ຖວທ ເຂັ້ມງວດຕໍ່ຫົວໜ່ວຍທຸລະກິດເຄື່ອນໄຫວຜິດລະບຽບກົດໝາຍ

   ໃນທ້າຍອາທິດຜ່ານມານີ້, ທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນາທໍາ ແລະ ທ່ອງທ່ຽວ (ຖວທ) ໄດ້ລາຍງານກ່ຽວກັບສະພາບການຄຸ້ມຄອງ, ກວດກາການເຄື່ອນໄຫວຂອງບັນດາຫົວໜ່ວຍທຸລະກິດທີ່ນອນໃນຄວາມຮັບພິຊອບຂອງຂະແໜງການຕົນຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ VIII ວ່າ: ປັດຈຸບັນທົ່ວປະເທດມີໂຮງແຮມ 545 ແຫ່ງ, ເຮືອນພັກ 1.982 ແຫ່ງ, ຣີສອດ 129 ແຫ່ງ, ສະຖານບັນເທີງມີ 174 ແຫ່ງ ແລະ ຮ້ານອາຫານ 1.683 ແຫ່ງ, ໂດຍຫົວໜ່ວຍທຸລະກິດປະເພດດັ່ງກ່າວເກີດຂຶ້ນຫລາຍກວ່າໝູ່ແມ່ນຢູ່ບັນດາແຂວງໃຫຍ່ ເປັນຕົ້ນ: ນະຄອນຫລວງວຽງຈັນ, ຫລວງພະບາງ, ສະຫວັນນະເຂດ, ຈຳປາສັກ ແລະ ປີຜ່ານມາໄດ້ມີນັກທ່ອງທ່ຽວເຂົ້າມາທ່ຽວລາວຫລາຍກວ່າ 4,2 ລ້ານເທື່ອຄົນ, ອັນໄດ້ປະກອບສ່ວນເຂົ້າໃນການພັດທະນາສ້າງສາປະເທດຊາດເປັນຢ່າງດີ. ພ້ອມດຽວກັນນັ້ນກໍມີປາກົດການຫຍໍ້ທໍ້ເກີດຂຶ້ນເຊັ່ນ: ຜິດຖຽງອາລະວາດຕີກັນ, ນຸ່ງຖືບໍ່ສຸພາບ ແລະ ຮ້າຍແຮງກາຍເປັນຄະດີອາຍາເກີດຂຶ້ນ 5 ກໍລະນີ.

ທ່ານລັດຖະມົນຕີກະຊວງ ຖວທ ກ່າວວ່າ: ປັດຈຸບັນການຄຸ້ມຄອງກວດກາບັນດາຫົວໜ່ວຍທຸລະກິດໃນຂະແໜງ ຖວທ ແມ່ນປະຕິບັດຕາມກົດໝາຍວ່າດ້ວຍການທ່ອງທ່ຽວ, ດຳລັດວ່າດ້ວຍການບັນເທີງ, ດຳລັດວ່າດ້ວຍປ້າຍ, ດໍາລັດວ່າດ້ວຍສິລະປະການສະແດງ ແລະ ນິຕິກໍາກ່ຽວຂ້ອງອື່ນໆ. ນອກຈາກນີ້

