ການຊໍາລະພາສີທີ່ດິນຜ່ານລະບົບທັນສະໄໝຈະປະຕິບັດໃນຕົ້ນປີ 2019
ໃນວັນທີ 24 ກໍລະກົດນີ້, ກົມສ່ວຍສາອາກອນກະຊວງການເງິນ, ໄດ້ຈັດກອງປະຊຸມລາຍງານຄວາມຄືບໜ້າການພັດທະນາການຊໍາລະພາສີທີ່ດິນຜ່ານລະບົບທັນສະໄໝ, ໂດຍການເປັນປະທານຂອງທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ໂດຍໄດ້ລາຍງານໃຫ້ຮູ້ວ່າ: ເພື່ອຮັບປະກັນການຈັດເກັບລາຍຮັບພາສີທີ່ດິນປະຈໍາປີໃຫ້ຖືກຕ້ອງ, ສອດຄ່ອງທັນກໍານົດເວລາ ແລະ ເພື່ອຫັນເປັນທັນສະໄໝໃນການເກັບລາຍຮັບເຂົ້າງົບປະມານແຫ່ງລັດ ໂດຍສະເພາະການຊໍາລະພາສີທີ່ດິນຜ່ານລະບົບທະນາຄານ, ກົມສ່ວຍສາອາກອນ ຮ່ວມກັບທະນາ ຄານການຄ້າຕ່າງປະເທດລາວ ມະຫາຊົນ (ທຄຕລ) ຄົ້ນຄວ້າພັດທະນາລະບົບການຊໍາລະພາສີທີ່ດິນຜ່ານທະນາຄານເຫັນວ່າມີຄວາມຄືບໜ້າດີ, ຊຶ່ງມາຮອດປັດຈຸບັນໄດ້ມີແຜນການດໍາເນີນງານຢ່າງລະອຽທັງໝົດ 17 ໜ້າວຽກ, ສຳເລັດໃນການຮ່າງສັນຍາ ແລະ ຮ່າງແບບໃບຮັບເງິນທະນາຄານການຄ້າຕ່າງປະເທດລາວມະຫາຊົນ (ທຄຕລ) ແລ້ວ ໂດຍສະເພາະການລົງສໍາຫລວດເກັບກໍາຂໍ້ມູນຕອນດິນຢູ່ 4 ເມືອງ 16 ບ້ານໃນນະຄອນຫຼວງວຽງຈັນໄດ້ທັງໝົດຈໍານວນ 200.000 ຕອນເປັນຂໍ້ມູນລະອຽດແຍກເປັນແຕ່ລະປະເພດທີ່ດິນ ແລະ ໄດ້ເອົາເຂົ້າຖານຂໍ້ມູນຮຽບຮ້ອຍແລ້ວ. ນອກຈາກນັ້ນ, ຍັງຂໍ້ມູນຈາກຂະແໜງການຊັບພະຍາ ກອນທຳມະຊາດ ແລະ ສິ່ງແວດລ້ອມເປັນຂໍ້ມູນຕາມໃບຕາດິນແຕ່ປີ 2010 ເປັນຕົ້ນມາ (ຂໍ້ມູນດິບ) ຈໍານວນ 1.000.000 ຕອນ, ການພັດທະນາລະບົບໃນການຊໍາລະຜ່ານລະບົບທະນາຄານ, ທະນາຄານການຄ້າຕ່າງປະເທດລາວ ມະຫາຊົນໄດ້ພັດທະນາສຳເລັດແລ້ວ 90% ຄາດວ່າຈະທົດລອງນໍາໃຊ້ຕົວຈິງໃນທ້າຍປີ 2018 ແລະ ນໍາໃຊ້ເປັນທາງການຕົ້ນປີ 2019 ທີ່ຈະມາເຖິງນີ້.
ໃນໂອກາດນີ້, ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນທ ໄດ້ມີຄຳເຫັນຊີ້ນໍາກ່ຽວກັບວຽກງານການພັດທະນາການຊໍາລະພາສີທີ່ດິນຜ່ານລະບົບທັນສະໄໝ ແລະ ບັນຫາທີ່ເປັນຂໍ້ຄົງຄ້າງນຳມາປັບປຸງແກ້ໄຂໃຫ້ທັນກັບເວລາ ແລະ ດີຂຶ້ນກວ່າເກົ່າ. ເພື່ອເຮັດໃຫ້ວຽກງານດັ່ງກ່າວໄດ້ຮັບປະສິດທິຜົນສູງ, ສ້າງຄວາມສະດວກສະບາຍໃຫ້ແກ່ພາກລັດ, ປະຊາຊົນບັນດາເຜົ່າໄດ້ມີຄວາມຕື່ນຕົວໃນການປະກອບສ່ວນເສຍພາສີທີ່ດິນດ້ວຍລະບົບເອເລັກໂຕນິກທີ່ທັນສະໄໝ ຜ່ານລະບົບທະນາຄານການຄ້າຕ່າງປະເທດລາວມະຫາຊົນ ແລະ ເນັ້ນໃຫ້ຜູ້ພັດທະນາລະບົບ, ຜູ້ປະຕິບັດຕົວຈິງໂຄສະນາເຜີຍແຜ່ຂໍ້ມູນ ແລະ ພ້ອມພຽງກັນປະສານງານສົມທົບການຈັດຕັ້ງປະຕິບັດຢ່າງເຂັ້ມງວດເພື່ອເຮັດໃຫ້ວຽກງານດັ່ງກ່າວໄດ້ປະສົບຜົນສໍາເລັດສູງ.
