ແຂ່ງຂັນກິລາ 2 ປະເພດ ສະຫລອງວັນສໍາຄັນຂອງຊາດ
ງານແຂ່ງຂັນກິລາ 2 ປະເພດ ຊີງຂັນຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫລວງວຽງຈັນ (ຖວທ.ນວ) ເພື່ອຂໍ່ານັບຮັບຕ້ອນວັນສໍາຄັນຕ່າງໆຂອງຊາດ ໂດຍສະເພາະເປັນການຂໍ່ານັບຮັບຕ້ອນກອງປະຊຸມໃຫຍ່ຂອງອົງການຈັດຕັ້ງມະຫາຊົນ ພະແນກ ຖວທ.ນວ ຈັດຂຶ້ນວັນທີ 26-27 ກໍລະກົດຜ່ານມາ ທີ່ໂຮງພິມນະຄອນຫລວງວຽງຈັນ ມີທ່ານ ຄໍາປະດິດ ເຂັມມານິດ ຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫລວງວຽງຈັນ, ມີບັນດາຮອງຫົວໜ້າພະແນກ ຖວທ, ຜູ້ອໍານວຍການໂຮງພິມ ພ້ອມດ້ວຍພະນັກງານວິຊາການ 3 ອົງການຈັດຕັ້ງມະຫາຊົນ ແລະ ນັກກິລາເຂົ້າຮ່ວມ.
ການແຂ່ງຂັນຄັ້ງນີ້ປະກອບມີ 2 ປະເພດຄື: ກິລາເປຕັງ ແລະ ປິ່ງປ່ອງ, ຜ່ານການແຂ່ງຂັນຜົນປາກົດວ່າ: ປະເພດເປຕັງຊາຍ ຊະນະເລີດ ໄດ້ແກ່ ຂະແໜງທ່ອງທ່ຽວ 1, ຮອງຊະນະເລີດ ພະແນກ ຖວທ 1 ແລະ ອັນດັບ 3 ສູນວັດທະນະທໍາເດັກ+ຫໍສະໝຸດ. ສ່ວນເປຕັງເພດຍິງ ຊະນະເລີດ ຂະແໜງທ່ອງທ່ຽວ, ຮອງຊະນະເລີດ ວິທະຍຸ-ໂທລະພາບ ນວ ແລະ ອັນດັບ 3 ໜັງສືພິມວຽງຈັນໃໝ່ ແລະ ປະເພດປິ່ງປ່ອງຊາຍ ຊະນະເລີດ ໜັງສືພິມວຽງຈັນໃໝ່ 3, ໜັງສືພິມວຽງຈັນໃໝ່ 2 ແລະ ໜັງສືພິມວຽງຈັນໃໝ່ 1. ສ່ວນລາງວັນແຕ່ລະປະເພດ ແມ່ນໄດ້ຮັບຂັນ+ເງິນສົດຈໍານວນໜຶ່ງ.
