ແລ່ນ-ລານຍາດໄດ້ຫລຽນທອງ ອີກຫລຽນໃຫ້ ສປປ ລາວ

ນັກກິລາແລ່ນ-ລານທີມຊາດລາວ ສາມາດຍາດໄດ້ 1 ຫລຽນທອງມາໃຫ້ແກ່ ສປປ ລາວ ເປັນຫລຽນທີ 3 ໃນການແຂ່ງຂັນງານກິລານັກຮຽນອາຊຽນຄັ້ງທີ 10 ທີ່ມາເລເຊຍ 19-27 ກໍລະກົດນີ້.

ການແຂ່ງຂັນຄັ້ງນີ້ ສປປ ລາວ ສົ່ງນັກກິລາເຂົ້າຮ່ວມທັງໝົດ 4 ປະເພດກິລາຄື: ແລ່ນ-ລານ, ກະຕໍ້, ດອກປີກໄກ່ ແລະ ລອຍນໍ້າ.  ສໍາລັບຫລຽນທອງໃນປະເພດແລ່ນ-ລານຂອງລາວ ໄດ້ຈາກນາງ ຈິນຕະຫລາ ນັກກິລາແກວ່ງຄ້ອນເຍົາວະຊົນ ໂດຍສະຖິຕິແກວ່ງໄດ້ 29,63 ແມັດ, ຫລຽນຄຳເປັນຂອງນັກກິລາຈາກເຈົ້າພາບມາເລເຊຍ ແກວ່ງໄດ້ 59,63 ແມັດ ເປັນສະຖິຕິໃໝ່ຂອງກິລານັກຮຽນອາຊຽນ, ຫລຽນເງິນເປັນຂອງນັກກິລາຈາກອິນໂດເນເຊຍ ແກວ່ງໄດ້ 47,33 ແມັດ.

ສໍາລັບການແຂ່ງຂັນຄັ້ງນີ້ ນັກກິລາລາວເຮົາສາມາດຍາດໄດ້ 3 ຫລຽນທອງແລ້ວ ໂດຍຫລຽນທອງທໍາອິດໄດ້ຈາກປະເພດກິລາກະຕໍ້ທີມດ່ຽວຊາຍ ແລະ ດອກປີກໄກ່ທີມຊຸດຊາຍ.