ອົງການກາແດງລາວລົງມອບເຄື່ອງຊ່ວຍເຫຼືອຜູ້ປະສົບໄພຢູ່ແຂວງອັດຕະປື

ໃນວັນທີ 29 ກໍລະກົດ ນີ້,  ອົງການກາແດງລາວ ຮ່ວມກັບກາແດງແຂວງອັດຕະປື ນໍາໂດຍທ່ານຫົວໜ້າກອງຊ່ວຍເຫຼືອບັນເທົາທຸກ ອົງການກາແດງລາວ ໄດ້ລົງມອບເຄື່ອງຊ່ວຍເຫຼືອໃຫ້ປະຊາຊົນທີ່ປະສົບໄພນໍ້າຖ້ວມ ຢູ່ສູນອົບພະຍົກໂຮງຮຽນ ມສ ສະໜາມໄຊ ແຂວງອັດຕະປື ຊຶ່ງເປັນໜຶ່ງໃນ 5 ສູນ  ທີ່ລັດຖະບານຈັດສັນໃຫ້ເປັນບ່ອນພັກເຊົາຊົ່ວຄາວຂອງປະຊາຊົນທີ່ໄດ້ຮັບຜົນກະທົບຈາກໄພພິບັດດັ່ງກ່າວ, ຊຶ່ງເຄື່ອງທີ່ມາຊ່ວຍເຫຼືອໃນຄັ້ງນີ້ປະກອບມີ: ເຄື່ອງນຸ່ງຫົ່ມ, ເຄື່ອງນອນ, ມຸ້ງ, ສາດ, ໝໍ້, ຖ້ວຍ, ອາຫານສຳເລັດຮູບ ແລະ ອື່ນໆ ລວມມີມູນຄາ 300 ກວ່າລ້ານກີບ, ໂດຍແມ່ນເງິນສະພາກາແດງ ແລະ ໄດ້ຈາກການລະດົມຂອງສັງຄົມ ເພື່ອຊ່ວຍເຫຼືອຜູ້ປະສົບໄພພິບັດຕ່າງໆ

ຄະນະກຳມະການດັ່ງກ່າວໃຫ້ຮູ້ວ່າ: ໄພພິບັດຄັ້ງນີ້ນອກຈາກສົ່ງຜົນກະທົບໃຫ້ຊີວິດ ແລະ ຊັບສິນຂອງປະຊາຊົນເສຍຫາຍຢ່າງຫຼວງຫຼາຍແລ້ວ ຍັງສົ່ງຜົນກະທົບຕໍ່ເຮືອນຊານບ້ານຊ່ອງ, ຖະໜົນຫົນທາງ, ພື້ນຖານໂຄງລ່າງ, ໂຮງຮຽນ, ໂຮງໝໍ, ພື້ນທີ່ທຳການຜະລິດ ແລະ ອື່ນໆ ໃນນັ້ນມີ 13 ບ້ານເຊັ່ນ: ບ້ານໃໝ່, ຫີນລາດ, ສະໜອງໃຕ້, ທ່າແສງຈັນ, ຕະໜໍຍອດ, ທ່າຫີນໃຕ້, ທ່າບົກ, ບ້ານມ່ວງ ແລະ ອື່ນໆ ໄດ້ຜົນກະທົບຢ່າງໜັກໜ່ວງ ປະຊາຊົນ ສູນຫາຍ 131 ຄົນ ແລະ ເສຍຊີວິດທີ່ພົບເຫັນແລ້ວ 9 ສົບ.