ໄດ້ສົມທົບກັບນະຄອນຫລວງ ແລະ ບັນດາແຂວງໃນການຈັດຕັ້ງປະຕິບັດວຽກງານຄຸ້ມຄອງບັນດາຫົວໜ່ວຍທຸລະກິດການທ່ອງທ່ຽວໂດຍອີງຕາມວຽກງານ 3 ສ້າງ, ໂດຍສະເພາະໄດ້ໂອນວຽກງານຈຳນວນໜຶ່ງໃຫ້ນະຄອນຫລວງ ແລະ ບັນດາແຂວງເພື່ອຄຸ້ມຄອງບັນດາຫົວໜ່ວຍທຸລະກິດດັ່ງກ່າວ, ພ້ອມກັນນີ້ກໍໄດ້ມີການສັ່ງໂຈະ ແລະ ປິດກິດຈະການຂອງບັນດາຫົວໜ່ວຍທຸລະກິດຈຳນວນໜຶ່ງທີ່ເຄື່ອນໄຫວບໍ່ຖືກຕ້ອງຕາມລະບຽບການ, ຈຶ່ງເຮັດໃຫ້ການຕິດຕາມກວດກາ ແລະ ຄຸ້ມຄອງຫົວໜ່ວຍທຸລະກິດບໍລິການເຄື່ອນໄຫວຖືກຕ້ອງຕາມລະບຽບຫລັກການຫລາຍຂຶ້ນ ແລະ ໃນຕໍ່ໜ້ານີ້ກະຊວງ ຖວທ ຈະສືບຕໍ່ສ້າງນິຕິກຳຕ່າງໆທີ່ຈຳເປັນ ແລະ ໃນມໍ່ໆນີ້ຈະຍົກລະດັບດຳລັດສິລະປະການສະແດງຂຶ້ນເປັນກົດໝາຍເພື່ອເປັນບ່ອນອີງໃນການຄຸ້ມຄອງ, ເຄື່ອນໄຫວວຽກງານສິລະປະການສະແດງໃຫ້ດີຂຶ້ນ. ນອກຈາກນັ້ນຍັງມີແຜນຍົກລະດັບດຳລັດວ່າດ້ວຍການບັນເທີງ, ດຳລັດວ່າດ້ວຍປ້າຍ, ດຳລັດວ່າດ້ວຍການສ້າງຄອບຄົວ ແລະ ບ້ານວັດທະນະທຳ, ສືບຕໍ່ໂຄສະນາເຜີຍແຜ່ບັນດາກົດໝາຍກ່ຽວຂ້ອງອື່ນໆໃຫ້ກວ້າງຂວາງເພື່ອໃຫ້ສັງຄົມ ແລະ ປະຊາຊົນເຂົ້າຮ່ວມຂະບວນການສ້າງຄອບຄົວ ແລະ ບ້ານວັດທະນະທຳໃຫ້ເປັນຂະບວນຟົດຟື້ນ, ປັດຈຸບັນຄອບຄົວວັດທະນະທຳໃນທົ່ວປະເທດມີຈຳນວນ 817.040 ຄອບຄົວກວມ 67% ຂອງຄອບຄົວໃນທົ່ວປະເທດ, ບ້ານວັດທະນະທຳມີຈຳນວນ 5.334 ບ້ານກວມ 63% ຂອງບ້ານໃນທົ່ວປະເທດ, ກຸ່ມບ້ານວັດທະນະທຳມີຈຳນວນ 121 ກຸ່ມ ກວມ 11% ຂອງກຸ່ມບ້ານໃນທົ່ວປະເທດ. ນອກຈາກນີ້ຍັງຈະສືບຕໍ່ສົມທົບແໜ້ນກັບກະຊວງກ່ຽວຂ້ອງ ເຊັ່ນ: ກະຊວງປ້ອງກັນຄວາມສະຫງົບ, ກະຊວງອຸດສາຫະກຳ ແລະ ການຄ້າ, ນະຄອນຫລວງ, ແຂວງ, ເມືອງ ແລະ ບ້ານ ເພື່ອກວດກາ ແລະ ສະກັດກັ້ນບັນດາປາກົດການຫຍໍ້ທໍ້ສັງຄົມຕ່າງໆໃຫ້ຫລຸດໜ້ອຍຖອຍລົງເທື່ອລະກ້າວ ແລະ ຮຽກຮ້ອງມາຍັງສະມາຊິກສະພາແຂວງຊ່ວຍເປັນຫູເປັນຕາໃນການຕິດຕາມບັນດາໂຮງແຮມ, ເຮືອນພັກ, ຣີສອດ, ຮ້ານບັນເທີງ ແລະ ຮ້ານອາຫານ ທີ່ເຄື່ອນໄຫວບໍ່ຖືກຕ້ອງສອດຄ່ອງຕາມລະບຽບກົດໝາຍບ້ານເມືອງເພື່ອໃຫ້ພະແນກ ຖວທ ຂອງແຂວງລົງກວດກາ ແລະ ແກ້ໄຂຕາມລະບຽບກົດໝາຍ.