ກອງປະຊຸມເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 6 ສະໄໝທີ X ຂອງພັກ
ກອງປະຊຸມເຊື່ອມຊຶມ ມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 6 ສະໄໝທີ X ຂອງພັກ ໄດ້ໄຂຂຶ້ນຢ່າງເປັນທາງການໃນວັນທີ 19 ກໍລະກົດນີ້, ພາຍໃຕ້ການເປັນປະທານຂອງສະຫາຍ ພັນຄໍາ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ມີບັນດາສະຫາຍ ກໍາມະການກົມການເມືອງ, ເລຂາທິການສູນກາງພັກ, ກຳມະການສູນກາງພັກ, ຄະນະພັກ-ຄະນະນຳກະຊວງ, ອົງການ, ນະຄອນຫລວງວຽງຈັນ ແລະ ບັນດາແຂວງ ພ້ອມດ້ວຍສະມາຊິກສະພາແຫ່ງຊາດຫລາຍກວ່າ 1.300 ສະຫາຍ ເຂົ້າຮ່ວມ.
ກອງປະຊຸມຄັ້ງນີ້, ຈະດໍາເນີນໄປເປັນເວລາ 2 ວັນ, ໄດ້ສຸມໃສ່ເຊື່ອມຊຶມ 3 ເອກະສານຕົ້ນຕໍຄື: ຕີລາຄາການຜັນຂະຫຍາຍ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ໃນໄລຍະສອງປີກວ່າຜ່ານມາ ແລະ ບາງໜ້າທີ່ຈຸດສຸມໃນຕໍ່ໜ້າ; ມະຕິຂອງຄະນະບໍລິຫານງານສູນກາງພັກ ສະບັບເລກທີ 037/ຄບສພ, ລົງວັນທີ 18 ມິຖຸນາ 2018 ວ່າດ້ວຍການຍົກສູງປະສິດທິພາບການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ; ແລະ ຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 04/ຄລສພ, ລົງວັນທີ 7 ພຶດສະພາ 2018 ວ່າດ້ວຍການກະກຽມດໍາເນີນກອງປະຊຸມໃຫຍ່ອົງຄະນະພັກ ກະຊວງ-ອົງການ, ແຂວງ-ນະຄອນຫລວງ, ອົງຄະນະພັກເມືອງ-ນະຄອນ ແລະ ຮາກຖານພັກ ໃນຂອບເຂດທົ່ວປະເທດ.
ຈຸດປະສົງຂອງການເຊື່ອມຊຶມ ແລະ ຜັນຂະຫຍາຍເອກະສານໃນຄັ້ງນີ້, ກໍເພື່ອສ້າງຄວາມຮັບຮູ້, ຄວາມເຂົ້າໃຈ ແລະ ກຳແໜ້ນບັນຫາຢ່າງຈະແຈ້ງ, ເລິກເຊິ່ງ ແລະ ມີຄວາມເປັນເອກະພາບກັນສູງທາງດ້ານທັດສະນະບົນພື້ນຖານນັ້ນ ເພື່ອຫັນເປັນແຜນປະຕິບັດງານລະອຽດ ຂອງອົງຄະນະພັກແຕ່ລະຂັ້ນ; ເພື່ອຍົກສູງຄວາມເປັນເຈົ້າການ ແລະ ຄວາມຮັບຜິດຊອບການເມືອງຂອງຄະນະພັກແຕ່ລະຂັ້ນ ໃນການນຳພາຊີ້ນຳແກ້ໄຂບັນຫາຕົວຈິງ ກໍຄື ສະພາບການເລັ່ງທວງຂອງຂະແໜງການ ແລະ ທ້ອງຖິ່ນຮາກຖານຂອງຕົນ; ເພື່ອສ້າງການຫັນປ່ຽນໃໝ່ທີ່ເປັນການກະທຳຕົວຈິງ ໃນການຈັດຕັ້ງປະຕິ ບັດມະຕິກອງປະຊຸມໃຫຍ່ຄັ້ງທີ X ຂອງພັກ ໃຫ້ມີຜົນສຳເລັດຕາມຄາດໝາຍທີ່ກຳນົດໄວ້.
