ເກຣັກປະກາດສະຖານະການສຸກເສີນ ຈາກໄຟໄໝ້ປ່າຄັ້ງໃຫຍ່
ລັດຖະບານເກຣັກປະກາດສະຖານະການສຸກເສີນຈາກໄຟໄໝ້ປ່າຄັ້ງຮຸນແຮງທີ່ສຸດໃນຮອບ 1 ທົດສະວັດ ເຊິ່ງຂ້າຊີວິດປະຊາຊົນຫລາຍກວ່າ 50 ຄົນ ແລະ ຂໍການຊ່ວຍເຫລືອຢ່າງຮີບດ່ວນຈາກສະຫະພາບເອີຣົບ.
Greek PM Tsipras cut short his visit to Bosnia and returned to Greece as his country battles a large wildfire east of Athens pic.twitter.com/iJB4TZI45S
— TRT World Now (@TRTWorldNow) July 24, 2018
ສຳນັກຂ່າວຕ່າງປະເທດລາຍງານວ່າ: ລັດຖະບານເກຣັກລາຍງານໃນວັນທີ 23 ກໍລະກົດວ່າ: ຈຳນວນຜູ້ເສຍຊີວິດຈາກສະຖານະການໄຟໄໝ້ປ່າຫລາຍສິບຈຸດໃນບໍລິເວນໃກ້ກັບນະຄອນຫລວງເອເທນ ມີຫລາຍກວ່າ 50 ຄົນ ແລະ ມີຜູ້ໄດ້ຮັບບາດເຈັບອີກປະມານ 170 ຄົນ ສ່ວນຫລາຍພົບຢູ່ເມືອງມາຕີ ເຊິ່ງເປັນເມືອງຕັ້ງຢູ່ແຄມຝັ່ງທາງຕາເວັນອອກຂອງປະເທດ ຫ່າງຈາກນະຄອນຫລວງເອເທນປະມານ 40 ກິໂລແມັດ. ຂະນະທີ່ ນາຍົກລັດຖະມົນຕີ ອາເລັກຊິສ ຊີປຣາສ ປະກາດສະຖານະການສຸກເສີນຈາກໄຟໄໝ້ປ່າຄັ້ງນີ້ແລ້ວ ແລະ ຍື່ນເລື່ອງຂໍການຊ່ວຍເຫລືອຈາກສະຫະພາບເອີຣົບ (EU), ສ່ວນແອັສປາຍ ແລະ ໄຊປຣັສ ເຊິ່ງຢູ່ໃກ້ທີ່ສຸດສະເໜີມອບການຊ່ວຍເຫລືອ.
ທັງນີ້, ລັດຖະບານເກຣັກຕີລາຄາວ່າ: ສະຖານະການໄຟໄໝ້ປ່າຄັ້ງນີ້ມີຄວາມຮຸນແຮງທີ່ສຸດໃນຮອບ 1 ທົດສະວັດ ໂດຍຈຳນວນຜູ້ເສຍຊີວິດ ແລະ ການເກີດຄວາມເສຍຫາຍກັບສິ່ງປຸກສ້າງ ແລະ ເນື້ອທີ່ກະສິກຳຈາກໄຟໄໝ້ປ່າຄັ້ງນີ້ມີທ່າອ່ຽງເພີ່ມຂຶ້ນອີກ ຫລັງມີລາຍງານເຮືອນຫລາຍກວ່າ 100 ຫລັງໄດ້ຮັບຄວາມເສຍຫາຍ ເນື່ອງຈາກສະພາບອາກາດຈະຍັງຮ້ອນອົບເອົ້າ ໂດຍອຸນຫະພູມຢູ່ລະດັບ 40 ອົງສາ ແລະ ກະແສລົມທີ່ມີຄວາມໄວສູງເຖິງ 100 ກິໂລແມັດຕໍ່ຊົ່ວໂມງ ກຳລັງເປັນອຸປະສັກໃຫ້ແກ່ເຈົ້າໜ້າທີ່ມອດໄຟໃນການຄວບຄຸມສະຖານະການ.
