ສິ່ງທ້າທາຍຂອງວຽກງານກະສິກໍາຊົນນະບົດຢູ່ປະເທດເຮົາ

ທ່ານລັດຖະມົນຕີກະຊວງກະສິກໍາ-ປ່າໄມ້ ລຽນ ທີແກ້ວ ໄດ້ໃຫ້ຮູ້ວ່າ: ໃນຊຸມປີຜ່ານມາ, ພັກ ແລະ ລັດຖະບານ ໄດ້ສຸມທຶນຮອນເຂົ້າໃນການພັດທະນາກະສິກໍາຊົນນະບົດ ເພື່ອປົດປ່ອຍຊາວກະສິກອນອອກຈາກຄວາມທຸກຍາກໄດ້ມີຜົນສໍາເລັດເປັນກ້າວໆມາ, ຊຶ່ງມັນສະແດງອອກໃຫ້ເຫັນແມ່ນຊົນນະບົດໃນຫລາຍທ້ອງຖິ່ນໄດ້ມີໃບໜ້າພັດທະນາປ່ຽນແປງດີຂຶ້ນ, ແຕ່ແນວໃດກໍຕາມ, ເມື່ອທຽບໃສ່ຄວາມຮຽກຮ້ອງຕ້ອງການຕົວຈິງແລ້ວ ກະສິກໍາ ແລະ ຊົນນະບົດ ນັບທັງຊາວກະສິກອນ ເຫັນວ່າຍັງປະເຊີນກັບສິ່ງທ້າທາຍຫລາຍປະການ ເປັນຕົ້ນ: ເສດຖະກິດຂອງຊົນນະບົດພວກເຮົາຍັງແມ່ນເສດຖະກິດກະສິກໍາຂອງຜູ້ຜະລິດນ້ອຍ, ແນວຄິດການຜະລິດກະສິກໍາເປັນສີນຄ້າຂະຫຍາຍຕົວຊ້າ, ເຮັດພໍໃຜພໍລາວ ແລະ ບໍ່ໄດ້ເອົາໃຈໃສ່ໃນດ້ານຍົກສຸງສະມັດຕະພາບ ຫລື ຄຸນນະພາບຂອງສີນຄ້າ. ອີກດ້ານໜຶ່ງການພັດທະນາກະສິກໍາຢູ່ປະເທດເຮົາຍັງຂາດການພະຍາກອນທີ່ດີໃນໄລຍະຍາວ, ດັ່ງນັ້ນຈຶ່ງບໍ່ທັນມີແຜນຍຸດທະສາດໃນການພັດທະນາປະເພດພືດ, ໄມ້ໃຫ້ໝາກ, ປະເພດສັດລ້ຽງທີ່ເປັນທ່າແຮງ, ສອດຄ່ອງກັບຄວາມຕ້ອງການຂອງຕະຫລາດ, ເປັນສາເຫດໃຫ້ຊາວກະສິກອນແລ່ນນໍາແຕ່ການເພີ່ມຂຶ້ນຂອງລາຄາໃນໄລຍະສັ້ນ, ແຂ່ງຂັນກັນຂະຫຍາຍເນື້ອທີ່ ເມື່ອເວລາຜົນຜະລິດອັ່ງຕະຫລາດ,​ ລາຄາຕົກຕໍ່າ ກໍພາກັນຢຸດເຊົາ ຫລື າກົດການຊາວກະສິກອນທໍາລາຍຜົນຜະລິດຂອງຕົນຖີ້ມກໍມີມາແລ້ວ. ນອກນີ້, ໃນເຂດຊົນນະບົດຢູ່ປະເທດເຮົາມີປະຊາກອນດໍາລົງຊີວິດ ແລະ ທໍາມາຫາກິນກວມປະມານ 70% ໃນທົ່ວປະເທດ, ແຕ່ລາຍຮັບຂອງຄົນຊົນນະບົດທັບກັບຄົນຢູ່ຕົວເມືອງແມ່ນແຕກໂຕນກັນຫລາຍ, ຫລາຍເຂດຍັງມີຄວາມຫຍຸ້ງຍາກດ້ານການດໍາລົງຊີວິດການເປັນຢູ່, ແຕ່ຂະນະດຽວກັນຄ່າໃຊ້ຈ່າຍຄອງຊີບຊໍ້າພັດສູງ. ນອກນີ້ ເສດຖະກິດຕະຫລາດ ເຖິງວ່າເປັນກົນໄກບຸກທະລຸໃຫ້ຊົນນະບົດມີການພັດທະນາ, ແຕ່ເຫັນວ່າຊາວກະສິກອນຊົນນະບົດສ່ວນຫລາຍແມ່ນອັບປະໂຫຍດ ຍ້ອນຕົ້ນທຶນການຜະລິດສູງ ຍ້ອນພວກເຮົາຍັງຂາດກົນໄກຊ່ວຍໜູນທີ່ແທດເໝາະ. ອີກດ້ານໜຶ່ງແມ່ນແຮງງານຕົ້ນຕໍຂອງປະເທດເຮົາຢູ່ຂົງເຂດກະສິກໍາ ກວມເກືອບ 90% ແລະ ໃນຕົວຈິງແລ້ວລະດັບການສຶກສາຄວາມຮູ້ຄວາມສາມາດຢູ່ໃນລະດັບຕໍ່າ ແລະ ເປັນອຸປະສັກໃຫ້ພວກເຂົາບໍ່ສາມາດເຂົ້າເຖິງ ແລະ ນໍາໃຊ້ວິທະຍາສາດ-ເຕັກໂນໂລຊີທີ່ທັນສະໄໝ, ສິ່ງດັ່ງກ່າວກາຍເປັນຂໍ້ຈໍາກັດໃນການຍົກສະມັດຕະພາບ, ຄຸນະພາບຂອງຜະລິດຕະພັນ, ເຮັດໃຫ້ຜະລິດຕະພັນກະສິກໍາຂາດຄວາມສາມາດແຂ່ງຂັນໃນເງື່ອນໄຂເຊື່ອມໂຍງເສດຖະກິດກັບພາກພື້ນ ແລະ ສາກົນ. ສະນັ້ນ ບັນດາສິ່ງທ້າທາຍ ແລະ ຂໍ້ຈໍາກັດເຫລົ່ານັ້ນ ຈະຕ້ອງໄດ້ມີການແກ້ໄຂຢ່າງແທ້ຈິງ ແລະ ໃຫ້ມີຜົນສໍາເລັດຫລາຍກວ່າເກົ່າ ເພື່ອປະກອບສ່ວນເຂົ້າໃນການນໍາພາປະເທດຊາດຫລຸດພົ້ນອອກຈາກດ້ວຍພັດທະນາຕາມເປົ້າໝາຍວາງໄວ້.