ສະຫາຍ ພັນຄຳ ວິພາວັນ ກ່າວບາງຕອນສຳຄັນວ່າ: ມື້ນີ້ພວກເຮົາໄດ້ມາເຕົ້າໂຮມກັນ ເພື່ອຈັດຕັ້ງເຊື່ອມຊຶມ, ຜັນຂະຫຍາຍເນື້ອໃນຈິດໃຈສຳຄັນຂອງມະຕິ 6 ສະໄໝທີ X ຢູ່ຂັ້ນສູນກາງ, ຊຶ່ງແມ່ນເຫດການສຳຄັນໜຶ່ງ ໃນການສືບຕໍ່ສ້າງບາດກ້າວບຸກທະລຸຢ່າງແຂງແຮງ ແລະ ຕໍ່ເນື່ອງ, ທັງຖືເປັນບາດລ້ຽວສຳຄັນ ໃນການຍູ້ແຮງຂະບວນການຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ X ຂອງພັກ ໄລຍະທ້າຍສະໄໝໃຫ້ເຂົ້າສູ່ລວງເລິກຢູ່ທຸກຂົງເຂດວຽກງານ ແຕ່ສູນກາງລົງຮອດທ້ອງຖິ່ນຮາກຖານຢ່າງເປັນຂະບວນຟົດຟື້ນ. ຜ່ານການຈັດຕັ້ງປະຕິບັດຕົວຈິງສອງປີກວ່າ, ພວກເຮົາໄດ້ແກ້ຫລາຍບັນຫາ ແລະ ມີຜົນສຳເລັດຫລາຍປະການ, ແຕ່ໃນຂະນະດຽວກັນ ກໍຍັງມີຫລາຍດ້ານທີ່ຍັງເຮັດບໍ່ທັນໄດ້, ບໍ່ທັນສ້າງການຫັນປ່ຽນໃໝ່ທີ່ຕັ້ງໜ້າແທ້, ຍັງມີສະພາບລັງໆເລໆ ແລະ ເຮັດບໍ່ເຕັມກຳລັງ.
ຕໍ່ສະພາບດ່ັງກ່າວ, ສະຫາຍ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໄດ້ມີຄວາມເຫັນໃນກອງປະຊຸມສູນກາງຄົບຄະນະ ຄັ້ງທີ 6 ສະໄໝທີ X, ວັນທີ 2 ພຶດ ສະພາ 2018, ໂດຍກ່າວວ່າ: ພວກເຮົາຍັງມີຂໍ້ຄົງຄ້າງຈໍານວນໜຶ່ງ ທີ່ເປັນສິ່ງທ້າທາຍຕໍ່ບົດບາດການ ນໍາພາຂອງພັກ ແລະ ການຄຸ້ມຄອງຂອງລັດເຮົາ, ເຊິ່ງບັນຫາໃຫຍ່ກໍຍັງວົນວຽນປິ່ນອ້ອມ “6 ໄພອັນ ຕະລາຍ” ເປັນຕົ້ນແມ່ນບັນຫາຄວາມທຸກຍາກ, ການຫລຸດໂຕນກັນດ້ານການພັດທະນາ ຢູ່ທ້ອງຖິ່ນຕ່າງໆ, ການຜະລິດເປັນສິນຄ້າຂອງປະຊາຊົນ ຍັງບໍ່ທັນເປັນຂະບວນການທີ່ແຂງແຮງຕໍ່ເນື່ອງ; ປະກົດການຫຍໍ້ທໍ້ໃນສັງຄົມຍັງເພີ່ມຂຶ້ນ ແລະ ບໍ່ທັນໄດ້ຮັບການແກ້ໄຂຢ່າງເຖິງຖອງ ໂດຍສະເພາະບັນຫາຢາເສບຕິດ, ອຸປະຕິເຫດ, ອາດຊະຍາກໍາຕ່າງໆ; ການປັບປຸງປົວແປງພັກຕິດພັນກັບການແກ້ໄຂບັນຫາຫຍໍ້ທໍ້ໃນກົງຈັກການຈັດຕັ້ງແຕ່ລະຂັ້ນຍັງຊັກຊ້າ ແລະ ບໍ່ທັນແຂງແຮງເທົ່າທີຄວນ ແລະ ອື່ນໆ (ບັນ ຫາໜີ້ສິນຄຸມເຄືອ, ສໍ້ລາດບັງຫລວງ, ຄ້າຂາຍເຖື່ອນ). ດ້ວຍເຫດນັ້ນ, ກອງປະຊຸມເຊື່ອມຊຶມເທື່ອນີ້ ຈຶ່ງມີຄວາມສໍາຄັນແທ້ໆ, ອາດເວົ້າໄດ້ວ່າ ມະຕິ X ຂອງພັກ ຈະໄດ້ຮັບໝາກຜົນຫລືບໍ? ຈະໃຫ້ປະ ຊາຊົນຊື່ນຊົມ ຫລື ຜິດຫວັງ ແມ່ນຂຶ້ນກັບການຈັດຕັ້ງຜັນຂະຫຍາຍມະຕິ 6 ສະໄໝທີ X ໄດ້ດີ ແລະ ມີປະສິດທິຜົນສູງຊ່ຳໃດ? ອັນນີ້ ຖືເປັນຄວາມຮັບຜິດຊອບການເມືອງອັນສູງສົ່ງຂອງພັກເຮົາ ເວົ້າລວມ, ເວົ້າສະເພາະ ແມ່ນຄວາມຮັບຜິດຊອບໂດຍກົງ ຂອງຄະນະພັກແຕ່ລະຂັ້ນ ທີ່ຈະໃຫ້ຄຳຕອບໃນການແກ້ໄຂບັນຫາຕົວຈິງ.
