ຄະນະກໍາມະການປ້ອງກັນ ແລະ ຄຸ້ມຄອງ ໄພພິບັດແຫ່ງຊາດຮ້ອງຂໍໃຫ້ຈັດການເຄື່ອງຊ່ວຍເຫລືອໃຫ້ດີທີ່ສຸດ
ພາຍຫລັງມີຝົນຕົກໜັກຕິດຕໍ່ກັນເປັນເວລາຫລາຍວັນ, ໄດ້ເຮັດໃຫ້ຫລາຍທ້ອງຖິ່ນໃນທົ່ວປະເທດປະສົບກັບໄພນໍ້າຖ້ວມ ແລະ ຮ້າຍແຮງໜັກໜ່ວງທີ່ສຸດແມ່ນອຸປະຕິເຫດຈາກເຂື່ອນເຊປຽນ-ເຊນໍ້ານ້ອຍທະລຸໄຫລຖ້ວມເຮືອນຊານບ້ານຊ່ອງຂອງປະຊາຊົນຢູ່ລຸ່ມເຂື່ອນຫລາຍບ້ານ, ອັນໄດ້ສ້າງຄວາມເສຍຫາຍໃຫ້ແກ່ຊີວິດ ແລະ ຊັບສີນຂອງປະຊາຊົນເປັນຈໍານວນຫລາຍ, ເຊິ່ງລັດຖະບານ ໄດ້ປະກາດເປັນເຂດປະສົບໄພລະດັບຊາດ, ຈຶ່ງມີຫລາຍພາກສ່ວນທັງພາຍໃນ ແລະ ຕ່າງປະເທດ ເຂົ້າມາໃຫ້ການຊ່ວຍເຫລືອຢ່າງຫລວງຫລາຍ ແລະ ຕໍ່ສະພາບດັ່ງກ່າວ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ທັງເປັນປະທານຄະນະກຳມະການປ້ອງກັນ ແລະ ຄຸ້ມຄອງໄພພິບັດແຫ່ງຊາດຈຶ່ງແຈ້ງໃຫ້ອໍານາດການປົກຄອງແຂວງ ແລະ ທ້ອງຖິ່ນທີ່ປະສົບໄພສັງລວມແຜນຄວາມຕ້ອງການຊ່ວຍເຫລືອ ແລະ ສະຫລຸບລາຍງານການຮັບບໍລິຈາກເພື່ອຊ່ວຍເຫລືອປະຊາຊົນຜູ້ປະສົບເຄາະຮ້າຍຈາກໄພພິບັດນ້ຳຖ້ວມນີ້ໃຫ້ຈະແຈ້ງຄື: ໃຫ້ຄະນະນຳຂອງແຂວງອັດຕະປືຊີ້ນຳພາກສ່ວນກ່ຽວຂ້ອງເອົາໃຈໃສ່ຄຸ້ມຄອງ, ເກັບຮັກສາ, ແຈກຢາຍທຶນຮອນ ແລະ ເຄື່ອງຊ່ວຍເຫລືອອຸປະໂພກ-ບໍລິໂພກ ທີ່ບັນດາອົງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ, ພະນັກງານ, ທະຫານ-ຕຳຫລວດ, ພາກທຸລະກິດ, ໂຄງການລົງທຶນທັງພາຍໃນ-ຕ່າງປະເທດ ແລະ ທຸກຊັ້ນຄົນໃນທົ່ວສັງຄົມ ທີ່ນຳມາຊ່ວຍເຫລືອປະຊາຊົນຜູ້ປະສົບເຄາະຮ້າຍຈາກໄພພິບັດດັ່ງກ່າວ ໂດຍໃຫ້ຄົ້ນຄວ້າວິທີການຈັດສົ່ງເຄື່ອງຊ່ວຍເຫລືອຈາກສຳນັກແຂວງໄປຫາສູນພັກຊົ່ວຄາວຂອງຜູ້ປະສົບໄພພິບັດທີ່ພາຫະນະສາມາດເຂົ້າເຖິງໂດຍກົງ ເພື່ອຫລຸດຜ່ອນຂັ້ນຕອນການເກັບຮັກສາເຄື່ອງຊ່ວຍເຫລືອຢູ່ຂັ້ນເມືອງ, ທັງຫລຸດຜ່ອນການຈັດຫາພາຫະນະຂົນສົ່ງ ແລະ ຄ່າແບກຫາບຕ່າງໆໃນແຕ່ລະຈຸດ. ພ້ອມນັ້ນໃຫ້ມີບັນຊີຕິດຕາມການຮັບ ແລະ ການແຈກຢາຍໃຫ້ແຕ່ລະຄອບຄົວຢ່າງລະອຽດ ແລະ ສະຫລຸບລາຍງານສົ່ງໃຫ້ກົມສັງຄົມສົງເຄາະກ່ອນ 16:00 ໂມງຂອງແຕ່ລະມື້. ໃຫ້ຄະນະນຳຂອງແຂວງ ແລະ ນະຄອນຫລວງວຽງຈັນທີ່ມີໄພພິບັດເກີດຂຶ້ນລະຫວ່າງກາງເດືອນມິຖຸນາ 2018 ມາເຖິງປັດຈຸບັນ ເພື່ອສັງລວມຄວາມຕ້ອງການຊ່ວຍເຫລືອດ້ານເຄື່ອງອຸປະໂພກ-ບໍລິໂພກ ແລະ ອຸປະກອນທີ່ຈຳເປັນລາຍງານສົ່ງກະຊວງແຮງງານ ແລະ ສະຫວັດດີການສັງຄົມ ,ພ້ອມທັງໃຫ້ສະຫລຸບລາຍງານການຮັບບໍລິຈາກຢູ່ພາຍໃນແຂວງຂອງຕົນສົ່ງໃຫ້ກົມສັງຄົມສົງເຄາະກ່ອນ 16:00 ໂມງແລງຂອງແຕ່ລະມື້, ໂດຍແຍກໃຫ້ເຫັນລະອຽດວ່າອັນໃດແມ່ນການຮັບບໍລິຈາກມາເພື່ອຊ່ວຍເຫລືອພາຍໃນແຂວງ ແລະ ອັນໃດຮັບມາເພື່ອນຳໄປຊ່ວຍເຫລືອປະຊາຊົນທີ່ປະສົບໄພນ້ຳຖ້ວມຢູ່ແຂວງອັດຕະປື. ໃຫ້ຄະນະນຳຂອງແຂວງ ແລະ ນະຄອນຫລວງວຽງຈັນ ນຳບັນດາສື່ມວນຊົນໃຫ້ເອົາໃຈໃສ່ເກັບກຳຂ່າວ, ສຳພາດຂ່າວ, ຖ່າຍພາບຕ່າງໆ ໂດຍເນັ້ນໃສ່ການມອບ-ຮັບ, ການນຳໃຊ້ເຄື່ອງຊ່ວຍເຫລືອທີ່ການຈັດຕັ້ງ ແລະ ສັງຄົມໄດ້ມອບໃຫ້ຄອບຄົວ ຫລື ຜູ້ທີ່ຖືກຜົນກະທົບໄພພິບັດຕົວຈິງ. ກໍລະກົດນີ້ມີບັນດາແຂວງແຮກສ່ຽວຂອງປະເທດເພື່ອນມິດຈະນຳເອົາເຄື່ອງມາຊ່ວຍເຫລືອປະຊາຊົນຜູ້ປະສົບເຄາະຮ້າຍຈາກໄພພິບັດນ້ຳຖ້ວມ ຂໍໃຫ້ຄະນະນຳແຕ່ລະແຂວງ ແລະ ນະຄອນຫລວງວຽງຈັນ ຊີ້ນຳພະແນກການກ່ຽວຂ້ອງປະສານສົມທົບຢ່າງກົມກຽວເພື່ອອຳນວຍຄວາມສະດວກໃຫ້ແກ່ການນຳເຂົ້າເຄື່ອງຊ່ວຍເຫລືອດັ່ງກ່າວດີຂຶ້ນກວ່າເກົ່າ.
