ນ້ຳຖ້ວມໜັກໃນມຽນມາ ເສຍຊີວິດຢ່າງໜ້ອຍ 10 ຄົນ
ມີຜູ້ເສຍຊີວິດແລ້ວ 10 ຄົນ ແລະ ອີກຫລາຍກວ່າ 50.000 ຄົນຕ້ອງອົບພະຍົບ ຈາກເຫດອຸທົກກະໄພຄັ້ງຮຸນແຮງທີ່ສຸດໃນຮອບຫລາຍປີຂອງມຽນມາ.
ສຳນັກຂ່າວຕ່າງປະເທດລາຍງານຈາກເມືອງຢາງກຸ້ງ ປະເທດມຽນມາ ໃນວັນທີ 30 ກໍລະກົດວ່າ: ກະຊວງສະຫວັດດີການສັງຄົມຂອງມຽນມາ ລາຍງານຈຳນວນຜູ້ເສຍຊີວິດຢ່າງໜ້ອຍ 10 ຄົນ ໃນຈຳນວນນີ້ເປັນທະຫານຢ່າງໜ້ອຍ 3 ຄົນ ຈາກອຸທົກກະໄພເຊິ່ງເກີດຂຶ້ນເປັນວົງກວ້າງໃນຫລາຍພື້ນທີ່ຂອງປະເທດ ສ່ວນຫລາຍເປັນເຂດລຸ່ມນ້ຳອີລະວະດີ ແລະ ແມ່ນ້ຳສາຂາ. ຂະນະທີ່ປະຊາຊົນຫລາຍກວ່າ 54.000 ຄົນຕ້ອງອົບພະຍົບ ໂດຍລັດຖະບານຈັດຕັ້ງສູນພັກຊົ່ວຄາວແລ້ວຢ່າງໜ້ອຍ 163 ແຫ່ງ.
Surging floodwaters have killed at least 10 people and forced tens of thousands from their homes across swathes of Myanmar. Vast areas of farmland have been submerged by muddy water stretching to the horizon, with only the rooftops of some houses visible https://t.co/YwNOC3WtYQ
— AFP News Agency (@AFP) July 29, 2018
ທ່ານ ມາຍິນ ມາຍິນ ຖັນ ໜຶ່ງໃນຜູ້ປະສົບໄພໃນເຂດພະໂຄ ກ່າວກັບສຳນັກຂ່າວ AFP ວ່າ: ເຖິງວ່າມຽນມາຕ້ອງຜະເຊີນກັບນ້ຳຖ້ວມເກືອບທຸກປີ, ແຕ່ສະຖານະການໃນປີນີ້ຖືວ່າຮ້າຍແຮງຫລາຍ. ລາຍງານຂອງສະຫະປະຊາຊາດ (UN) ລະບຸວ່າ: ມຽນມາເປັນໜຶ່ງໃນປະເທດປະສົບກັບໄພທຳມະຊາດ ໂດຍສະເພາະອຸທົກກະໄພຫລາຍທີ່ສຸດໃນໂລກ ແລະ ດັດຊະນີຄວາມສ່ຽງສະພາບອາກາດໂລກເຄີຍຈັດໃຫ້ມຽນມາເປັນອັນດັບ 1 ຂອງປະເທດໄດ້ຮັບຜົນກະທົບຈາກໄພທຳມະຊາດຫລາຍທີ່ສຸດ ໃນປີ 2015.
ທັງນີ້, ໄພທຳມະຊາດຄັ້ງຮ້າຍແຮງທີ່ສຸດໃນປະຫວັດສາດຍຸກໃໝ່ຂອງມຽນມາ ຄືອິດທິພົນຈາກພາຍຸໄຊໂຄນນາກິດ ໃນເດືອນພຶດສະພາ 2008 ຂ້າຊີວິດປະຊາຊົນຢ່າງໜ້ອຍ 138.000 ຄົນ.