ດັ່ງນັ້ນ, ຄະນະຮັບຜິດຊອບຊີ້ນຳການເຊື່ອມຊຶມມະຕິ 6 ສະໄໝທີ X ຈຶ່ງໄດ້ມີຄຳແນະນຳ-ເຈາະຈີ້ມບັນຫາຈຸດສຸມຈຳນວນໜຶ່ງ ໃຫ້ຄະນະພັກຂະແໜງການສູນກາງ ແລະ ທ້ອງຖິ່ນ ເພື່ອຄົ້ນຄວ້າ, ປຶກສາຫາລືເປັນເອກະພາບກັນພາຍໃນຄະນະພັກ ກ່ຽວກັບແຜນຜັນຂະຫຍາຍບັນຫາດັ່ງກ່າວ, ໂດຍກຳນົດຄາດໝາຍດ້ານເນື້ອໃນ, ຄາດໝາຍດ້ານເວລາ ແລະ ຄວາມຮັບຜິດຊອບ ໃນການແກ້ໄຂບັນຫາຢ່າງຊັດເຈນ ແລະ ຈະແຈ້ງ ຂອງພາກສ່ວນຕົນເອງຮັບຜິດຊອບ. ການເຮັດຄືແນວນີ້, ດ້ານໜຶ່ງແມ່ນການສະແດງອອກເຖິງຄວາມຮັບຜິດຊອບຂອງບັນດາສະຫາຍ ໃນແຕ່ລະຂົງເຂດວຽກງານ; ດ້ານສອງ ແມ່ນເພື່ອສ້າງຄວາມເປັນເອກະພາບແຕ່ສູນກາງຮອດທ້ອງຖິ່ນ ໂດຍມີຄວາມຮັບຜິດຊອບຮ່ວມກັນໃນການແກ້ໄຂບັນຫາ; ສ່ວນດ້ານສາມ ແມ່ນເປັນພື້ນຖານໃຫ້ແກ່ການຕິດຕາມ, ກວດກາ ແລະ ປະເມີນຜົນຂອງສູນກາງພັກ ກໍຄື ການຮ່ວມໄມ້ຮ່ວມມືໃນການຈັດຕັ້ງປະຕິບັດ ລະຫວ່າງສູນກາງກັບທ້ອງຖິ່ນ, ລະຫວ່າງຂະແໜງການດ້ວຍກັນ ແລະ ລະຫວ່າງຂະແໜງການກັບທ້ອງຖິ່ນ.
ບັນດາເອກະສານດັ່ງກ່າວນີ້, ລ້ວນແລ້ວແຕ່ເປັນບັນຫາທີ່ສໍາຄັນຕິດພັນໂດຍກົງ ກັບຄວາມຮັບ ຜິດຊອບການເມືອງຂອງຄະນະພັກ-ຄະນະນຳແຕ່ລະຂັ້ນ. ສະນັ້ນຈຶ່ງຮຽກຮ້ອງມາຍັງບັນດາສະຫາຍ ຈົ່ງໄດ້ເຊີດຊູຄວາມຮັບຜິດຊອບ, ເສີມຂະຫຍາຍຫົວຄິດປະດິດສ້າງ, ກ້າເວົ້າຄວາມຈິງ, ກ້າສະເໜີບັນຫາ-ສະເໜີວິທີທາງແກ້ໄຂທີ່ຖືກຕ້ອງ, ສອດຄ່ອງ ບົນຈິດໃຈທີ່ຖືເອົາຜົນປະໂຫຍດຂອງປະຊາຊົນ ແລະ ປະເທດຊາດເປັນກົກ, ຊອກທາງອອກທີ່ໜັກແໜ້ນໃຫ້ແກ່ການສືບ ຕໍ່ນຳພາຊີ້ນຳການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ໃຫ້ເກີດມີໝາກຜົນຕົວຈິງ.
