ສະຫວັນນະເຂດກະກຽມກິລາປະເພດຕ່າງໆ ເຂົ້າຮ່ວມງານມະຫາກຳກິລາແຫ່ງຊາດທີ່ຊຽງຂວາງ
ໃນວັນທີ 24 ກໍລະກົດນີ້, ແຂວງສະຫວັນນະເຂດ ໄດ້ລາຍງານການກະກຽມກິລາປະເພດຕ່າງໆສູ່ງານມະຫາກຳກິລາແຫ່ງຊາດ ຄັ້ງທີ 11 ຊຽງຂວາງ ເກມ 2018 ໂດຍການເຂົ້າຮ່ວມຂອງທ່ານ ຄຳພູນ ຕຸໄພທູນ ຮອງເຈົ້າແຂວງດັ່ງກ່າວ.
ຮອງຫົວໜ້າພະແນກສຶກສາ-ກິລາແຂວງ ໄດ້ລາຍງານວ່າ: ມາຮອດປັດຈຸບັນ ແຂວງສະຫວັນນະເຂດສາມາດກະກຽມ 23 ປະເພດກິລາເຂົ້າຮ່ວມຄື: ກິລາແລ່ນ-ລານ (ຊາຍ-ຍິງ), ບານເຕະ (ຊາຍ-ຍິງ), ດອກປີກໄກ່ (ຊາຍ-ຍິງ), ເທຄວັນໂດ້ (ຍິງ-ຊາຍ), ມວຍສາກົນ (ຍິງ-ຊາຍ), ມວຍວູຊູ (ຊາຍ), ມວຍລາວ (ຍິງ-ຊາຍ), ຢູໂດ (ຊາຍ-ຍິງ), ຍິງປືນ (ຍິງ-ຊາຍ), ປັ່ນຈັກສີລັດ (ຍິງ-ຊາຍ), ເປຕັງ (ຊາຍ-ຍິງ), ກະຕ້ໍ (ຊາຍ-ຍິງ), ບານສົ່ງໃນຮົ່ມ (ຊາຍ-ຍິງ), ເທັນນິດ (ຊາຍ-ຍິງ), ລອຍນ້ຳ (ຊາຍ-ຍິງ), ບານບ້ວງຊາຍ, ປິ່ງປ໋ອງ (ຍິງ-ຊາຍ), ກ໊ອຟຊາຍ, ລົດຖີບ, ສະນຸກເກີ້, ໜ້າເກັກ, ຍິງທະນູ, ຊ່ວງເຮືອຊາຍ ລວມນັກກິລາທັງໝົດ 253 ຄົນ, ຄູຝຶກ 60 ຄົນ ຈຳນວນນັກກິລາແຕ່ລະປະເພດແມ່ນຈະໄດ້ເຂົ້າຮ່ວມຝຶກໃນເດືອນສິງຫາທີ່ຈະມາເຖິງ ແລ້ວຍັງຈະມີການຄັດເລືອກນັກກິລາເພີ່ມຕື່ມອີກ ໂດຍຄາດວ່າຈະໃຊ້ງົບປະມານທັງໝົດ 849 ລ້ານກວ່າກີບ.
