ກຸ່ມບໍລິສັດ ຮວ່າງແອງ ຢາລາຍ ລະດົມກຳລັງແຮງ ແລະ ວັດຖຸສິ່ງຂອງຊ່ວຍເຫລືອປະຊາຊົນລາວຜູ້ປະສົບໄພພິບັດຢູ່ແຂວງອັດຕະປື
ຕາມການລາຍງານຂອງກຸ່ມບໍລິສັດ ຮວ່າງແອງ ຢາລາຍ ໃຫ້ຮູ້ວ່າ: ພາຍຫລັງໄດ້ຮັບຂ່າວກ່ຽວກັບເຫດການນ້ຳເຂື່ອນໄຟຟ້າເຊປຽນ-ເຊນ້ຳນ້ອຍແຕກ ທີ່ແຂວງອັດຕະປື (ສປປ ລາວ) ໃນແລງວັນທີ 23 ກໍລະກົດຜ່ານມານີ້ ທ່ານ ດວານ ຫງວຽນ ດຶກ ປະທານສະພາບໍລິຫານກຸ່ມບໍລິສັດ ຮວ່າງແອງ ຢາລາຍ ໄດ້ລົງມາຊີ້ນຳໂດຍກົງຕໍ່ການຊ່ວຍເຫລືອບັນເທົາທຸກສຸກເສີນຊ່ວຍປະຊາຊົນຜູ້ປະສົບເຄາະຮ້າຍດັ່ງກ່າວ ເພື່ອແບ່ງເບົາ ແລະ ຊ່ວຍຟື້ນຟູໄພພິບັດຄັ້ງນີ້. ໃນເຊົ້າວັນທີ 25 ກໍລະກົດ ເຊິ່ງກຸ່ມບໍລິສັດ ຮວ່າງແອງ ຢາລາຍ ໄດ້ຮີບຮ້ອນສົ່ງທີມແພດໝໍ ແລະ ພະຍາບານທີ່ມີປະສົບການສູງຈາກໂຮງໝໍຂອງກຸ່ມບໍລິສັດ ຮວ່າງແອງ ຢາລາຍ 14 ທ່ານ ມາຮ່ວມກັບໂຮງໝໍອັດຕະປື ປະຕິບັດໜ້າທີ່ໃຫ້ການຊ່ວຍເຫລືອປິ່ນປົວຜູ້ທີ່ຖືກເຄາະຮ້າຍຄັ້ງນີ້ໄດ້ຢ່າງທັນການ, ພ້ອມໄດ້ຈັດສົ່ງໝີ່ສຳເລັດຮູບ 100.000 ຫໍ່, ເຂົ້າສານ 50 ໂຕນ, ເຄື່ອງນຸ່ງ 2.000 ຊຸດ, ຖົງບາໂລໃຊ້ສະເພາະການແພດ, ຢາປົວພະຍາດຕ່າງໆ ແລະ ສິ່ງຂອງທີ່ຈຳເປັນ ຈຳນວນ 100 ຖົງ ມາໃຫ້ການຊ່ວຍເຫລືອໂດຍດ່ວນ. ນອກຈາກນີ້ ກຸ່ມບໍລິສັດ ຮວ່າງແອງ ຢາລາຍ ຍັງໄດ້ປະສານງານຈ້າງຍົນເຮລິບກົບແຕບິນຈາກນະຄອນຫລວງວຽງຈັນເຂົ້າຮ່ວມການກູ້ໄພຊ່ວຍເຫລືອຢ່າງທັນການ ແລະ ໃນວານນີ້, ທ່ານປະທານສະພາບໍລິຫານ ກຸ່ມບໍລິສັດ ຮວ່າງ ແອງ ຢາລາຍ ດວານ ຫງວຽນ ດຶກ ໄດ້ມີໜ້າຢູ່ສະໜາມເພື່ອຊີ້ນຳໜ້າວຽກໃຫ້ການຊ່ວຍເຫລືອໄພພິບັດຄັ້ງນີ້ດ້ວຍຕົນເອງອີກດ້ວຍ.
