ທ່ານ ທຣຳ ເຕືອນອີຣານຢ່າມາຂູ່ອາເມລິກາ
ປະທານາທິບໍດີ ໂດນັລ ທຣຳ ຜູ້ນຳອາເມລິກາ ເຕືອນປະທານາທິບໍດີ ຮັສຊັນ ໂຣຮານີ ຜູ້ນຳອີຣານວ່າ: ຢ່າມາຂົ່ມຂູ່ອາເມລິກາອີກ, ພາຍຫລັງຜູ້ນຳອີຣານເຕືອນທ່ານ ທຣຳ ວ່າ: ຢ່າດຳເນີນນະໂຍບາຍທີ່ເປັນປໍລະປັກກັບອີຣານ.
ທ່ານ ທຣຳ ສະແດງຂໍ້ຄວາມລົງທະວິດເຕີວ່າ: ຢ່າມາຂົ່ມຂູ່ອາເມລິກາອີກ ບໍ່ສະນັ້ນຕ້ອງຖືກຕອບໂຕ້ໜັກໜ່ວງແບບບໍ່ເຄີຍມີມາກ່ອນ, ຫລັງຈາກທ່ານ ໂຣຮານີ ກ່າວໃນວັນທີ 22 ກໍລະກົດວ່າ: ຢ່າຄິດເຮັດສົງຄາມກັບອີຣານທີ່ປຽບເໝືອນເທບພະເຈົ້າແຫ່ງສົງຄາມ, ແຕ່ບໍ່ໄດ້ປະຕິເສດແນວທາງສັນຕິພາບລະຫວ່າງອີຣານກັບອາເມລິກາ. ທ່ານ ທຣຳ ກ່າວຕອບກັບວ່າ: ອາເມລິກາບໍ່ແມ່ນປະເທດທີ່ຈະທົນຕໍ່ຄຳຂົ່ມຂູ່ ແລະ ໃຫ້ອີຣານລະວັງຕົວໃຫ້ດີ.
ປະທານາທິບໍດີ ໂຣຮານີ ຂອງອີຣານ ເຕືອນປະທານາທິບໍດີ ທຣຳ ວ່າ: ບໍ່ຄວນຍົ່ວຍຸອີຣານ ບໍ່ສະນັ້ນຈະຕ້ອງເສຍໃຈຢ່າງແນ່ນອນ ຫລັງຈາກໃນປີຜ່ານມາທ່ານ ທຣຳ ຕັດສິນໃຈນຳອາເມລິກາຖອນຕົວຈາກຂໍ້ຕົກລົງນິວເຄຼຍລະຫວ່າງອີຣານກັບກຸ່ມປະເທດມະຫາອຳນາດຕາເວັນຕົກ, ພ້ອມທັງສັ່ງເພີ່ມມາດຕະການລົງໂທດຕໍ່ອີຣານ. ທ່ານ ໂຣຮານີ ຍັງເນັ້ນອີກວ່າ: ອາເມລິກາບໍ່ສາມາດຈະລະງັບອີຣານໃນການຂາຍນ້ຳມັນໃຫ້ຕະຫລາດໂລກໄດ້ ຫລັງຈາກເຄີຍກ່າວວ່າ: ອີຣານຈະຈະຂັດຂວາງເສັ້ນທາງຂົນສົ່ງນ້ຳມັນຜ່ານທາງຊ່ອງແຄບຮໍມູສ ຖ້າການສົ່ງອອກນ້ຳມັນຂອງອີຣານຖືກຄຸມຄາມ.
ທ່ານ ໄມ ປອມເປໂອ ລັດຖະມົນຕີຕ່າງປະເທດອາເມລິກາ ກ່າວວ່າ: ອາເມລິກາບໍ່ຢ້ານກົວທີ່ຈະຮັບມືກັບອີຣານດ້ວຍມາດຕະການລົງໂທດຂັ້ນສູງສຸດ, ໃນເດືອນພຶດສະພາ ທ່ານ ປອມເປໂອ ໄດ້ເປີດເຜີຍຍຸດທະສາດໃໝ່ ເພື່ອບີບບັງຄັບໃຫ້ອີຣານປະຕິບັດຕາມຂໍ້ຮຽກຮ້ອງ ແລະ ຢືນຢັນວ່າອາເມລິກາຕ້ອງການໃຫ້ທຸກປະເທດຫລຸດການນຳເຂົ້ານ້ຳມັນຈາກອີຣານຈົນເຫລືອສູນພາຍໃນວັນທີ 4 ພະຈິກ ແລະ ຈະມີມາດຕະການອື່ນໆຕາມມາອີກ.
