່ຽວຊາຍ, ດ່ຽວຍິງ, ຄູ່ຊາຍ ແລະ ຄູ່ຍິງ.
ສໍາລັບມື້ເປີດການແຂ່ງຂັນຈະມີການດຳເນີນການແຂ່ງຂັນປະເພດທີມຊາຍ ເວລາ 9:00 ໂມງເປັນຕົ້ນໄປ ພ້ອມຊີງຫລຽນຄຳໃນພາກເຊົ້າ ແລະ ພາກບ່າຍສືບຕໍ່ດຳເນີນການແຂ່ງຂັນປະເພດບຸກຄົນຊາຍ-ຍິງ.
